ಹ್ಯಾನ್ಸಿ ಕ್ರೋನಿಯೆಗೆ ಜೀವನ ಪರ್ಯಂತ ನಿಷೇಧ
ಕೇಪ್ಟೌನ್ : ಮೋಸದಾಟ ಆಡಿ, ತಪ್ಪೊಪ್ಪಿಕೊಂಡು, ಜನರ ಮರುಕ ಗಿಟ್ಟಿಸಿದ ದಕ್ಷಿಣ ಆಫ್ರಿಕ ಕ್ರಿಕೆಟ್ ತಂಡದ ಮಾಜಿ ನಾಯಕ ಹ್ಯಾನ್ಸಿ ಕ್ರೋನಿಯೆ ಜೀವನ ಪರ್ಯಂತ ಪ್ರಥಮ ದರ್ಜೆ ಕ್ರಿಕೆಟ್ ಆಡುವಂತಿಲ್ಲ. ಯುನೈಟೆಡ್ ಕ್ರಿಕೆಟ್ ಮಂಡಳಿ (ಯು ಸಿ ಬಿ) ಮಂಗಳವಾರ ಈ ಕುರಿತ ಆದೇಶ ಹೊರಡಿಸಿದ್ದು, ಕ್ರೋನಿಯೆ ಕ್ಷಮಾದಾನದ ಬಗೆಗಿದ್ದ ನಿರೀಕ್ಷೆಗಳು ಹುಸಿಯಾಗಿವೆ.
ಮಂಡಳಿ ಹೊರಡಿಸಿರುವ ಆದೇಶದನ್ವಯ, ಯು ಸಿ ಬಿ ನಡೆಸುವ ಪ್ರಥಮ ದರ್ಜೆ ಕ್ರಿಕೆಟ್ ಸೇರಿದಂತೆ ಯಾವುದೇ ಅಂತರರಾಷ್ಟ್ರೀಯ ಕ್ರಿಕೆಟ್ ಪಂದ್ಯದಲ್ಲಿ ಕ್ರೋನಿಯೆ ಆಡುವಂತಿಲ್ಲ ಹಾಗೂ ಕ್ರಿಕೆಟ್ ಸಂಬಂಧಿತ ಚಟುವಟಿಕೆಗಳಲ್ಲಿ ತೊಡಗಿಕೊಳ್ಳುವಂತಿಲ್ಲ. ಮಂಗಳವಾರ ದಕ್ಷಿಣ ಆಫ್ರಿಕದ ಯುನೈಟೆಡ್ ಕ್ರಿಕೆಟ್ ಮಂಡಳಿಯ ಸಾಮಾನ್ಯ ಸಭೆಯಲ್ಲಿ ಈ ನಿರ್ಣಯ ಕೈಗೊಳ್ಳಲಾಯಿತು.
ಸಾಮರ್ಥ್ಯಕ್ಕಿಂತ ಕಳಪೆ ಆಟ ಆಡಲು ಹಾಗೂ ಪಂದ್ಯಗಳ ಬಗೆಗೆ ಮಾಹಿತಿ ನೀಡಲು 1996ರಿಂದ 2000ದವರೆಗೆ 5 ಬಾರಿ ವಿವಿಧ ಬುಕ್ಕಿಗಳಿಂದ ಸಾವಿರಾರು ಡಾಲರ್ ಹಣ ಪಡೆದಿರುವುದಾಗಿ ಜೂನ್ ತಿಂಗಳಲ್ಲಿ ಕಿಂಗ್ ಆಯೋಗಕ್ಕೆ ಕ್ರೋನಿಯೆ ತಿಳಿಸಿದ್ದರು. ತಮ್ಮ ಸಹ ಆಟಗಾರರಿಗೂ ಹಣದ ಆಮಿಷ ಒಡ್ಡಿದ್ದರು.
ದಕ್ಷಿಣ ಆಫ್ರಿಕದಲ್ಲಿ ಮ್ಯಾಚ್ಫಿಕ್ಸಿಂಗ್ ತನಿಖೆ ನಡೆಸುತ್ತಿರುವ ಕಿಂಗ್ ಆಯೋಗ ತನ್ನ ನಿರ್ಧಾರವನ್ನು ಹಾಗೂ ಶಿಫಾರಸುಗಳನ್ನು ನವೆಂಬರ್ ಹೊತ್ತಿಗೆ ಪ್ರಕಟ ಪಡಿಸುವ ನಿರೀಕ್ಷೆಯಿದೆ. ಮಂಡಳಿಯ ಸಾಮಾನ್ಯ ಸಭೆಯ ನಿರ್ಧಾರದ ಬಗೆಗೆ ಏನಾದರೂ ಮನವಿ ಸಲ್ಲಿಸಬೇಕಾಗಿದ್ದಲ್ಲಿ, 7 ದಿನಗಳೊಳಗೆ ಸಲ್ಲಿಸುವಂತೆ ಕ್ರೋನಿಯೆಗೆ ಆದೇಶ ನೀಡಲಾಗಿದೆ.
(ಇನ್ಫೋ ವಾರ್ತೆ)