15ರಿಂದ ಗಾಯನ ಸಮಾಜದ 32ನೇ ಸಂಗೀತ ಸಮ್ಮೇಳನ

ಬೆಂಗಳೂರು : ಮೈಸೂರು ದಸರೆಯ ಸಂಗೀತೋತ್ಸವಕ್ಕೆ ಹೋಗಲು ಆಗದ ಬೆಂಗಳೂರಿಗರು ನಿರಾಶೆ ಪಡುವ ಅಗತ್ಯ ಇಲ್ಲ. ವಿಜಯ ದಶಮಿಯ ಒಂದು ವಾರಕ್ಕೆ ಸರಿಯಾಗಿ ಬೆಂಗಳೂರು ಗಾಯನ ಸಮಾಜದ 32ನೇ ಸಂಗೀತ ಸಮ್ಮೇಳನ ಜರುಗಲಿದೆ. ಗಾನಸುಧೆಯ ಸವಿಯಲು ಅವಕಾಶ ದೊರಕಲಿದೆ.

ಅಕ್ಟೋಬರ್‌ 15ರಿಂದ 22ರವರೆಗೆ ಒಂದು ವಾರಗಳ ಕಾಲ ನಡೆಯುವ ಈ ಬಾರಿಯ ಸಂಗೀತ ಸಮ್ಮೇಳನದ ಅಧ್ಯಕ್ಷರನ್ನಾಗಿ ಹಿರಿಯ ಸಂಗೀತ ವಿದುಷಿ ಸೀತಾಲಕ್ಷ್ಮೀ ವೆಂಕಟೇಶನ್‌ ಅವರನ್ನು ಅವಿರೋಧವಾಗಿ ಆಯ್ಕೆ ಮಾಡಲಾಗಿದೆ. ಕೇರಳದ ಸಂಗೀತ ಸಂಪ್ರದಾಯ ಈ ಬಾರಿಯ ಸಮ್ಮೇಳನದ ವಿಷಯವಾಗಿರುತ್ತದೆ. ಈ ವಿಷಯವನ್ನು ಬೆಂಗಳೂರು ಗಾಯನ ಸಮಾಜದ ಅಧ್ಯಕ್ಷ ಎಚ್‌. ಕಮಲನಾಥ್‌ ಅವರು ತಿಳಿಸಿದ್ದಾರೆ.