ಸುರತ್ಕಲ್‌ನಲ್ಲಿ ವಿಶ್ವ ಬಂಟರ ಸಾಂಸ್ಕೃತಿಕ ಕಲೋತ್ಸವ

ಮಂಗಳೂರು: ಮುಂಬರುವ ಜನವರಿ 20 ಹಾಗೂ 21ರಂದು ಸುರತ್ಕಲ್‌ನಲ್ಲಿ ವಿಶ್ವ ಬಂಟರ ಸಾಂಸ್ಕೃತಿಕ ಕಲೋತ್ಸವ ನಡೆಯಲಿದೆ. ಮಂಗಳೂರಿನ ಬಂಟರ ಸಂಘಗಳ ಒಕ್ಕೂಟದ ಆಶ್ರಯದಲ್ಲಿ ಜರುಗುವ ಈ ಕಲೋತ್ಸವವನ್ನು ನಡೆಸಲು ಸುರತ್ಕಲ್‌ ಬಂಟರ ಸಂಘ ಮುಂದೆ ಬಂದಿದೆ. ಇದಕ್ಕಾಗಿ ಸಕಲ ಸಿದ್ಧತೆಗಳೂ ಆರಂಭವಾಗಿವೆ.

ಸುರತ್ಕಲ್‌ನ ಸುಭಾಷಿತ ನಗರದಲ್ಲಿ ಈ ಉತ್ಸವ ನಡೆಯಲಿದೆ ಎಂದು ಸುರತ್ಕಲ್‌ ಬಂಟರ ಸಂಘದ ಅಧ್ಯಕ್ಷ ದೇವಾನಂದ ಶೆಟ್ಟಿ ಪತ್ರಕರ್ತರಿಗೆ ತಿಳಿಸಿದ್ದಾರೆ. ಈ ಕಾರ್ಯಕ್ರಮಕ್ಕೆ 8ರಿಂದ 10 ಲಕ್ಷ ರುಪಾಯಿ ವೆಚ್ಚ ಆಗಲಿದ್ದು, 47 ಬಂಟರ ಸಂಘಗಳ ಸುಮಾರು ನಾಲ್ಕು ಸಾವಿರ ಪ್ರತಿನಿಧಿಗಳು ಭಾಗವಹಿಸುವ ನಿರೀಕ್ಷೆ ಇದೆ ಎಂದು ಅವರು ಹೇಳಿದರು.

ಬಂಟರ ಕಲೋತ್ಸವ ಸಂದರ್ಭದಲ್ಲಿ ಬಂಟರ ಪರಂಪರೆಯನ್ನು ಪ್ರತಿಬಿಂಬಿಸುವ ಸಲುವಾಗಿ ಕಂಬಳ ಕೋಣ, ಉತ್ತಮ ತಳಿಯ ಹಸು, ಹುಂಜ, ಪ್ರಾಚೀನ ಬೇಸಾಯ ಪದ್ಧತಿಯಲ್ಲಿ ಬಳಸಲಾಗುತ್ತಿದ್ದ ಸಲಕರಣೆಗಳ ವಸ್ತು ಪ್ರದರ್ಶನ ಸಹ ನಡೆಯಲಿದೆ ಎಂದರು. ಉತ್ಸವದ ಅಂಗವಾಗಿ ಭಾಷಣ, ಪ್ರಬಂಧ, ಭಾವಗೀತೆ, ಫ್ಯಾನ್ಸಿ ಡ್ರೆಸ್‌, ರಂಗೋಲಿ, ಚಿತ್ರರಚನೆ ಮುಂತಾದ ಸ್ಪರ್ಧೆಗಳೂ ಜರುಗಲಿವೆ ಎಂದ ಅವರು ಸುರತ್ಕಲ್‌ ಬಂಟರ ಸಂಘದಲ್ಲಿ ಸುಮಾರು 1600 ಮಂದಿ ಸದಸ್ಯರಿದ್ದಾರೆ ಎಂದು ತಿಳಿಸಿದರು.