ಕಿರುಕುಳ ಪ್ರತಿಭಟಿಸಿ ನಾಡ ದೋಣಿ ಮೀನುಗಾರರ ಪ್ರತಿಭಟನೆ

ಕಾರವಾರ : ಬೃಹತ್‌ ಪ್ರಮಾಣದ ಮೀನುಗಾರರ ದೋಣಿಯಿಂದ, ನಾಡದೋಣಿಯವರ ಮೀನುಗಾರಿಕೆಗೆ ಆಗುತ್ತಿರುವ ಕಿರುಕುಳವನ್ನು ತಡೆಯಲು ಸೂಕ್ತ ಕ್ರಮ ಕೈಗೊಳ್ಳುವಂತೆ ಒತ್ತಾಯಿಸಿ ಸೆಪ್ಟೆಂಬರ್‌ 18ರಂದು ಸೋಮವಾರ ಕಾರವಾರದ ಮಾಜಾಳಿಯಲ್ಲಿ ಉತ್ತರ ಕನ್ನಡ ಕರಾವಳಿ ನಾಡದೋಣಿಗರ ಬೃಹತ್‌ ಪ್ರತಿಭಟನಾ ಸಭೆ ನಡೆಸಲಾಗುವುದು ಎಂದು ಕಾರವಾರ ಜಿಲ್ಲಾ ಗಿಲ್‌ನೆಟ್‌ (ನಾಡದೋಣಿ) ಒಕ್ಕೂಟ ಪ್ರಕಟಿಸಿದೆ.

ನಾಡದೋಣಿಯವರು ಸಮುದ್ರ ತೀರದ ಗುಂಟ ಹಾಗೂ ದಂಡೆಯ ಸಮೀಪ ಬಲೆ ಬೀಸಿ ಮೀನು ಹಿಡಿಯುವಾಗ ದೊಡ್ಡ ಬೋಟಿನವರು ಬಂದು, ಬೀಸಿದ ಬಲೆ ಹರಿದು ಮೀನು ಹಿಡಿಯಲು ಅಡ್ಡಿ ಪಡಿಸುತ್ತಿದ್ದಾರೆ. ಈ ಕುರಿತು ಪ್ರತಿಭಟಿಸಿದರೆ, ವೈರ್‌ ಲೆಸ್‌ ಮೂಲಕ ಮತ್ತಷ್ಟು ಬೋಟಿನವರನ್ನು ಕರೆಸಿ ಜೀವಕ್ಕೆ ಬೆದರಿಕೆ ಹಾಕುತ್ತಾರೆ. ಕಳೆದ ಗುರವಾರವಷ್ಟೇ ಮಾಜಾಳಿಯಲ್ಲಿ ಇಂತಹುದೇ ಘಟನೆಯಾಂದು ನಡೆದ ಪರಿಣಾಮ ಸಂಬಂಧಿತರಿಗೆ ಆರು ಲಕ್ಷ ರೂಪಾಯಿ ಹಾನಿಯಾಗಿರುವುದಾಗಿ ಒಕ್ಕೂಟ ಹೇಳಿದೆ.

ಇಂತಹ ಬೆದರಿಕೆ ಪ್ರಕರಣದ ಕುರಿತು ಕ್ರಮ ಕೈಗೊಳ್ಳದಿದ್ದಲ್ಲಿ , ಹೋರಾಟದ ಮುಂದಿನ ಹಂತವಾಗಿ, ಮೀನು ಹಿಡಿಯುವ ದೊಡ್ಡ ಬೋಟುಗಳನ್ನು ಅಡ್ಡಗಟ್ಟುವುದು, ರಸ್ತೆ ತಡೆ, ಮೀನುಗಾರಿಕೆ ಬಂದ್‌ನಂತಹ ಪ್ರತಿಭಟನಾ ಕ್ರಮಗಳನ್ನು ಅನುಸರಿಸಲಾಗುವುದು ಎಂದು ಒಕ್ಕೂಟ ಹೇಳಿದೆ.

(ಕಾರವಾರ ಪ್ರತಿನಿಧಿಯಿಂದ)