ಮೈಸೂರು ಮೃಗಾಲಯದ ಗೋರಿಲ್ಲಾ ಸಾವು

ಮೈಸೂರು :ಅರಮನೆಗಳ ನಗರಿ ಮೈಸೂರಿನ ಶ್ರೀ ಜಯಚಾಮರಾಜೇಂದ್ರ ಮೃಗಾಲಯದಲ್ಲಿ ಬುಧವಾರ ಸ್ಮಶಾನ ಮೌನ ಆವರಿಸಿತ್ತು. ಮೃಗಾಲಯದ ಸಿಬ್ಬಂದಿಯ ಕಣ್ಣುಗಳಲ್ಲಿ ನೀರು ತುಂಬಿತ್ತು. 25 ವರ್ಷಗಳಿಂದಲೂ ಎಲ್ಲರ ಪ್ರೀತಿಗೆ ಪಾತ್ರವಾಗಿದ್ದ 35 ವರ್ಷದ ಗೋರಿಲ್ಲಾ ಸುಮತಿ ಇನ್ನಿಲ್ಲ ಎಂಬುದು ಎಲ್ಲರಿಗೂ ಆಘಾತ ಉಂಟುಮಾಡಿತ್ತು.

1977ರಲ್ಲಿ ಪಶ್ಚಿಮ ಜರ್ಮನಿಯಿಂದ ಮೈಸೂರಿನ ಮೃಗಾಲಯಕ್ಕೆ ತಂದಿದ್ದ ಈ ಗೋರಿಲ್ಲಾ ತನ್ನ ಕೋತಿಯಾಟದಿಂದ ಎಲ್ಲರ ಮನಗೆದ್ದಿತ್ತು. ಈ ವಿಷಯವನ್ನು ಬುಧವಾರ ಮೃಗಾಲಯದ ನಿರ್ದೇಶಕ ಎನ್‌. ರಾಜಶೇಖರ್‌ ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದರು. ಸುಮತಿ ತೀವ್ರ ಹೃದಯಾಘಾತದಿಂದ ಮೊದಲು ಕುಸಿದಳು. ಔಷಧೋಪಚಾರ ಮಾಡಿದರೂ ಕೂಡ ಚೇತರಿಸಿಕೊಳ್ಳದೆ ನರಳಿ ಅಸು ನೀಗಿದಳು ಎಂದು ನಿರ್ದೇಶಕರು ತಿಳಿಸಿದರು.

(ಮೈಸೂರು ಪ್ರತಿನಿಧಿಯಿಂದ)