ಭಯೋತ್ಪಾದಕತೆ ಹತ್ತಿಕ್ಕಲು ರಾಷ್ಟ್ರೀಯ ನೀತಿ ಅಗತ್ಯ- ವೆಂಕಯ್ಯನಾಯ್ಡು

ಹೈದರಾಬಾದ್‌ : ವೀರಪ್ಪನ್‌ ವಿರುದ್ಧ ಕಾರ್ಯಾಚರಣೆ ನಡೆಸಲು ಕೇಂದ್ರ ಸರ್ಕಾರ ಸನ್ನದ್ಧವಾಗಿದೆ ಎಂದು ರಾಜ್‌ ಬಿಡುಗಡೆಯಾದ ಸ್ವಲ್ಪ ಹೊತ್ತಿನಲ್ಲೇ ಪ್ರಕಟಿಸಿದ್ದ ಕೇಂದ್ರ ಗ್ರಾಮೀಣಾಭಿವೃದ್ಧಿ ಸಚಿವ ಎಂ. ವೆಂಕಯ್ಯನಾಯ್ಡು , ಭಯೋತ್ಪಾದಕ ಕೃತ್ಯಗಳನ್ನು ಹತ್ತಿಕ್ಕಲು ಎಲ್ಲಾ ರಾಜ್ಯ ಸರ್ಕಾರಗಳು ಒಟ್ಟು ಗೂಡಿ ನೀತಿಯಾಂದನ್ನು ರಚಿಸಲು ಕರೆ ನೀಡಿದ್ದಾರೆ.

ಇಲ್ಲಿನ ಸುದ್ದಿಗೋಷ್ಠಿಯಾಂದರಲ್ಲಿ ಗುರುವಾರ ಮಾತನಾಡುತ್ತಿದ್ದ ಅವರು, ರಾಜ್‌ಕುಮಾರ್‌ ಅವರ ಸುರಕ್ಷಿತ ಬಿಡುಗಡೆ ತಮಗೆ ವೈಯಕ್ತಿಕವಾಗಿ ಸಂತೋಷ ತಂದಿದೆ ಎಂದರು. ಆದರೆ, ಇದು ಪ್ರಕರಣದ ಕೊನೆಯೇನೂ ಅಲ್ಲ . ಸಮಾಜವನ್ನು ಆಗಾಗ ಬಾಧಿಸುತ್ತಿರುವ ಗಣ್ಯವ್ಯಕ್ತಿಗಳ ಅಪಹರಣ, ಭಯೋತ್ಪಾದಕತೆ ಮತ್ತು ವಿಮಾನ ಅವಪಹರಣಗಳಂತಹ ಸಂದರ್ಭಗಳ ಸಮಸ್ಯೆಗಳ ನಿವಾರಣೆಗಾಗಿ ಎಲ್ಲಾ ರಾಜ್ಯ ಸರ್ಕಾರಗಳು ಒಟ್ಟಾಗಿ ರಾಷ್ಟ್ರೀಯ ನೀತಿ ರೂಪಿಸಬೇಕು ಎಂದು ಅವರು ಹೇಳಿದರು.

ಅಪಹರಣಕಾರರು ಮತ್ತು ಭಯೋತ್ಪಾದಕರ ಚಟುವಟಿಕೆಗಳನ್ನು ಹತ್ತಿಕ್ಕಲು ಕಠಿಣ ಕ್ರಮಗಳನ್ನು ಕೈಗೊಳ್ಳುವ ನಿಟ್ಟಿನಲ್ಲಿ ಗೃಹಮಂತ್ರಿ ಎಲ್‌.ಕೆ. ಅದ್ವಾನಿ ಅವರು ಈಗಾಗಲೇ ಎಲ್ಲಾ ರಾಜ್ಯಗಳ ಮುಖ್ಯಮಂತ್ರಿಗಳನ್ನು ಸಂಪರ್ಕಿಸಿದ್ದಾರೆ ಎಂದು ನಾಯ್ಡು ಹೇಳಿದರು. ಕರ್ನಾಟಕ ಹಾಗೂ ತಮಿಳುನಾಡು ಸರ್ಕಾರಗಳು ಕೇಂದ್ರದ ಸಹಾಯ ಕೇಳದೆ ಇದ್ದುದರಿಂದ, ರಾಜ್‌ ಬಿಡುಗಡೆ ವಿಷಯದಲ್ಲಿ ಕೇಂದ್ರ ನಿರ್ಣಾಯಕ ಪಾತ್ರ ವಹಿಸಲಿಲ್ಲ ಎಂದರು.

ಪಡೆ ಕಳಿಸಲು ಕೇಂದ್ರ ಸಿದ್ಧ : ಕರ್ನಾಟಕ ಅಥವಾ ತಮಿಳುನಾಡು ಸರ್ಕಾರ ಈಗಲೂ ಮನವಿ ಮಾಡಿದಲ್ಲಿ ತಕ್ಷಣವೇ ವೀರಪ್ಪನ್‌ನನ್ನು ಬಂಧಿಸಲು ಒಂದು ತಂಡವನ್ನು ಕೇಂದ್ರ ಸರ್ಕಾರ ಕಳಿಸಲು ಸಿದ್ಧವಿದೆ ಎಂದು ಕೇಂದ್ರ ಗೃಹ ಕಾರ್ಯದರ್ಶಿ ಐ.ಡಿ.ಸ್ವಾಮಿ ಟಿವಿ ಚಾನೆಲ್‌ ಒಂದಕ್ಕೆ ನೀಡಿದ ಸಂದರ್ಶನದಲ್ಲಿ ಹೇಳಿದ್ದಾರೆ.

(ಯುಎನ್‌ಐ)

ಮುಖಪುಟ / ರಾಜ್‌ ಬಿಡುಗಡೆ