ಶಾಲಾ ಕಾಲೇಜುಗಳಲ್ಲಿ ಕ್ರೀಡಾ ವಿಷಯ ಕಡ್ಡಾಯ:ಸರ್ಕಾರದ ಉದ್ದೇಶ

ಬೆಂಗಳೂರು : ರಾಜ್ಯದ ಶಾಲಾ ಕಾಲೇಜುಗಳಲ್ಲಿ ಕ್ರೀಡಾ ವಿಷಯವನ್ನು ಕಡ್ಡಾಯ ಮಾಡಲು ಉದ್ದೇಶಿಸಲಾಗಿದೆ ಎಂದು ಯುವಜನ ಸೇವಾ ಮತ್ತು ಕ್ರೀಡಾ ಸಚಿವ ಮಲ್ಲಿಕಾರ್ಜುನ ಶುಕ್ರವಾರ ತಿಳಿಸಿದ್ದಾರೆ.

ಸುದ್ದಿಗೋಷ್ಠಿಯಲ್ಲಿ ಮಾತನಾಡುತ್ತಿದ್ದ ಅವರು, ಕ್ರೀಡೆಯನ್ನು 100 ಅಂಕಗಳ ಒಂದು ಪಠ್ಯ ವಿಷಯವನ್ನಾಗಿ ಶಿಕ್ಷಣದಲ್ಲಿ ಅಳವಡಿಸುವ ಉದ್ದೇಶವಿದೆ. ಇದಲ್ಲದೆ ರಾಷ್ಟ್ರ ಮಟ್ಟದ ಕ್ರೀಡಾ ಕೂಟಗಳಲ್ಲಿ ಸ್ಪರ್ಧಿಸಿದ ಪಟುಗಳಿಗೆ ಅರ್ಹತೆಗೆ ಅನುಗುಣವಾಗಿ ಮೊದಲ ಇಲ್ಲವೇ ಎರಡನೇ ದರ್ಜೆ ಸರ್ಕಾರಿ ಹುದ್ದೆಗಳಲ್ಲಿ ಶೇ. 2ರಷ್ಟು ಮೀಸಲಾತಿ ನೀಡುವುದರ ಬಗೆಗೂ ಯೋಚಿಸಲಾಗುತ್ತಿದೆ ಎಂದರು.

ಸ್ವರ್ಣಬಿಂದು ತರಬೇತಿ ಕೇಂದ್ರ: ಕ್ರೀಡೆಗೆ ಒತ್ತು ಕೊಡಲು ನಗರದ ಚಿನ್ನ ಸ್ವಾಮಿ ಕ್ರೀಡಾಂಗಣದಲ್ಲಿ ಸ್ವರ್ಣಬಿಂದು ಎಂಬ ಉನ್ನತ ಕ್ರೀಡಾ ತರಬೇತಿ ಕೇಂದ್ರವನ್ನು ತೆರೆಯಲಾಗುವುದು ಎಂದು ಹೇಳಿದರು.

ಪ್ರತಿ ಜಿಲ್ಲೆಗೂ ಕ್ರೀಡಾ ಪ್ರಾಧಿಕಾರ : ಕ್ರೀಡಾ ಚಟುವಟಿಕೆಗೆ ಪ್ರಾಶಸ್ತ್ಯ ನೀಡಲು ಪ್ರತಿಯಾಂದು ಜಿಲ್ಲೆಯಲ್ಲೂ ಜಿಲ್ಲಾ ಕ್ರೀಡಾ ಪ್ರಾಧಿಕಾರ ರಚಿಸಲಾಗುವುದು. ಕರ್ನಾಟಕದ 62 ತಾಲ್ಲೂಕುಗಳಲ್ಲಿ ಕ್ರೀಡಾಂಗಣಗಳನ್ನು ನಿರ್ಮಿಸುವ ಯೋಜನೆಯೂ ಜಾರಿಗೆ ಬರಲಿದೆ ಎಂದು ತಿಳಿಸಿದರು.

(ಇನ್ಫೋ ವಾರ್ತೆ)