ಇಬ್ಬನಿ ಹಾಸು ಜಾರುತಿದೆ

ಮುಂಜಾನೆ ಕಣ್ಣು ಬಿಟ್ಟೊಡನೆ ಬಯಲ ಮೇಲಿನ ಇಬ್ಬನಿ ಹಾಸು, ಬಾನಂಚಲಿ ಥಳಥಳಿಸುವ ಬಂಗಾರದ ತೇರು, ರಾತ್ರಿ ಮನೆಯಂಗಳ ಬೆಳಗುವ ಹಣತೆ, ಸಿಗರೇಟು ಸೇದದಿದ್ದರೂ ಬಾಯಿಯಿಂದ ಬರುವ ಹೊಗೆ - ಇವೆಲ್ಲಾ ಚಳಿಯ ಕಾರ್ತಿಕ ಮಾಸದಲ್ಲೂ ಮನಸ್ಸನ್ನು ಬೆಚ್ಚಗಿಡುವಂಥವು.

ಬಾಗಿಲಿಗೆ ನೀರು ಹಾಕಲು ಅಮ್ಮ ಬಾಗಿಲು ತೆರೆವುದನ್ನೇ ಕಾಯುತ್ತಾ, ಒಮ್ಮೆಲೇ ಒಳನುಗ್ಗುವ ಮಂಜು ಹೊತ್ತ ಪವನ ದೇಹವನ್ನು ಚಾದರ ಬಿಗಿದಪ್ಪುವಂತೆ ಮಾಡುತ್ತಾನೆ. ಗಂಟೆ ಎಂಟಾದರೂ ಚಾದರ- ದೇಹ ಒಂದನ್ನೊಂದು ಬಿಡುವುದೇ ಇಲ್ಲ. ಮೇಲೇಳಲು ಪ್ರತಿ ನಿತ್ಯ ಗೊಣಗು, ಕುದಿ ಕುದಿ ನೀರಿನ ಸ್ನಾನ, ಹಿಮ ಪರದೆಯ ಸೂರ್ಯ ಪೂರ್ತಿ ಹರಿಯೋವರೆಗೆ ಜೋಭದ್ರತನದ ಪರಮಾವಧಿ, ಒಡೆದ ತುಟಿಗೆ ಮುಲಾಮಿನ ಲೇಪನ.

ಅರ್ಧ ಗಂಟೆಗೇ ಬಾಯ್ಲರಲ್ಲಿ ಕಾಯುವ ನೀರು ಚಳಿಗಾಲದಲ್ಲಿ ಇನ್ನೂ ಒಂದರ್ಧ ತಾಸು ನುಂಗಿ ಕರೆಂಟು ಬಿಲ್ಲು ಏರುವಂತಾಗಿದೆ. ಎಷ್ಟು ಕಾಫಿ ಕುಡಿದರೂ ಕಳೆಯದ ಚಳಿ ಕೆಲವರು ರಂ ಗುಟುಕರಿಸುವಂತೆ ಪ್ರೇರೇಪಿಸುತ್ತಿದೆ. ಹೊಸದಾಗಿ ಮದುವೆಯಾದವರಿಗಂತೂ ದಿನಾ ಹನಿಮೂನು!

ರಾಜ್ಯಾದ್ಯಂತ ಹವೆ ಶುಷ್ಕ. ದಕ್ಷಿಣ ಕರ್ನಾಟಕದಲ್ಲಿ ಇಬ್ಬನಿ ಕರಗುವುದು ಗಣನೀಯವಾಗಿ ಹೆಚ್ಚಾಗಿದೆ. ಇವತ್ತು ರಾಜ್ಯದಲ್ಲೇ ಅತಿ ಹೆಚ್ಚು ತಣ್ಣಗಿನ ಹವೆ ಓಡಾಡಿದ್ದು ಗದಗದಲ್ಲಿ. ಅಲ್ಲಿ ಕನಿಷ್ಠ ಉಷ್ಣಾಂಶ 14.4 ಡಿಗ್ರಿ. ಗುರುವಾರದ ಹೊತ್ತಿಗೆ ಬೆಂಗಳೂರಲ್ಲಿ ಕನಿಷ್ಠ ತಾಪಮಾನ 16 ಡಿಗ್ರಿಯಷ್ಟಾಗಬಹುದು ಎಂದು ಹವಾಮಾನ ಇಲಾಖೆ ಹೇಳಿದೆ.

ಎಲ್ಲಾ ಗಡಗಡ ನಡುಗುತ್ತಿದ್ದರೂ, ಅಮ್ಮನ ಬಗಲಲ್ಲೇ ಬೆಚ್ಚಗಿರುವ ಕಂದ ಬಲವಂತವಾಗಿ ಹಾಕಿದ ಟೋಪಿಯನ್ನು ಕಿತ್ತೆಸೆಯುತ್ತಾ ನಾನು ನಿಮಗಿಂತ ಆ್ಯಕ್ಟಿವ್‌ ಅಂತ ಅಣಕಿಸುತ್ತಿದೆ.