ಆದಿ ಚುಂಚನಗಿರಿ ಮಠಕ್ಕೆ ಬಾಂಬ್‌ ಬೆದರಿಕೆ : ಬಿಗಿ ಬಂದೋಬಸ್ತ್‌

ಮಂಡ್ಯ : ಮಂಡ್ಯ ಜಿಲ್ಲೆಯಲ್ಲಿರುವ ಶ್ರೀ ಆದಿಚುಂಚನಗಿರಿ ಶ್ರೀಮಠವನ್ನು ಬಾಂಬ್‌ ಹಾಕಿ ಸ್ಫೋಟಿಸುವುದಾಗಿ ಅನಾಮಧೇಯ ಕರೆ ಬಂದ ಹಿನ್ನೆಲೆಯಲ್ಲಿ ಶ್ರೀಮಠಕ್ಕೆ ಹಾಗೂ ಮಠ ನಡೆಸುತ್ತಿರುವ ಆಸ್ಪತ್ರೆ, ವೈದ್ಯಕೀಯ ಕಾಲೇಜು ಹಾಗೂ ಆಡಳಿತ ಕಚೇರಿಗೆ ಬಿಗಿ ಪೊಲೀಸ್‌ ಬಂದೋಬಸ್ತ್‌ ಮಾಡಲಾಗಿದೆ.

ಬೆಂಗಳೂರು, ಹುಬ್ಬಳ್ಳಿ - ವಾಡಿ ಚರ್ಚ್‌ಗಳಲ್ಲಿ ಸರಣಿ ಬಾಂಬ್‌ ಸ್ಫೋಟ ನಡೆದ ತರುವಾಯ ಬೆಂಗಳೂರಿನ ಹಲವು ಶಾಲೆಗಳಲ್ಲಿ ಬಾಂಬ್‌ ಇಡಲಾಗಿದೆ ಎಂಬ ಹುಸಿ ಕರೆಗಳು ಬಂದಿದ್ದವು. ಆದರೆ, ಶ್ರೀ ಮಠಕ್ಕೇ ಬಾಂಬ್‌ ಹಾಕುವ ಅನಾಮಧೇಯ ಕರೆ ಶನಿವಾರ ರಾತ್ರಿ ಬಂದಿದೆ.

ಬಾಂಬ್‌ ಕರೆಯಿಂದ ಭೀತರಾದ ಮಠದ ಆಡಳಿತ ಕಚೇರಿಯ ಸಿಬ್ಬಂದಿ ವಿಷಯವನ್ನು ಕೂಡಲೇ ಪೊಲೀಸ್‌ ಮಹಾ ನಿರ್ದೇಶಕರಿಗೆ ತಿಳಿಸಿದರು. ತತ್‌ಕ್ಷಣವೇ ಮಠಕ್ಕೆ ಪೊಲೀಸ್‌ ಕಾವಲು ಹಾಕಲಾಯಿತು. ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ಕೆ.ಎಸ್‌. ಆರ್‌. ಚರಣರೆಡ್ಡಿ ಅವರ ನೇತೃತ್ವದಲ್ಲಿ ಹಿರಿಯ ಪೊಲೀಸ್‌ ಅಧಿಕಾರಿಗಳು ಕಟ್ಟೆಚ್ಚರ ವಹಿಸಿದ್ದು, 25ಕ್ಕೂ ಹೆಚ್ಚು ಪೊಲೀಸರನ್ನು ಸಂಸ್ಥೆಯ ರಕ್ಷಣೆಗೆ ನಿಯೋಜಿಸಲಾಗಿದೆ.