ನಮ್ಮೂರ ನೆಲಕ್ಕೆ ಎಂಎ-ನ್‌-ಸಿ-ಗ-ಳ ಬೀಜ ಬೇಡ: ರೈತರ ಪ್ರತಿಭಟನೆ

ಬೆಂಗಳೂರು : ವಿಶ್ವ ವಾಣಿಜ್ಯ ಸಂಸ್ಥೆಯ ಒಪ್ಪಂದದ ಲಾಭ ಪಡೆದು ಬಹು ರಾಷ್ಟ್ರೀಯ ಕಂಪನಿಗಳು ಅಭಿವೃದ್ಧಿ ಪಡಿಸಿರುವ ಹೊಸ ತಳಿಯ ಬೀಜಗಳನ್ನು ಮಾರುಕಟ್ಟೆಗೆ ತಂದಿರುವುದನ್ನು ವಿರೋಧಿಸಿ ರೈತರು ನಗರದಲ್ಲಿ ಮಂಗಳವಾರ ಬೃಹತ್‌ ಪ್ರತಿಭಟನಾ ಮೆರವಣಿಗೆ ನಡೆಸಿದರು.

ಬಿತ್ತನೆ ಬೀಜಗಳ ಸ್ವಾಭಾವಿಕ ರೂಪವನ್ನು ಹಾಳುಗೆಡವಿ, ಭಾರತೀಯ ರೈತರ ಸಾಂಪ್ರದಾಯಿಕ ಆಚರಣೆಗೆ ಧಕ್ಕೆ ತರುತ್ತಿರುವ ಬಹುರಾಷ್ಟ್ರೀಯ ಕಂಪನಿಗಳನ್ನು ಎತ್ತಂಗಡಿ ಮಾಡಬೇಕು. ಅವು ಅಭಿವೃದ್ಧಿ ಪಡಿಸಿರುವ ಹೊಸ ತಳಿಯ ಬೀಜಗಳ ಉಪಯೋಗ ರೈತರ ಸ್ವಾಭಾವಿಕ ಹಕ್ಕಿ-ನ ಚ್ಯುತಿಗೆ ಕಾರಣವಾಗಿದೆ ಎಂದು ಮೆರವಣಿಗೆಯ ವಕ್ತಾರರು ಅಭಿಪ್ರಾಯಪಟ್ಟರು.

ಕೆಲವು ಸಂಘ ಸಂಸ್ಥೆಗಳ ಬೆಂಬಲದೊಂದಿಗೆ ಕರ್ನಾಟಕ ರಾಜ್ಯ ರೈತ ಸಂಘ ಮೆರವಣಿಗೆ ನಡೆಸಿತು. ಚಿಕ್ಕ ಲಾಲ್‌ಬಾಗ್‌ನಿಂದ ಹೊರಟ ಮೆರವಣಿಗೆ ಮಲ್ಲೇಶ್ವರಂ ಮೈದಾನದಲ್ಲಿ ಸಭೆ ಸೇರಿತು. ಮೆರವಣಿಗೆಯ ಮುಖಂಡರು ಸಭೆ ಉದ್ದೇಶಿಸಿ ಮಾತನಾಡಿದರು. ಪರಿಸರವಾದಿ ವಂದನಾ ಶಿವ, ಕರ್ನಾಟಕ ಹಿಂದುಳಿದ ವರ್ಗಗಳ ಸಮಿತಿ ಅಧ್ಯಕ್ಷ ರವಿವರ್ಮ ಕುಮಾರ್‌ ಮೆರವಣಿಯಲ್ಲಿ ಭಾಗವಹಿಸಿದ್ದ ಪ್ರಮುಖರು.

ಬಹುರಾಷ್ಟ್ರೀಯ ಕಂಪನಿಗಳನ್ನು ಎತ್ತಂಗಡಿ ಮಾಡಲು ಎರಡನೇ ಕ್ವಿಟ್‌ ಇಂಡಿಯಾ ಚಳವಳಿ ನಡೆಸಬೇಕು. ಭಾರತದ ಮಾರುಕಟ್ಟೆ ತುಂಬುತ್ತಿರುವ ಬಹುರಾಷ್ಟ್ರೀಯ ಕಂಪನಿಗಳ ಬಿತ್ತನೆ ಬೀಜಗಳು ದುಬಾರಿಯಾಗಿದ್ದು, ರೈತರು ಕೊಂಡುಕೊಳ್ಳದೇ ವಿಧಿಯಿಲ್ಲ ಎನ್ನುವಂತಾಗಿದೆ. ಸಾಲ ಸೋಲ ಮಾಡಿ ಮಾರುಕಟ್ಟೆಯಲ್ಲಿ ಕಾಸು ಸುರಿದು, ಹೊಲದಲ್ಲಿ ಬೀಜ ಚೆಲ್ಲುವ ರೈತರು ಬೆಳೆ ಹಾಳಾದಾಗ ಆತ್ಮಹತ್ಯೆ ಮಾಡಿಕೊಳ್ಳುವುದು ಸಾಮಾನ್ಯವಾಗುತ್ತಿದೆ ಎಂದು ಮೆರವಣಿಗೆಯಲ್ಲಿ ಭಾಗವಹಿಸಿದ್ದ ಪ್ರಮುಖರು ಹೇಳಿದರು.

ಇನ್ನು 10 ವರ್ಷಗಳ ಕಾಲ ಜೆನೆಟಿಕ್‌ ಎಂಜಿನಿಯರಿಂಗ್‌ನ ವಾಣಿಜ್ಯೀಕರಣವನ್ನು ರದ್ದುಪಡಿಸಬೇಕೆಂದು 2 ದಿನಗಳ ಕಾಲ ನಡೆದ ಬೀಜ ನ್ಯಾಯಮಂಡಳಿ ಒತ್ತಾಯಿಸಿದೆ.

(ಯುಎನ್‌ಐ)