ಟೆಸ್ಟ್ನಿಂದ ರೋಡ್ಸ್ , ಒಂಡೇ ಪಂದ್ಯಗಳಿಂದ ಕಲಿನನ್ ನಿವೃತ್ತಿ
ಜೊಹಾನ್ಸ್ ಬರ್ಗ್ : ವಿಶ್ವದ ಅತ್ಯಂತ ಶ್ರೇಷ್ಠ ಫೀಲ್ಡರ್ ದಕ್ಷಿಣ ಆಫ್ರಿಕಾದ ಜಾಂಟಿ ರೋಡ್ಸ್ ಟೆಸ್ಟ್ ಪಂದ್ಯಗಳಿಂದ ಹಾಗೂ ಮಧ್ಯಮ ಕ್ರಮಾಂಕದ ಬ್ಯಾಟ್ಸ್ಮನ್ ಡರೈಲ್ ಕಲಿನನ್ ಒಂದು ದಿನದ ಅಂತರರಾಷ್ಟ್ರೀಯ ಪಂದ್ಯಗಳಿಂದ ವಿರಮಿಸುವ ಪ್ರಕಟಣೆ ಬುಧವಾರ ಹೊರಬಿದ್ದಿದ್ದು , ನಿವೃತ್ತಿಗೆ ಕಾರಣಗಳು ತಿಳಿದು ಬಂದಿಲ್ಲ.
ಮ್ಯಾಚ್ ಫಿಕ್ಸಿಂಗ್ ಹಗರಣದಿಂದ ತತ್ತರಿಸಿರುವ ಹರಿಣಗಳ ತಂಡಕ್ಕೆ ರೋಡ್ಸ್ ಹಾಗೂ ಕಲಿನನ್ ಅವರ ನಿವೃತ್ತಿ ಆಘಾತಕರವಾಗಿದೆ. ತಂಡದ ಆಧಾರ ಸ್ಥಂಭಗಳಾದ ಇಬ್ಬರೂ ಆಟಗಾರರು ಅನೇಕ ಪಂದ್ಯಗಳಲ್ಲಿ ತಂಡಕ್ಕೆ ಜಯ ತಂದು ಕೊಟ್ಟಿದ್ದಾರೆ. ಯುನೈಟೆಡ್ ಕ್ರಿಕೆಟ್ ಮಂಡಳಿಯ ಕಾರ್ಯ ನಿರ್ವಾಹಕ ನಿರ್ದೇಶಕ ಆಲಿ ಬಾಕರ್ ಇಬ್ಬರು ಆಟಗಾರರ ನಿವೃತ್ತಿಯನ್ನು ಪ್ರಕಟಿಸಿದ್ದಾರೆ.
ತಂಡದ ಮಾಜಿ ನಾಯಕ ಹ್ಯಾನ್ಸಿ ಕ್ರೊನಿಯೆ ಅವರು, ಮೋಸದ ಕ್ರಿಕೆಟ್ನಲ್ಲಿ ಭಾಗವಹಿಸಿರುವುದನ್ನು ಒಪ್ಪಿಕೊಂಡು ಅವರಿಗೆ ಶಿಕ್ಷೆಯಾದ ಪ್ರಕರಣ ತಂಡದ ಮಾನಸಿಕ ದೃಢತೆಯನ್ನು ಗಣನೀಯವಾಗಿ ಕುಗ್ಗಿಸಿತ್ತು. ಕ್ರೊನಿಯೆ ಅವರ ನಂತರ ತಂಡದ ನಾಯಕತ್ವವನ್ನು ಪೊಲ್ಲಾಕ್ ವಹಿಸಿಕೊಂಡಿದ್ದಾರೆ.
(ರಾಯ್ಟರ್ಸ್)