ಅಪಹೃತ ಉದ್ಯಮಿ ನಾರಾಯಣ ಭಟ್‌ ಬಿಡುಗಡೆ, ಮೂವರ ಬಂಧನ

ಬೆಂಗಳೂರು : ಬುಧವಾರ ಬೆಳಗ್ಗೆ ಅಪಹೃತರಾಗಿದ್ದ ಉದ್ಯಮಿ ನಾರಾಯಣ ಭಟ್‌ ಅವರನ್ನು ಸುರಕ್ಷಿತವಾಗಿ ಬಿಡುಗಡೆಗೊಳಿಸುವಲ್ಲಿ ರಾಜ್ಯದ ಪೊಲೀಸರು ಯಶಸ್ವಿಯಾಗಿದ್ದಾರೆ. ಕೋಲಾರ ಜಿಲ್ಲೆ ವೇವಗಲ್‌ ತಾಲೂಕು ನರಸಾಪುರ ಠಾಣೆ ವ್ಯಾಪ್ತಿಯ ಲಕ್ಷ್ಮೀಸಾಗರ ಬಳಿ ಈ ಉದ್ಯಮಿಯನ್ನು ಅಪಹರಣಕಾರರಿಂದ ಪೊಲೀಸರು ಬಿಡುಗಡೆಗೊಳಿಸಿದ್ದಾರೆ.

ಈ ಸಂಬಂಧ ಮೂವರು ದುಷ್ಕರ್ಮಿಗಳನ್ನು ಬಂಧಿಸಲಾಗಿದೆ. ಇಬ್ಬರು ತಲೆ ತಪ್ಪಿಸಕೊಂಡಿದ್ದಾರೆ. ಪರಾರಿಯಾಗಿರುವ ಇಬ್ಬರ ಶೋಧ ಮುಂದುವರಿದಿದೆ. ಬುಧವಾರ ಬೆಳಗ್ಗೆ ವಾಯುವಿಹಾರಕ್ಕೆ ಹೊರಟಿದ್ದ ನಮಸ್ತೆ ಗಾರ್ಮೇಂಟ್ಸ್‌ನ ಮಾಲಿಕರಾದ ಕಂಡಿಗೆ ನಾರಾಯಣ ಭಟ್‌ ಅವರನ್ನು ಅಪಹರಿಸಿದ್ದ ದುಷ್ಕರ್ಮಿಗಳು ಅವರ ಬಿಡುಗಡೆಗೆ ಒಂದು ಕೋಟಿ ರುಪಾಯಿಗಳ ಬೇಡಿಕೆ ಇಟ್ಟಿದ್ದರು.

ಈ ಸಂಬಂಧ ಸುಬ್ರಹ್ಮಣ್ಯಪುರ ಪೊಲೀಸ್‌ ಠಾಣೆಯಲ್ಲಿ ಮೊಕದ್ದಮೆ ದಾಖಲಾಗಿತ್ತು. ಕೋಲಾರ ಜಿಲ್ಲೆಯ ಲಕ್ಷ್ಮೀಸಾಗರದ ಬಳಿ ಹಸಿರು ಮೆಟಡೋರ್‌ ವಾಹನ ಒಂದರಲ್ಲಿ ನಾರಾಯಣ ಭಟ್‌ ಅವರನ್ನು ದುಷ್ಕರ್ಮಿಗಳು ಇಟ್ಟುಕೊಂಡಿದ್ದಾರೆ ಎಂಬ ಸುಳಿವು ಗುರುವಾರ ಮಧ್ಯಾಹ್ನ 2.30ರ ಸಮಯದಲ್ಲಿ ನರಸಾಪುರ ಪೊಲೀಸರಿಗೆ ದೊರಕಿತು. ಆರೋಪಿಗಳು ನರಸಾಪುರ ಬಳಿಯ ಡಾಬಾ ಬಳಿ ಅನುಮಾನ್ಪದವಾಗಿ ಮೆಟಡೋರ್‌ ವಾಹನ ನಿಲ್ಲಿಸಿಕೊಂಡು ನಿಂತಿದ್ದರಿಂದ ಅನುಮಾನ ಬಂದು ಡಾಬಾ ಮಾಲಿಕ ಎಸ್‌. ಗೌಡ ಎನ್ನುವವರು ಪೊಲೀಸರಿಗೆ ಸುದ್ದಿ ಮುಟ್ಟಿಸಿದರು.

ಕೂಡಲೇ ಕಾರ್ಯಪ್ರವೃತ್ತರಾದ ಪೊಲೀಸರು ವೇಮಗಲ್‌ ಪೊಲೀಸ್‌ ಠಾಣೆಗೂ ಸುದ್ದಿ ಮುಟ್ಟಿಸಿದರು. ವೇಮಗಲ್‌ ಪೊಲೀಸರ ನೆರವಿನೊಂದಿಗೆ ಅಪಹರಣಕಾರರ ಪೈಕಿ ಮೂವರನ್ನು ಬಂಧಿಸುವಲ್ಲಿ ಪೊಲೀಸರು ಯಶಸ್ವಿಯಾದರು ಎಂದು ಪೊಲೀಸ್‌ ಅಧಿಕಾರಿ ಪೂವಯ್ಯ ಅವರು ತಿಳಿಸಿದ್ದಾರೆ.

ಬಂದಿತರನ್ನು ಆವಲಹಳ್ಳಿಯ ರವಿಕುಮಾರ್‌, ಕೋಣನಕುಂಟೆಯ ದಾಸ್‌ ಹಾಗೂ ಇಸ್ರೋ ಲೇಔಟ್‌ನ ಮಂಜು ಎಂದು ಗುರುತಿಸಲಾಗಿದೆ.

ಬುಧವಾರ ಬೆಳಗ್ಗೆ ನಾರಾಯಣ ಭಟ್‌ ಅವರನ್ನು ಅಪಹರಿಸಿದ ನಂತರ ದುಷ್ಕರ್ಮಿಗಳು ಅವರನ್ನು ಮೆಟಡೋರ್‌ ವಾಹನದಲ್ಲಿಯೇ ಬಂಧಿಸಿ ಬೆಂಗಳೂರು ಗ್ರಾಮಾಂತರ ಪ್ರದೇಶದಲ್ಲೇ ಸುತ್ತು ಹಾಕುತ್ತಿದ್ದರು. ಗುರುವಾರ ಬೆಳಗ್ಗೆ ಪತ್ರಿಕೆಗಳಲ್ಲಿ ಭಟ್‌ ಅಪಹರಣದ ಸುದ್ದಿ ಪ್ರಕಟವಾಗಿರುವ ವಿಷಯ ಹಾಗೂ ಪೊಲೀಸರು ಈ ಸಂಬಂಧ ಕಾರ್ಯೋನ್ಮುಖರಾಗಿದ್ದಾರೆ ಎನ್ನುವುದನ್ನು ಅರಿತ ಅಪಹರಣಕಾರರು ವಾಹನವನ್ನು ಕೋಲಾರದ ಕಡೆಗೆ ತಿರುಗಿಸಿದರು ಎಂದು ತಿಳಿಸಿರುವ ಪೊಲೀಸರು ಗುರುವಾರ ರಾತ್ರಿ 9.30ರ ಹೊತ್ತಿಗೆ ನಾರಾಯಣಭಟ್‌ ಅವರನ್ನು ಬೆಂಗಳೂರಿಗೆ ಕರೆತರಲಾಗುವುದು ಎಂದೂ ಹೇಳಿದ್ದಾರೆ.