ಕೃಷಿ ವಿಜ್ಞಾನಿ ಎಂ.ಎಸ್‌. ಸ್ವಾಮಿನಾಥನ್‌ಗೆ ಇಂದಿರಾಗಾಂಧಿ ಪ್ರಶಸ್ತಿ

ನವದೆಹಲಿ : ಹಸಿರು ಕ್ರಾಂತಿಯ ಹರಿಕಾರ ಎಂ.ಎಸ್‌.ಸ್ವಾಮಿನಾಥನ್‌ ಅವರಿಗೆ ಶಾಂತಿ, ನಿಶ್ಶಸ್ತ್ರೀಕರಣ ಮತ್ತು ಅಭಿವೃದ್ಧಿಗಾಗಿ ನೀಡುವ ಪ್ರತಿಷ್ಠಿತ ಇಂದಿರಾ ಗಾಂಧಿ ಪ್ರಶಸ್ತಿಯನ್ನು ಭಾನುವಾರ ರಾಷ್ಟ್ರಪತಿ ಭವನದಲ್ಲಿ ನಡೆದ ಸಮಾರಂಭದಲ್ಲಿ ರಾಷ್ಟ್ರಪತಿ ಕೆ.ಆರ್‌.ನಾರಾಯಣ್‌ ವಿತರಿಸಿದರು.

ಖ್ಯಾತ ಕೃಷಿ ವಿಜ್ಞಾನಿಯಾದ ಸ್ವಾಮಿನಾಥನ್‌ ಸಸ್ಯಗಳ ವಂಶಾಭಿವೃದ್ಧಿ ಹಾಗೂ ಆಹಾರ ಕ್ಷೇತ್ರದಲ್ಲಿ ಸಲ್ಲಿಸಿರುವ ಗಣನೀಯ ಸೇವೆಗೆ 25 ಲಕ್ಷ ರುಪಾಯಿಗಳನ್ನೊಳಗೊಂಡ ಈ ನಗದು ಪುರಸ್ಕಾರ ನೀಡಲಾಗಿದೆ.

ರಾಷ್ಟ್ರಪತಿ ಕೆ.ಆರ್‌. ನಾರಾಯಣ್‌ ಹಾಗೂ ಉಪ ರಾಷ್ಟ್ರಪತಿ ಕೃಷ್ಣಕಾಂತ್‌, ಭಾರತದ ಆಹಾರ ಭದ್ರತೆಯಲ್ಲಿ ಸ್ವಾಮಿನಾಥನ್‌ ಅವರು ಸಲ್ಲಿಸಿರುವ ಸೇವೆಯನ್ನು ಕೊಂಡಾಡಿದರು. ಸ್ಥಳೀಯ ಸಂಸ್ಥೆಗಳ ಸಹಕಾರದಲ್ಲಿ ಸಾಮುದಾಯಿಕ ಆಹಾರ ಮತ್ತು ಜಲ ಭದ್ರತಾ ಪದ್ಧತಿಯನ್ನು ಜಾರಿಗೆ ತಂದರೆ 2007ನೇ ಇಸವಿ ಹೊತ್ತಿಗೆ ದೇಶದ ಹಸಿವು ಮತ್ತು ಬಡತನ ಮಟಾ ಮಾಯವಾಗುತ್ತದೆ ಎಂದು ಸ್ವಾಮಿನಾಥನ್‌ ಅಭಿಪ್ರಾಯಪಟ್ಟರು.

(ಇನ್ಫೋ ವಾರ್ತೆ)