ಐಸ್ಟೇಷನ್‌ ಇದ್ದರೆ ಈ-ಮೇಯ್ಲ್‌ ಕಳಿಸಲು ಕಂಪ್ಯೂಟರ್‌ ಬೇಡ

ಬೆಂಗಳೂರು : ಇನ್ನು ಮುಂದೆ ಈ ಮೇಯ್ಲ್‌ ಕಳುಹಿಸಲು ನಿಮಗೆ ಕಂಪ್ಯೂಟರ್‌ ಮತ್ತು ಇಂಟರ್‌ನೆಟ್‌ಗಳ ಅಗತ್ಯವಿಲ್ಲ. ಐ-ಸ್ಟೇಷನ್‌ ಎಂಬ ಪುಟ್ಟ ಬ್ರೀಫ್‌ ಕೇಸಿನ ಗಾತ್ರದ, ಹಗುರ ಉಪಕರಣದ ಮೂಲಕ ನಿಮ್ಮ ಸ್ನೇಹಿತರಿಗೆ ಈ- ಮೇಯ್ಲ್‌ ಮಾಡಬಹುದು. ಅವರು ಕಳುಹಿಸಿರುವ ಸಂದೇಶವನ್ನು ನೋಡಬಹುದು.

ಐ ಸ್ಟೇಷನ್‌ ಉಪಕರಣವನ್ನು ನಗರದ ಐನೇಬರ್ಸ್‌ ಕಂಪೆನಿ ಅಭಿವೃದ್ಧಿ ಪಡಿಸಿದೆ. ಹಿಂದಿ, ಕನ್ನಡ ಮತ್ತು ಇಂಗ್ಲಿಷ್‌ನಲ್ಲಿ ಈ- ಮೇಯ್ಲ್‌ ಕಳುಹಿಸುವ ಸೌಲಭ್ಯ ಸದ್ಯಕ್ಕಿದೆ. ಒಂದು ರೂಪಾಯಿ ವೆಚ್ಚದಲ್ಲಿ ಈ- ಮೇಯ್ಲ್‌ ಕಳುಹಿಸಲು ಸಾಧ್ಯವಾಗುವ ಈ ಉಪಕರಣ ಜನಸಾಮಾನ್ಯರ ಕೈಗೆಟುವಂತಿದ್ದು , ಇನ್ನೊಂದೆರಡು ತಿಂಗಳಿನಲ್ಲಿ ಧ್ವನಿ ಸಂದೇಶ ಕಳುಹಿಸುವ ತಂತ್ರಜ್ಞಾನವನ್ನೂ ಅಭಿವೃದ್ಧಿ ಪಡಿಸಲಾಗುವುದು ಎಂದು ಐ-ನೇಬರ್ಸ್‌ ಕಂಪೆನಿಯ ಕಾರ್ಯಾಧ್ಯಕ್ಷ , ಎಕ್ಸೋಡಸ್‌ ಕಮ್ಯೂನಿಕೇಷನ್ಸ್‌ ಮೂಲಕ ಉದ್ಯಮಿಯಾಗಿ ಗುರುತಿಸಿ ಕೊಂಡಿರುವ ಬಿ.ವಿ. ಜಗದೀಶ್‌ ಹೇಳುತ್ತಾರೆ.

ಪ್ರಸ್ತುತ ಈ ಸೌಲಭ್ಯ ಬೆಂಗಳೂರಿನಲ್ಲಿ ಮಾತ್ರ ಲಭ್ಯವಿದ್ದು , ಕ್ರಮೇಣ ಗ್ರಾಮೀಣ ಪ್ರದೇಶಗಳಿಗೂ ವಿಸ್ತರಿಸಲಾಗುವುದು. ಉಪಕರಣದ ಬೆಲೆ 7,000 ರೂಪಾಯಿ. ಗೃಹ ಬಳಕೆಯವರಿಗಾದರೆ 100 ರೂಪಾಯಿ ಮತ್ತು ಪಿಸಿಒ ವ್ಯಾಪಾರಸ್ಥರಿಗೆ 50 ರೂಪಾಯಿ ಶುಲ್ಕವಿದೆ. ಟೆಲಿಫೋನ್‌ ಬೂತ್‌ಗಳಲ್ಲಿ ಈ ಉಪಕರಣವನ್ನು ಅಳವಡಿಸಬಹುದಾದ್ದರಿಂದ ಅಂತರರಾಷ್ಟ್ರೀಯ ಕರೆಗಳ ದರವೂ ಉಳಿತಾಯವಾಗುತ್ತದೆ.

(ಇನ್ಫೋ ವಾರ್ತೆ)