1 ತಿಂಗಳಲ್ಲಿ ಸರ್ಕಾರಿ ಹೈಸ್ಕೂಲುಗಳಲ್ಲಿ ಐಟಿ ಶಿಕ್ಷಣ ಜಾರಿ

ಬೆಂಗಳೂರು : ರಾಜ್ಯದ 1 ಸಾವಿರ ಸರ್ಕಾರಿ ಪ್ರೌಢ ಶಾಲೆಗಳಲ್ಲಿ ಮಾಹಿತಿ ತಂತ್ರಜ್ಞಾನ ಶಿಕ್ಷಣ ನೀಡುವ ಯೋಜನೆ ಇನ್ನೊಂದು ತಿಂಗಳಲ್ಲಿ ಜಾರಿಗೆ ಬರುವ ನಿರೀಕ್ಷೆಯಿದೆ ಎಂದು ಐಟಿ ಇಲಾಖೆ ನಿರ್ದೇಶಕ ಇ.ವಿ.ರಮಣರೆಡ್ಡಿ ಭಾನುವಾರ ತಿಳಿಸಿದ್ದಾರೆ.

ಬೆಂಗಳೂರು ಐಟಿ ಡಾಟ್‌ ಕಾಂ ಮೇಳದ ಸಂದರ್ಭದಲ್ಲಿ ಕಂಠೀರವ ಒಳಾಂಗಣ ಕ್ರೀಡಾಂಗಣದಲ್ಲಿ ನಡೆದ ಸ್ಟೂಡೆಂಟ್ಸ್‌ ಇಂಟರ್‌ನೆಟ್‌ ವರ್ಲ್ಡ್‌ ಕಾರ್ಯಕ್ರಮದ ಕೊನೆ ದಿನ ಐಟಿ ನಿರ್ದೇಶಕರು ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡುತ್ತಿದ್ದರು. ಆ್ಯಪ್‌ಟೆಕ್‌, ಎಜುಕಾಮ್‌ ಮತ್ತು ಎನ್‌ಐಐಟಿ ಸಂಸ್ಥೆಗಳಿಗೆ ಐಟಿ ಶಿಕ್ಷಣದ ಉಸ್ತುವಾರಿ ವಹಿಸಲಾಗಿದ್ದು, ಎಲ್ಲಾ 745 ಹೋಬಳಿಗಳ 1 ಸಾವಿರ ಪ್ರೌಢಶಾಲೆಗಳ ಶಿಕ್ಷಕರಿಗೆ ಹಾಗೂ ವಿದ್ಯಾರ್ಥಿಗಳಿಗೆ ತರಬೇತಿ ನೀಡಲಿವೆ.

ಮೂವತ್ತು ಕೋಟಿ ರುಪಾಯಿಯ ಈ ಯೋಜನೆಯಲ್ಲಿ ಶಾಲೆಗಳಲ್ಲಿ ಕಂಪ್ಯೂಟರ್‌ ಕೊಠಡಿ ನಿರ್ಮಾಣಕ್ಕೆ 40- 50 ಸಾವಿರ ರುಪಾಯಿ ಈಗಾಗಲೇ ಬಿಡುಗಡೆ ಮಾಡಲಾಗಿದೆ. ಇನ್ನು 5 ವರ್ಷಗಳ ಕಾಲ ಮೂರೂ ಸಂಸ್ಥೆಗಳು ತರಬೇತಿ ಉಸ್ತುವಾರಿ ನೋಡಿಕೊಳ್ಳಲಿದ್ದು, ಪ್ರತಿ ಮೂರು ತಿಂಗಳಿಗೆ 10 ಸಾವಿರ ರುಪಾಯಿ ತರಬೇತಿ ವೆಚ್ಚವನ್ನು ಸರ್ಕಾರ ನೀಡಲಿದೆ.

ನೂರ ಐವತ್ತು ವಿದ್ಯಾರ್ಥಿಗಳಿರುವ ಶಾಲೆಗೆ 5 ಕಂಪ್ಯೂಟರ್‌ ಹಾಗೂ ಒಂದು ಸರ್ವರ್‌, 250 ವಿದ್ಯಾರ್ಥಿಗಳಿರುವ ಶಾಲೆಗೆ 9 ಕಂಪ್ಯೂಟರ್‌ ಮತ್ತು 250ಕ್ಕೂ ಹೆಚ್ಚು ವಿದ್ಯಾರ್ಥಿಗಳಿರುವ ಶಾಲೆಗೆ 14 ಕಂಪ್ಯೂಟರ್‌ ಒದಗಿಸಲಾಗುವುದು.

(ಇನ್ಫೋ ವಾರ್ತೆ)

ವಾರ್ತಾ ಸಂಚಯ
ಮುಖಪುಟ / ಬೆಂಗಳೂರು ಐಟಿ.ಕಾಂ