ಶಿರಸಿ ಅಭಿವೃದ್ಧಿಗೆ ಸಂಸದರ ನಿಧಿಯಿಂದ 33 ಲಕ್ಷ ರು

ಕಾರವಾರ : ಶಿರಸಿಯಲ್ಲಿ ರಂಗಮಂದಿರ, ಯುವಕ ಮಂಡಳ ಕಟ್ಟಡ, ಅಂಗನವಾಡಿ ಕಟ್ಟಡ ಸೇರಿದಂತೆ ಶಿರಸಿ ವಿಭಾಗಾಭಿವೃದ್ಧಿಗೆ ಸಂಸದರ ನಿಧಿಯಿಂದ 33 ಲಕ್ಷ ರುಪಾಯಿ ಬಿಡುಗಡೆ ಮಾಡಲಾಗಿದೆ ಎಂದು ಸಂಸದರ ಕಾರ್ಯಾಲಯದ ಮೂಲಗಳು ತಿಳಿಸಿವೆ.

ವೊಡ್ನ ಕೊಪ್ಪದಿಂದ ಬಿದ್ರಳ್ಳಿಗೆ ಹೋಗಲು ಅತ್ಯಗತ್ಯವಾದ ಕಾಲು ಸೇತುವೆ ನಿರ್ಮಾಣಕ್ಕಾಗಿ 2.50 ಲಕ್ಷ ರುಪಾಯಿ, ಪಂಡಿತ ಸಾರ್ವಜನಿಕ ಆಸ್ಪತ್ರೆಯ ಟಿ.ಬಿ. ವಾರ್ಡ್‌ ನಿರ್ಮಾಣಕ್ಕಾಗಿ 4 ಲಕ್ಷ ರುಪಾಯಿ ಹಾಗೂ ನಗರದ 9 ನೇ ವಾರ್ಡ್‌ನ ಕುಡಿಯುವ ನೀರಿನ ಯೋಜನೆಗೆ 2 ಲಕ್ಷ ರುಪಾಯಿ ಮಂಜೂರು ಮಾಡಲಾಗಿದೆ ಎಂದು ಮೂಲಗಳು ತಿಳಿಸಿವೆ.

ಆದರೆ, ಜಿಲ್ಲೆಯ ಅಭಿವೃದ್ಧಿಗಾಗಿ ಸಂಸದರ ನಿಧಿಯಿಂದ ಈವರೆಗೆ ಬಿಡುಗಡೆ ಮಾಡಲಾಗಿರುವ 5 ಕೋಟಿ 10 ಲಕ್ಷ ರುಪಾಯಿಗಳಲ್ಲೇ ಈ ಮೊತ್ತವೂ ಸೇರಿದೆಯೇ ಎಂಬುದನ್ನು ಮೂಲಗಳ ಖಚಿತ ಪಡಿಸಿಲ್ಲ.