ಕೃಷಿ- ಕೈಗಾರಿಕಾ ಕ್ರಾಂತಿಯ ರೂವಾರಿ ಸಿ. ಸುಬ್ರಹ್ಮಣ್ಯಂ ಇನ್ನಿಲ್ಲ

ಚೆನ್ನೈ : ಭಾರತ ರತ್ನ ಪ್ರಶಸ್ತಿ ವಿಜೇತ ಹಾಗೂ ಕೇಂದ್ರದ ಮಾಜಿ ಸಚಿವ, ಹಿರಿಯ ಮುತ್ಸದ್ದಿ ಸಿ. ಸುಬ್ರಹ್ಮಣ್ಯಂ ಮಂಗಳವಾರ ಮಧ್ಯಾಹ್ನ ನಿಧನರಾದರು. ಅವರಿಗೆ 90 ವರ್ಷ ವಯಸ್ಸಾಗಿತ್ತು .

ಅಸ್ತಮಾದಿಂದ ಬಳಲುತ್ತಿದ್ದ ಅವರಿಗೆ ತೀವ್ರ ಉಸಿರಾಟದ ತೊಂದರೆ ಕಾಣಿಸಿಕೊಂಡು, ಆಸ್ಪತ್ರೆಗಾಗಿ ಸಾಗಿಸುವ ಹಾದಿಯಲ್ಲಿ ನಿಧನರಾದರು ಎಂದು ಕುಟುಂಬದ ಮೂಲಗಳು ತಿಳಿಸಿವೆ. 70 ರ ದಶಕದ ಮೊದಲ ಭಾಗದಲ್ಲಿ ದೇಶಾದ್ಯಂತ ಹಸಿರು ಕ್ರಾಂತಿಯನ್ನು ರೂಪಿಸಿದ್ದ ಸುಬ್ರಹ್ಮಣ್ಯಂ ಅವರು, 50 ರ ದಶಕದಲ್ಲಿ ಮದರಾಸು ರಾಜ್ಯಕ್ಕೆ ಕೈಗಾರಿಕೀಕರಣದ ಲೇಪ ನೀಡಿದರು.

ಕೇಂದ್ರ ಸಂಪುಟದಲ್ಲಿ ಹಣಕಾಸು, ಕೃಷಿ ಖಾತೆಗಳನ್ನು ನಿರ್ವಹಿಸಿದ್ದ ಸುಬ್ರಹ್ಮಣ್ಯಂ ಅವರು ತಮಿಳು ನಾಯಕ ಕೆ. ಕಾಮರಾಜ್‌, ಮಾಜಿ ರಾಷ್ಟ್ರಪತಿ ಆರ್‌. ವೆಂಕಟರಾಮನ್‌ ಅವರ ನಿಕಟ ಸಂಪರ್ಕ ಹೊಂದಿದ್ದರು. 1910 ರಲ್ಲಿ ತಮಿಳುನಾಡಿನ ಪೊಲ್ಲಾಚಿ ಎನ್ನುವ ಗ್ರಾಮದಲ್ಲಿ ಜನಿಸಿದ್ದ ಅವರು, ಗಾಂಧಿಯವರ ಕರೆಗೆ ಓಗೊಟ್ಟು ಸ್ವಾತಂತ್ರ್ಯ ಚಳವಳಿಗೆ ಧುಮುಕಿದ್ದರು. ಸುಬ್ರಹ್ಮಣ್ಯಂ ಅವರ ಸೇವೆಯನ್ನು ಗೌರವಿಸಿ 1998 ರಲ್ಲಿ ಭಾರತ ಸರ್ಕಾರ, ದೇಶದ ಪರಮೋಚ್ಛ ಗೌರವ ಭಾರತ ರತ್ನ ಪ್ರಶಸ್ತಿ ನೀಡಿ ಗೌರವಿಸಿತ್ತು .

(ಇನ್ಫೋ ವಾರ್ತೆ)