ರಸ್ತೆ ದುರಸ್ತಿ : ಕಳಪೆ ಕಾಮಗಾರಿ ವಿರುದ್ಧ ತನಿಖೆ ಭರವಸೆ

ಬೆಂಗಳೂರು : ಬೆಂಗಳೂರು ನಗರದ ರಸ್ತೆಗಳ ದುರಸ್ತಿಯಲ್ಲಿ ಅವ್ಯವಹಾರ ನಡೆದಿದ್ದು, ಕಳಪೆ ಗುಣಮಟ್ಟದ ಕಾಮಗಾರಿ ನಡೆದಿದ್ದರೆ ಆ ಬಗ್ಗೆ ತನಿಖೆ ನಡೆಸಲಾಗುವುದು ಎಂದು ಮುಖ್ಯಮಂತ್ರಿ ಎಸ್‌.ಎಂ. ಕೃಷ್ಣ ವಿಧಾನಸಭೆಯಲ್ಲಿ ಮಂಗಳವಾರ ಆಶ್ವಾಸನೆ ನೀಡಿದರು.

ಬಿ.ಜೆ.ಪಿ.ಯ ಆರ್‌. ಅಶೋಕ್‌ ಅವರ ಪ್ರಶ್ನೆಗೆ ಉತ್ತರಿಸುತ್ತಿದ್ದ ಮುಖ್ಯಮಂತ್ರಿಗಳು, ಈಗಾಗಲೇ ನಗರದ 70 ರಸ್ತೆಗಳ ದುರಸ್ತಿ ಕಾರ್ಯ ಪೂರ್ಣಗೊಂಡಿದ್ದು, ಉಳಿದ ರಸ್ತೆಗಳ ರಿಪೇರಿ ಕಾಮಗಾರಿ ಫೆಬ್ರವರಿ ಅಂತ್ಯದೊಳಗೆ ಸಮರೋಪಾದಿಯಲ್ಲಿ ನಡೆಯಲಿದೆ ಎಂದು ತಿಳಿಸಿದರು. ಆದರೆ ಈ ಕಾಮಗಾರಿಯಲ್ಲಿ 42 ಕೋಟಿ ರುಪಾಯಿಗಳ ದುರುಪಯೋಗ ಆಗಿದೆ ಎಂಬ ಆರೋಪವನ್ನು ಅವರು ತಳ್ಳಿಹಾಕಿದರು.

ಈ ಯೋಜನೆಗೆ ಹಿಂದಿನ ಸರಕಾರ 104 ಕೋಟಿ ರುಪಾಯಿ ನಿಗದಿ ಪಡಿಸಿತ್ತು. ಇದರ ಪರಿಷ್ಕೃತ ಅಂದಾಜು ಈಗ 205 ಕೋಟಿ ರುಪಾಯಿಗಳಾಗಿವೆ ಎಂದು ಹೇಳಿದರು. ನಿರ್ದಿಷ್ಟ ಲೋಪಗಳ ಬಗ್ಗೆ ಸರಕಾರದ ಗಮನ ಸೆಳೆದರೆ, ಕ್ರಮ ಕೈಗೊಳ್ಳಲು ಹಾಗೂ ತಿದ್ದಿಕೊಳ್ಳಲು ಅವಕಾಶ ಆಗುತ್ತದೆ ಎಂದೂ ಸದಸ್ಯರಿಗೆ ತಿಳಿಸಿದರು.

ಇಡೀ ಪ್ರಕರಣದ ಬಗ್ಗೆ ತನಿಖೆ ನಡೆಸುವಂತೆ ಆಗ್ರಹಿಸಿದ ಶಾಸಕ ಅಶೋಕ್‌ ಅವರು ಕಳಪೆ ಕಾಮಗಾರಿಯನ್ನು ಪ್ರತಿಭಟಿಸಿ ಮತ್ತೊಬ್ಬ ಶಾಸಕರಾದ ಕಟ್ಟಾ ಸುಬ್ರಹ್ಮಣ್ಯ ನಾಯ್ಡು ಅವರ ಜತೆಯಲ್ಲಿ ಕೆಲಕಾಲ ಧರಣಿ ನಡೆಸಿದರು. (ಯುಎನ್‌ಐ)