ಮಂಗಳವಾರ ರಾತ್ರಿ ವೀರಪ್ಪನ್‌ ಜತೆ ಸಂಧಾನಕಾರರ ಮಾತುಕತೆ?

ಚೆನ್ನೈ : ವೀರಪ್ಪನ್‌ ಸಂದೇಶದ ನಿರೀಕ್ಷೆಯಲ್ಲಿದ್ದ ಅಧಿಕೃತ ಸಂಧಾನಕಾರ ನಕ್ಕೀರನ್‌ ಗೋಪಾಲ್‌ ಅವರು ಕಾಡಿಗೆ ತೆರಳಿದ್ದು, ಈಗಾಗಲೇ ಕಾಡಿಗೆ ತೆರಳಿ ವೀರಪ್ಪನ್‌ ಸಂದೇಶಕ್ಕಾಗಿ ಕಾಯುತ್ತಿರುವ ಸಂಧಾನಕಾರರಾದ ನೆಡುಮಾರನ್‌, ಕಲ್ಯಾಣಿ ಹಾಗೂ ಸುಕುಮಾನ್‌ ಅವರನ್ನು ಮಂಗಳವಾರ ಜತೆಗೂಡಲಿದ್ದಾರೆ ಎಂದು ಮೂಲಗಳು ಹೇಳಿವೆ.

ಮಂಗಳವಾರ ಮಧ್ಯಾಹ್ನದ ಹೊತ್ತಿಗೆ ತಾಳಮಲೈ ಅರಣ್ಯದಲ್ಲಿ ನೆಡುಮಾರನ್‌ ಅವರನ್ನು ಜತೆಗೂಡುವ ಗೋಪಾಲ್‌ ಮಂಗಳವಾರ ರಾತ್ರಿಯೇ ಅಡಗುತಾಣಕ್ಕೆ ಹೋಗಿ ವೀರಪ್ಪನ್‌ ಜತೆ ಸಂಧಾನದ ಮಾತುಕತೆಯಲ್ಲಿ ತೊಡಗಲಿದ್ದಾರೆ ಎಂದೂ ತಿಳಿದುಬಂದಿದೆ. ಇದು ಆರನೆಯ ಸಂಧಾನ ಯಾತ್ರೆ ಆಗಿದ್ದು, ಈ ಬಾರಿ ರಾಜ್‌ಕುಮಾರ್‌ ಅವರನ್ನು ಕಾಡಿನಿಂದ ಕರೆದುಕೊಂಡು ಬರುವುದಾಗಿ ಗೋಪಾಲ್‌ ಕಾಡಿಗೆ ತೆರಳುವ ಮುನ್ನ ತಿಳಿಸಿದರೆಂದು ಮೂಲಗಳು ಹೇಳಿವೆ.

ರಾಜ್‌ ಅಪಹರಣವಾದ ದಿನದಿಂದಲೂ ಒಂದಲ್ಲಾ ಒಂದು ವದಂತಿಗಳು ಹಬ್ಬುತ್ತಲೇ ಇದ್ದು, ಸೋಮವಾರ ರಾತ್ರಿ ವೀರಪ್ಪನ್‌ ಅಡಗುತಾಣದಿಂದ ಮತ್ತೊಂದು ಹೊಸ ಕ್ಯಾಸೆಟ್‌ ಬಂದಿದೆ. ಆ ಆಡಿಯೋ ಕ್ಯಾಸೆಟ್‌ ಬಂದ ನಂತರವೇ ಗೋಪಾಲ್‌ ಕಾಡಿನತ್ತ ಪ್ರಯಾಣ ಬೆಳೆಸಲು ನಿರ್ಧರಿಸಿದ್ದು ಎಂಬ ಹೊಸ ಸುದ್ದಿಯೂ ಸುಳಿದಾಡುತ್ತಿದೆ. ಆದರೆ, ಗೋಪಾಲ್‌ ಸಂಧಾನಕ್ಕಾಗಿ ಕಾಡಿಗೆ ತೆರಳಿದ ವಿಷಯವನ್ನು ನಕ್ಕೀರನ್‌ ಪತ್ರಿಕೆಯ ಮೂಲಗಳಾಗಲೀ, ತಮಿಳುನಾಡು ಸರಕಾರವಾಗಲೀ ಇನ್ನೂ ದೃಢಪಡಿಸಿಲ್ಲ.

ಬೆಂಗಳೂರು ವರದಿ : ಈ ಮಧ್ಯೆ ನೆಡುಮಾರನ್‌ ಕಾಡಿಗೆ ತೆರಳಿದ್ದರೂ, ಗೋಪಾಲ್‌ ಅವರು ಇನ್ನೂ ಚೆನ್ನೈನಲ್ಲಿ ಉಳಿದಿರುವುದಕ್ಕೆ ವಿಶೇಷ ಕಾರಣಗಳು ಏನೂ ಇಲ್ಲ ಎಂದು ರಾಜ್ಯ ಗೃಹ ಸಚಿವ ಬೆಂಗಳೂರಿನಲ್ಲಿ ತಿಳಿಸಿದ್ದಾರೆ. ರಾಜ್‌ಕುಮಾರ್‌ ಅಪಹರಣ ಬಿಕ್ಕಟ್ಟಿನ ಬಗ್ಗೆ ತಾವು ಕೇಂದ್ರ ಗೃಹ ಸಚಿವ ಎಲ್‌.ಕೆ. ಆಡ್ವಾಣಿ ಅವರೊಂದಿಗೆ ಸಹ ಚರ್ಚಿಸಿರುವುದಾಗಿಯೂ ಅವರು ಹೇಳಿದ್ದಾರೆ.

ವಾರ್ತಾ ಸಂಚಯ
ಮುಖಪುಟ / ರಾಜ್‌ ಅಪಹರಣ