ತೈಲಾಗಾರದ ಪೈಪ್‌ಲೈನ್‌ ಯೋಜನೆಗೆ ವಿರೋಧ

ಮಂಗಳೂರು :ಪೈಪ್‌ಲೈನ್‌ ಮೂಲಕ ತೈಲ ಸಾಗಿಸುವ ಯೋಜನೆಗೆ ಭಾರಿ ವಿರೋಧ ಕೇಳಿಬಂದಿದೆ. ಈ ಸಂಬಂಧ ಸೋಮವಾರ ದಕ್ಷಿಣ ಕನ್ನಡ ಜಿಲ್ಲಾಧಿಕಾರಿಗಳ ಕಚೇರಿಯಲ್ಲಿ ನಡೆದ ಸಭೆಯಲ್ಲಿ ಮಂಗಳೂರು ತೈಲಾಗಾರದ ಉತ್ಪನ್ನಗಳನ್ನು ರೈಲು ಮಾರ್ಗದ ಮೂಲಕವೇ ಸಾಗಿಸಬೇಕು ಎಂದು ಎಚ್‌ಪಿಸಿಎಲ್‌ ಪೈಪ್‌ಲೈನ್‌ ಸಂತ್ರಸ್ತರು ಪಟ್ಟು ಹಿಡಿದರು.

ಎಂಆರ್‌ಪಿಎಲ್‌ ತೈಲೋತ್ಪನ್ನ ಸಾಗಿಸಲು ಎಚ್‌ಪಿಸಿಎಲ್‌ ಪ್ರಸ್ತಾಪಿಸಿರುವ ಮಂಗಳೂರು - ಬೆಂಗಳೂರು ನಡುವಣ 364 ಕಿ.ಮೀಟರ್‌ ಉದ್ದದ ಪೈಪ್‌ಲೈನ್‌ ಕಾಮಗಾರಿಗೆ ಸೋಮವಾರ ನಡೆದ ಸಭೆಯಲ್ಲಿ ತೀವ್ರ ವಿರೋಧ ವ್ಯಕ್ತವಾಯಿತು. ಸಂತ್ರಸ್ತರಿಗೆ ಮಾಹಿತಿ ನೀಡಲೆಂದು ಕರೆದಿದ್ದ ಈ ಸಭೆಯ ಅಧ್ಯಕ್ಷತೆಯನ್ನು ಜಿಲ್ಲಾ ಉಸ್ತುವಾಸಿ ಸಚಿವ ರಮಾನಾಥ ರೈ ವಹಿಸಿದ್ದರು.
ಈ ಯೋಜನೆಯ ಪೂರ್ವಭಾವಿ ಕಾಮಗಾರಿ ಈಗಾಗಲೇ ಪ್ರಗತಿಯಲ್ಲಿದೆ ಭೂಸ್ವಾಧೀನ ಕಾರ್ಯ ಮುಗಿದಿದ್ದು, ಕಾಮಗಾರಿ ಆರಂಭದ ಹಂತದಲ್ಲಿದೆ. ಪೈಪ್‌ಲೈನ್‌ ಕೃಷಿ ಭೂಮಿ, ಮನೆ ಇರುವ ಪ್ರದೇಶಗಳ ಮೂಲಕ ಹಾದು ಹೋಗಲಿದ್ದು, ಜನರಿಗೆ ತೊಂದರೆಯಾಗುತ್ತದೆ ಎಂದು ಸಂತ್ರಸ್ತರು ಹಾಗೂ ಪರಿಸರ ವಾದಿಗಳು ವಾದಿಸಿದರು.

ಈ ಕಾರ್ಯ ಆರಂಭಿಸುವ ಮುನ್ನ ಭೂಸ್ವಾಧೀನಾಧಿಕಾರಿಗಳು ಸ್ಥಳೀಯನ್ನು ವಿಶ್ವಾಸಕ್ಕೂ ತೆಗೆದುಕೊಂಡಿಲ್ಲ. ಅವರಿಗೆ ಕನಿಷ್ಠ ಮಾಹಿತಿಯನ್ನೂ ನೀಡಿಲ್ಲ ಎಂದು ಆಕ್ಷೇಪಿಸಿದರು. ಈ ಯೋಜನೆಗೆ ರೈಲು ಮಾರ್ಗವೇ ಸುರಕ್ಷಿತ ಎಂದೂ ಪಟ್ಟುಹಿಡಿದರು.

ಸಚಿವರ ಸೂಚನೆ : ಯೋಜನೆ ಕೈಗೆತ್ತಿಕೊಳ್ಳುವ ಮುನ್ನ ಪಾರದರ್ಶಕವಾಗಿಯೂ ಹಾಗೂ ಎಲ್ಲರನ್ನೂ ವಿಶ್ವಾಸಕ್ಕೆ ತೆಗೆದುಕೊಂಡು ಮಾಹಿತಿ ನೀಡುವಂತೆ ಸಚಿವರು ಅಧಿಕಾರಿಗಳಿಗೆ ಸೂಚಿಸಿದರು. ಸಭೆಯಲ್ಲಿ ಪೈಪ್‌ಲೈನ್‌ ಯೋಜನೆ ಅನುಷ್ಠಾನಕ್ಕೆ ತರುತ್ತಿರುವ ಪೆಟ್ರೋನೆಟ್‌ನ ಎಸ್‌.ಬಿ. ಪಾಂಡೆ, ಭೂಸ್ವಾಧೀನ ಅಧಿಕಾರಿ ಆನಂದ ಮಲ್ಯ, ಜಿಲ್ಲಾಧಿಕಾರಿ ಕಪಿಲ್‌ ಮೋಹನ್‌ ಇದ್ದರು.