ಕಚ್ಚಾ ರೇಷ್ಮೆ ಉತ್ಪಾದನೆ ಗುಣಮಟ್ಟ ಹೆಚ್ಚಿಸಲು ಕ್ರಮ

ಮೈಸೂರು : ಹೆಚ್ಚುತ್ತಿರುವ ಪ್ರಾದೇಶಿಕ ಮತ್ತು ಅಂತಾರಾಷ್ಟ್ರೀಯ ಬೇಡಿಕೆಗನುಗುಣವಾಗಿ ಕಚ್ಚಾ ರೇಷ್ಮೇ ಉತ್ಪಾದನೆಯನ್ನು ಇನ್ನಷ್ಟು ಸದೃಢಗೊಳಿಸಲಾಗುವುದೆಂದು ರಾಜ್ಯದ ರೇಷ್ಮೆ ಅಭಿವೃದ್ಧಿ ಆಯುಕ್ತ ಮತ್ತು ನಿರ್ದೇಶಕ ನಡಾದರ್‌ ಶನಿವಾರ ಹೇಳಿದ್ದಾರೆ.

ಇಲ್ಲಿ ನಡೆಯುತ್ತಿರುವ ರೇಷ್ಮೇ ಕೃಷಿ ಕುರಿತ ವಿಚಾರಸಂಕಿರಣದಲ್ಲಿ ಮಾತನಾಡುತ್ತಿದ್ದ ಅವರು, ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಒಂದು ಲಕ್ಷ ಟನ್‌ ಮತ್ತು ಸ್ಥಳೀಯವಾಗಿ 25 ಸಾವಿರ ಟನ್‌ ರೇಷ್ಮೆಗೆ ಬೇಡಿಕೆ ಇದೆ. ಆದರೆ ಭಾರತದಲ್ಲಿ ವಾರ್ಷಿಕ ಕೇವಲ 16 ಸಾವಿರ ಟನ್‌ ರೇಷ್ಮೆ ಉತ್ಪಾದನೆ ಇದೆ. ಹಾಗಾಗಿ ಭಾರತ, ಚೀನಾದಿಂದ ಈ ವರ್ಷ 7 ಸಾವಿರ ಟನ್‌ ರೇಷ್ಮೆಯನ್ನು ಆಮದು ಮಾಡಿಕೊಂಡಿದೆ ಇದನ್ನು ಸರಿಗಟ್ಟಬೇಕಾಗಿದೆ ಎಂದು ಅವರು ಹೇಳಿದ್ದಾರೆ.

ವಾರ್ಷಿಕ 8 ಸಾವಿರ ಟನ್‌ ರೇಷ್ಮೆ ಉತ್ಪಾಧಿಸುವ ಮೂಲಕ ಕರ್ನಾಟಕ ಮೊದಲ ಸ್ಥಾನದಲ್ಲಿದೆ. ರೇಷ್ಮೆ ಆಮದು ಕಡಿಮೆ ಮಾಡಲು ರೇಷ್ಮೆ ಗುಣಮಟ್ಟ ಹೆಚ್ಚಿಸಬೇಕಾದ ಅಗತ್ಯವಿದೆ. ಈಗ ಬೈವೋಲ್ಟನ್‌ ಹೈಬ್ರಿಡ್‌ ರೇಷ್ಮೆ ಉತ್ಪಾದನೆ ವಾರ್ಷಿಕ 2 ಸಾವಿರ ಟನ್‌ ಇದ್ದು, ಅದನ್ನು 2010ನೇ ಇಸವಿ ಹೊತ್ತಿಗೆ 60 ಸಾವಿರ ಟನ್‌ಗೇರಿಸುವ ಉದ್ದೇಶ ಹೊಂದಲಾಗಿದೆ ಎಂದು ಅವರು ತಿಳಿಸಿದ್ದಾರೆ.

ರೇಷ್ಮೆ ಗುಣಮಟ್ಟವನ್ನು 2ಎ ಮತ್ತು 3ಎ ದರ್ಜೆಗೇರಿಸಲು ಕೇಂದ್ರ ರೇಷ್ಮೆ ಸಂಶೋಧನೆ ಮತ್ತು ತರಬೇತಿ ಸಂಸ್ಥೆ ವಿವಿಧ ರೀತಿಯ ತಳಿಗಳನ್ನು ಪರಿಚಯಿಸಿದೆ ಎಂದು ಸಂಸ್ಥೆಯ ನಿರ್ದೇಶಕ ಆರ್‌. ಕೆ. ದತ್ತಾ ತಿಳಿಸಿದ್ದಾರೆ.

(ಯುಎ-ನ್‌-ಐ)