ಫೆಬ್ರವರಿಯಿಂದ ಬೆಂಗಳೂರಿಂದ ಮಲೇಷಿಯಾಗೆ ನೇರ ವಿಮಾನ

* ಮೊಹಮ್ಮದ್‌ ಶಫೀಕ್‌

ಹೈದರಾಬಾದ್‌ : ಬೆಂಗಳೂರು, ಹೈದರಾಬಾದ್‌, ದೆಹಲಿ ಮತ್ತು ಮುಂಬೈಗಳಿಂದ ಮಲೇಷಿಯಾಗೆ ಮುಂದಿನ ವರ್ಷ ಫೆಬ್ರವರಿಯಿಂದ ನೇರ ವಿಮಾನಗಳು ಹಾರಲಿವೆ.

ಮಲೇಷಿಯಾ ಏರ್‌ಲೈನ್ಸ್‌ ಈ ವಿಮಾನಗಳನ್ನು ಹಾರಿಸಲಿದೆ. ನಗರದ ಕೈಗಾರಿಕಾ- ಮಾಧ್ಯಮ ಚರ್ಚೆಯಲ್ಲಿ ಭಾಗವಹಿಸಿರುವ ಮಲೇಷಿಯಾ ಪ್ರವಾಸೋದ್ಯಮ ಸಚಿವ ಅಬ್ದುಲ್‌ ಖಾದಿರ್‌ ಬಿನ್‌ ಹಾಜಿ ಶೇಖ್‌ ಫದ್ಜಿರ್‌ ಮಂಗಳವಾರ ಈ ಸಿಹಿ ಸುದ್ದಿ ಕೊಟ್ಟಿದ್ದಾರೆ.

ಈ ವರ್ಷ ಡಿಸೆಂಬರ್‌ನಲ್ಲೇ ಭಾರತದ ಪ್ರಮುಖ ನಗರಗಳಿಂದ ಮಲೇಷಿಯಾಗೆ ನೇರ ವಿಮಾನ ಯಾನ ಪ್ರಾರಂಭಿಸುವ ಇರಾದೆಯಿತ್ತು. ಆದರೆ ಏರ್‌ ಇಂಡಿಯಾ ಮುಂದಿನ ವರ್ಷ ಫೆಬ್ರವರಿಯಲ್ಲಿ ಯಾನ ಪ್ರಾರಂಭಿಸುವಂತೆ ಸೂಚಿಸಿತು. ಕಳೆದ 10 ವರ್ಷಗಳಿಂದ ಎರಡೂ ದೇಶಗಳ ನಡುವೆ ನೇರ ವಿಮಾನ ಸಂಚಾರ ಪ್ರಾರಂಭಿಸಬೇಕೆಂಬ ಬೇಡಿಕೆಗೆ ಅಸ್ತು ಸಿಕ್ಕಿರಲಿಲ್ಲ. ಈಗ ಇದಕ್ಕೆ ಸಮ್ಮತಿ ಸಿಕ್ಕಿರುವುದರಿಂದ 9 ನೇರ ವಿಮಾನಗಳು ಭಾರತದಿಂದ ಮಲೇಷಿಯಾಗೆ ಹಾರಲಿವೆ.

ಕಳೆದ ವರ್ಷ ಭಾರತದಿಂದ ಕೇವಲ 40 ಸಾವಿರ ಪ್ರವಾಸಿಗರು ಮಲೇಷಿಯಾಗೆ ಭೇಟಿ ಕೊಟ್ಟಿದ್ದರು. ಈ ವರ್ಷ ಸರಿ ಸುಮಾರು 1 ಲಕ್ಷ ಭಾರತೀಯರು ನಮ್ಮ ದೇಶಕ್ಕೆ ಭೇಟಿ ನೀಡಿದ್ದಾರೆ. ಹೊಸ ವಿಮಾನಗಳ ಸಂಚಾರದಿಂದ ಈ ಸಂಖ್ಯೆ ಬರುವ ವರ್ಷ ಮುಪ್ಪಟ್ಟಾಗುವ ನಿರೀಕ್ಷೆಯಿದೆ ಎಂದು ಅಬ್ದುಲ್‌ ಹೇಳಿದರು.

ವೀಸಾ ವಿತರಣೆ ಪ್ರಕ್ರಿಯೆಯನ್ನು ಮಲೇಷಿಯಾ ಸರ್ಕಾರ ಸರಳಗೊಳಿಸುತ್ತಿದೆ. ಬೆಂಗಳೂರು ಹಾಗೂ ಹೈದರಾಬಾದ್‌ಗಳಲ್ಲಿ ಪ್ರವಾಸೋದ್ಯಮ ಕಚೇರಿಗಳನ್ನು ತೆರೆಯುವ ಉದ್ದೇಶವನ್ನೂ ಹೊಂದಿದೆ. ಪ್ರಸ್ತುತ ದೆಹಲಿ ಮತ್ತು ಚೆನ್ನೈಗಳಲ್ಲಿ ಮಾತ್ರ ಮಲೇಷಿಯಾ ಪ್ರವಾಸಕ್ಕೆ ವೀಸಾ ವಿತರಿಸುವ ಕೇಂದ್ರಗಳಿವೆ. ಪ್ರವಾಸಿಗರನ್ನು ಆಕರ್ಷಿಸಲು ಮಲೇಷಿಯಾದಲ್ಲಿ ಶಾಪಿಂಗ್‌ ಮೇಳಗಳನ್ನೂ ಆಯೋಜಿಸಲಿದ್ದೇವೆ ಎಂದು ಫದ್ಜಿರ್‌ ವಿವರಿಸಿದರು.

(ಐ ಎ ಎನ್‌ ಎಸ್‌)