ನಾಪತ್ತೆಯಾಗಿದ್ದ ಭದ್ರಾವತಿ ಶಾಸಕ ಅಪ್ಪಾಜಿ ಬೆಂಗಳೂರಲ್ಲಿ ಪ್ರತ್ಯಕ್ಷ

ಬೆಂಗಳೂರು : ಭದ್ರಾವತಿಯ ಶಾಸಕ ಅಪ್ಪಾಜಿ ಕಾಣೆಯಾಗಿದ್ದಾರೆ ಎಂದು ಇದ್ದಕ್ಕಿದ್ದಂತೆ ಶುಕ್ರವಾರ ರಾತ್ರಿ ಭಾರಿ ಸುದ್ದಿಯಾಯಿತು. ಈಗ ಅಪ್ಪಾಜಿ ತಾವಾಗಿಯೇ ಬೆಂಗಳೂರಿನಲ್ಲಿ ಪ್ರತ್ಯಕ್ಷರಾಗಿದ್ದಾರೆ. ಕಳೆದ ವಾರ ಭದ್ರಾವತಿಗೆ ಹೋಗುವುದಾಗಿ ತಿಳಿಸಿ ಬೆಂಗಳೂರಿನಿಂದ ಹೊರಟ ಅವರು ಬೆಂಗಳೂರಿನಲ್ಲೂ ಇರಲಿಲ್ಲ. ಭದ್ರಾವತಿಗೂ ಹೋಗಲಿಲ್ಲ.

ಶುಕ್ರವಾರ ಅಪ್ಪಾಜಿಯವರ ಸಂಬಂಧಿಕರಾದ ಯೋಗಾನಂದ್‌ ಎಂಬುವವರು ಅಪ್ಪಾಜಿ ಕಾಣೆಯಾಗಿದ್ದಾರೆ ಎಂದು ವಿಧಾನಸೌಧ ಪೊಲೀಸರಿಗೆ ದೂರು ನೀಡಿದ್ದರು. ಈ ಸುದ್ದಿ ಪತ್ರಿಕೆಗಳಲ್ಲಿ ಶನಿವಾರ ಬಂದೊಡನೆಯೇ ಯೋಗಾನಂದ್‌ ಅವರಿಗೆ ಫೋನ್‌ ಮಾಡಿದ ಶಾಸಕರು, ತಾವು ಮೈಸೂರಿನಲ್ಲಿರುವುದಾಗಿ, ಕೂಡಲೇ ಬೆಂಗಳೂರಿಗೆ ಬರುತ್ತಿದ್ದೇನೆ ಎಂದು ತಿಳಿಸಿದರು.

ಈಗ ಶಾಸಕ ಅಪ್ಪಾಜಿ ಬೆಂಗಳೂರಿಗೆ ಬಂದಿದ್ದಾರೆ ಎಂಬುದನ್ನು ನಗರ ಪೊಲೀಸ್‌ ಆಯುಕ್ತ ಟಿ. ಮಡಿಯಾಳ್‌ ಖಚಿತ ಪಡಿಸಿದ್ದಾರೆ. ಅಪ್ಪಾಜಿ ಅವರು ನಾಪತ್ತೆಯಾದ ಬಗ್ಗೆ ಪೊಲೀಸರು ದೂರು ದಾಖಲಿಸಿಕೊಂಡಿಲ್ಲ, ಆದರೆ ನಾಪತ್ತೆಯ ನಾಟಕದ ಹಿಂದಿನ ರಹಸ್ಯ ಭೇದಿಸಲು ವಿಚಾರಣೆ ನಡೆಸುವುದಾಗಿ ತಿಳಿಸಿದ್ದಾರೆ. ಭದ್ರಾವತಿಗೆ ಹೋಗುವುದಾಗಿ ತಿಳಿಸಿ ಸೆ. 8ರಂದು ಬೆಂಗಳೂರು ಬಿಟ್ಟ ಶಾಸಕರು ಮೈಸೂರಿಗೆ ಏಕೆ ಹೋಗಿದ್ದರು? ಅವರ ಕುಟುಂಬದವರಿಗೂ ಈ ಬಗ್ಗೆ ಮಾಹಿತಿ ನೀಡದಿದ್ದುದು ಏಕೆ? ಎಂಬಿತ್ಯಾದಿ ಪ್ರಶ್ನೆಗಳಿಗೆ ವಿಚಾರಣೆಯ ನಂತರ ಉತ್ತರ ಸಿಕ್ಕೀತು.