ಚರ್ಚ್‌ ಸ್ಫೋಟ ಪ್ರಕರಣದಲ್ಲಿ 31 ಮಂದಿ ವಿರುದ್ಧ ಆರೋಪ ಪಟ್ಟಿ

ಬೆಂಗಳೂರು : ರಾಜ್ಯದ ಮೂರು ಚರ್ಚ್‌ಗಳಲ್ಲಿ ನಡೆದ ಬಾಂಬ್‌ ಸ್ಫೋಟಕ್ಕೆ ಸಂಬಂಧಿಸಿದಂತೆ 31 ಆರೋಪಿಗಳ ವಿರುದ್ಧ ಆರೋಪ ಪಟ್ಟಿ ಸಲ್ಲಿಸಲಾಗಿದೆ ಎಂದು ಡಿ.ಜಿ.ಪಿ ವಿ.ವಿ. ಭಾಸ್ಕರನ್‌ ತಿಳಿಸಿದ್ದಾರೆ.

ಜೂನ್‌ 8ರಂದು ವಾಡಿಯ ಸೇಂಟ್‌ ಆ್ಯನ್ಸ್‌ ಕ್ಯಾಥೋಲಿಕ್‌ ಚರ್ಚ್‌ನಲ್ಲಿನ ಸ್ಫೋಟಕ್ಕೆ ಸಂಬಂಧಿಸಿದಂತೆ 19 ಆರೋಪಿಗಳು, ಜುಲೈ 8ರಂದು ಹುಬ್ಬಳ್ಳಿಯ ಸೇಂಟ್‌ ಜಾನ್‌ ಲೂರ್ಥನ್‌ನಲ್ಲಿ ನಡೆದ ಸ್ಫೋಟಕ್ಕೆ ಸಂಬಂಧಿಸಿ 16 ಮಂದಿ ಮತ್ತು ನಗರರದ ಜೆ.ಜೆ ನಗರದಲ್ಲಿರುವ ಸೇಂಟ್‌ ಪೀಟರ್‌ ಹಾಗೂ ಪಾಲ್‌ ಚರ್ಚ್‌ಗಳಲ್ಲಿ ಜುಲೈ 9ರಂದು ನಡೆದ ಸ್ಫೋಟಕ್ಕೆ ಸಂಬಂಧಿಸಿದಂತೆ 18 ಮಂದಿ ವಿರುದ್ಧ ಆಯಾ ವ್ಯಾಪ್ತಿಯ ನ್ಯಾಯಾಲಯಗಳಲ್ಲಿ ಆರೋಪ ಪಟ್ಟಿ ಸಲ್ಲಿಸಲಾಗಿದೆ.

31 ಆರೋಪಿಗಳಲ್ಲಿ 27ಮಂದಿಯನ್ನು ಬಂಧಿಸಲಾಗಿದ್ದು, ಮೂರು ಪ್ರಕರಣಗಳು ಒಂದಕ್ಕೊಂದು ಸಂಬಂಧಿಸಿವೆ. ಕೆಲವು ಆರೋಪಿಗಳ ಎರಡು, ಮೂರು ಪ್ರಕರಣಗಳಲ್ಲೂ ಭಾಗಿಯಾಗಿರುವುದರಿಂದ ತನಿಖೆಗೆ ಅನುಕೂಲವಾಗುವಂತೆ ವಿಶೇಷ ನ್ಯಾಯಾಲಯ ಸ್ಥಾಪಿಸಬೇಕೆಂಬ ಸಿಓಡಿ ಪೋಲೀಸರ ಪ್ರಸ್ತಾವವನೆ ಇಟ್ಟಿದ್ದಾರೆ. ಪ್ರಸ್ತಾವನೆಯನ್ನು ಸರಕಾರ ಪರಿಶೀಲಿಸುವುದೆಂದು ಪತ್ರಿಕಾಗೋಷ್ಠಿಯಲ್ಲಿ ಹಾಜರಿದ್ದ ಗೃಹಸಚಿವ ಮಲ್ಲಿಕಾರ್ಜುನ ಖರ್ಗೆ ತಿಳಿಸಿದ್ದಾರೆ.

ಇಂಟರ್‌ಪೋಲ್‌ ನೆರವು : ಕರ್ನಾಟಕ, ಆಂಧ್ರಪ್ರದೇಶ ಮತ್ತು ಗೋವಾಗಳಲ್ಲಿ ಸಂಭವಿಸಿದ ಚರ್ಚ್‌ ಸ್ಫೋಟ ಪ್ರಕರಣಗಳಲ್ಲಿ ಪ್ರಮುಖ ಭಾಗಿಗಳಾಗಿರುವ ಸೈಯದ್‌ ಜಿಯಾ ಉಲ್‌ ಹಸನ್‌ ಮತ್ತು ಆತನ ಮೂವರು ಮಕ್ಕಳು ಪಾಕಿಸ್ತಾನದಲ್ಲಿದ್ದಾರೆ. ಭಾರತ ಮತ್ತು ಪಾಕಿಸ್ತಾನ ನಡುವೆ ಆರೋಪಿಗಳ ವಿನಿಮಯ ಇಲ್ಲದಿರುವುದರಿಂದ ಆರೋಪಿಗಳ ಬಂಧನಕ್ಕೆ ಇಂಟರ್‌ಪೋಲ್‌ ನೆರವು ಕೋರಲು ನಿರ್ಧರಿಸಲಾಗಿದೆ ಎಂದು ಭಾಸ್ಕರ್‌ ತಿಳಿಸಿದ್ದಾರೆ.

(ಇನ್ಫೋ ವರದಿ)