ಮಲ್ಲಿಗೆಯ ಕವಿಗೆ ದಸರಾ ಕವಿಗೋಷ್ಠಿ ಅಧ್ಯಕ್ಷತೆ

ಮೈಸೂರು : ಈ ಬಾರಿಯ ದಸರಾ ಕವಿಗೋಷ್ಠಿ ಅಧ್ಯಕ್ಷತೆಯನ್ನು ಹಿರಿಯ ಕವಿ ಮೈಸೂರು ಮಲ್ಲಿಗೆ ಖ್ಯಾತಿಯ ಕೆ.ಎಸ್‌. ನರಸಿಂಹಸ್ವಾಮಿ ವಹಿಸಲಿದ್ದಾರೆ.

ಸಹಸ್ರಮಾನದ ಮೊದಲ ದಸರಾ ಉತ್ಸವದ ಕವಿಗೋಷ್ಠಿಯನ್ನು ವಿಶಿಷ್ಠವಾಗಿ ಆಚರಿಸಲು ನಿರ್ಧರಿಸಿದ್ದು, ನಾಡಿನ ಹಿರಿಯ ಕವಿ-ಕವಯತ್ರಿಯರನ್ನು ಗೋಷ್ಠಿಗೆ ಆಹ್ವಾನಿಸಲಾಗಿದೆ ಎಂದು ಕವಿಗೋಷ್ಠಿ ಉಪಸಮಿತಿ ಅಧ್ಯಕ್ಷ ಮಾನಸ ಗಂಗೋತ್ರಿಯ ಕನ್ನಡ ಅಧ್ಯಯನ ಸಂಸ್ಥೆಯ ಮುಖ್ಯಸ್ಥರಾದ ಡಾ. ಸಿ. ಪಿ. ಸಿದ್ಧಾಶ್ರಮ ಅವರು ಶನಿವಾರ ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದ್ದಾರೆ.

ಕವಿಗೋಷ್ಠಿ ಅಕ್ಟೋಬರ್‌ 7ರಂದು ಸಂಜೆ ಜಗನ್ಮೋಹನ ಅರಮನೆಯಲ್ಲಿ ಸಂಜೆ 6ಕ್ಕೆ ನಡೆಯಲಿದೆ. ಗೋಷ್ಠಿಯಲ್ಲಿ ತುಳು, ಕೊಂಕಣಿ, ಉರ್ದು, ಸಂಸ್ಕೃತ ಮತ್ತು ಕೊಡವ ಭಾಷೆಗಳ ಕವಿಗಳು ಭಾಗವಹಿಸಲಿದ್ದಾ ರೆ. ಕನ್ನಡದ ಹಿರಿಯ ಕವಿಗಳಾದ ಜಿ. ಎಸ್‌. ಶಿವರುದ್ರಪ್ಪ, ಚನ್ನವೀರ ಕಣವಿ, ಕೆ. ಎಸ್‌. ನಿಸಾರ್‌ ಅಹಮದ್‌, ರಾಮಚಂದ್ರ ಶರ್ಮ, ಸುಮತೀಂದ್ರ ನಾಡಿಗ, ಸಿದ್ಧಲಿಂಗ ಪಟ್ಟಣಶೆಟ್ಟಿ, ಶಾಂತರಸ, ಅಕಬರ್‌ ಆಲಿ, ಸುಜನಾ ಮತ್ತು ಪ್ರೊ.ಸಿದ್ಧಲಿಂಗಯ್ಯ ಸೇರಿದಂತೆ 20 ಕವಿಗಳು ಭಾಗವಹಿಸಲಿದ್ದಾರೆ.

ಗೋಷ್ಠಿಯಲ್ಲಿ ಐವರು ಕವಿಯತ್ರಿಯರು ಭಾಗವಹಿಸುತ್ತಿದ್ದು , ಹಿರಿಯ ಕವಿಗಳೇ ಇರುವ ಕವಿಗೋಷ್ಠಿ ನಡೆಯುತ್ತಿರುವುದು ಇದೇ ಮಾದಲ ಬಾರಿ ಎಂದು ಭಾವಿಸಲಾಗಿದೆ ಎಂದು ಸಿದ್ಧಾಶ್ರಮ ಹೇಳಿದ್ದಾರೆ.