ಅಮೆರಿಕಾ ಭೇಟಿ : ಸಮಸ್ಯೆಗಳನ್ನು ಮುಕ್ತವಾಗಿ ಒಪ್ಪಿಕೊಂಡ ವಾಜಪೇಯಿ

ನ್ಯೂಯಾರ್ಕ್‌ : ಭಾರತದ ಆರ್ಥಿಕ ಕ್ಷೇತ್ರದಲ್ಲಿ ವ್ಯಾಪಕ ಸಮಸ್ಯೆಗಳಿವೆ. ಅದನ್ನು ನಿವಾರಿಸುವ ತುರ್ತು ಅಗತ್ಯವಿದೆ ಎಂದು ಹೇಳಿಕೆ ನೀಡಿರುವವರು ವಿರೋಧ ಪಕ್ಷದವರಲ್ಲ , ಸ್ವತಃ ಪ್ರಧಾನಿ ವಾಜಪೇಯಿ.

ನ್ಯೂಯಾರ್ಕ್‌ನಲ್ಲಿ ಬುಧವಾರ ನಡೆದ ಭಾರತ ಮತ್ತು ಅಮೆರಿಕಗಳ ವಾಣಿಜ್ಯ ವ್ಯವಹಾರಗಳ ಶೃಂಗಸಭೆಯಲ್ಲಿ ಈ ಮಾತುಗಳನ್ನಾಡಿರುವ ವಾಜಪೇಯಿ, ಕೆಲವು ಕಟು ಸತ್ಯಗಳನ್ನು ಬಹಿರಂಗವಾಗಿ ಹೇಳುವ ಮೂಲಕ ಅಪರೂಪದ ಪರಂಪರೆ ಆರಂಭಿಸಿದ್ದಾರೆ.

ಅನೇಕ ಕ್ಷೇತ್ರಗಳಲ್ಲಿನ ಭಾರತದ ಸಾಧನೆಯನ್ನು ತೆರದಿಟ್ಟ ವಾಜಪೇಯಿ ಅವರ ಪುಟ್ಟ ಭಾಷಣ, ಪ್ರಸ್ತುತ ಭಾರತದ ಸಮಸ್ಯೆಗಳನ್ನು ಸರಿಪಡಿಸಲು ಶೀಘ್ರ ಕ್ರಮ ಕೈಗೊಳ್ಳುವುದಾಗಿಯೂ ಹೇಳಿದೆ. ಭಾರತ ಮತ್ತು ಅಮೆರಿಕದ ಸುಮಾರು 500 ವಾಣಿಜ್ಯ ನಾಯಕರು ಭಾಗವಹಿಸಿದ್ದ ಈ ಸಭೆಯಲ್ಲಿ , ಮುಖ್ಯವಾಗಿ ದೀರ್ಘಾವಧಿ ಹಣಕಾಸು ವ್ಯವಸ್ಥೆಗೆ ಸಂಬಂಧಿಸಿದಂತೆ ಅನೇಕ ಸಮಸ್ಯೆಗಳಿವೆ ಎಂದು ವಾಜಪೇಯಿ ಒಪ್ಪಿಕೊಂಡಿದ್ದಾರೆ.

ವಾಜಪೇಯಿ ಅವರ ಭಾಷಣ ಅನೇಕ ಗಣ್ಯರ ಮೆಚ್ಚುಗೆ ಗಳಿಸಿದೆ. ಅವರ ನೇರ ಮಾತುಗಳಿಂದ ಭಾರತದ ಆರ್ಥಿಕ ಕ್ಷೇತ್ರದ ಸುಧಾರಣಾ ವಿಧಾನ ಮತ್ತು ಅದು ಇಟ್ಟಿರುವ ಹೆಜ್ಜೆಗಳು ಸ್ಪಷ್ಟವಾಗಿವೆ. ಪ್ರಧಾನಿಯಾಬ್ಬರು ಸಮಸ್ಯೆಗಳನ್ನು ಒಪ್ಪಿಕೊಳ್ಳುವುದು ದೊಡ್ಡ ವಿಷಯ ಎಂದಿದ್ದಾರೆ. ಇನ್ನೂ ಕೆಲವರು ಇಂತಹ ಮಾತುಗಳಿಂದ ಭಾರತದ ವಾಣಿಜ್ಯ ವ್ಯವಸ್ಥೆ ಮೇಲೆ ಕೆಟ್ಟ ಪರಿಣಾಮ ಉಂಟಾಗಲಿದೆ ಎಂದೂ ಹೇಳಿದ್ದಾರೆ.

ಆರ್ಥಿಕ ಸುಧಾರಣೆ ಹೂಡಿಕೆಗೆ ಒತ್ತು : ಆರ್ಥಿಕ ಸುಧಾರಣೆ ಮತ್ತು ಹೂಡಿಕೆ, ತೆರಿಗೆ ಆಡಳಿತ, ದ್ವಿಗುಣ ತೆರಿಗೆ ಒಪ್ಪಂದ ಮತ್ತು ಸರಕಾರದ ಖರ್ಚು, ವೆಚ್ಚಗಳಿಗೆ ಸಂಬಂಧಿಸಿದಂತೆ ಗಂಭೀರವಾಗಿ ಗಮನ ಹರಿಸಬೇಕಿದೆ. ಸಮಸ್ಯೆಗಳಿಗೆ ಶಾಶ್ವತ ಪರಿಹಾರ ರೂಪಿಸಲು ಖರ್ಚು, ವೆಚ್ಚ ಆಯೋಗ ಮಾಡಿರುವ ಶಿಫಾರಸುಗಳ ಅನ್ವಯ ಯೋಜನೆ ರೂಪಿಸಲಾಗಿದೆ. ಈ ಕುರಿತ ಸುಧಾರಣಾ ಕ್ರಮಗಳನ್ನು ಜಾರಿಗೊಳಿಸಲು ಶಾಸನಬದ್ಧ ಅಧಿಕಾರ ನೀಡುವ ಹಣಕಾಸು ಹೊಣೆಗಾರಿಕೆ ವಿಧೇಯಕ ಸಂಸತ್‌ನ ಮುಂದಿದೆ.

ಹೂಡಿಕೆ ಯೋಜನೆಗಳಲ್ಲಿನ ಅನುಮೋದಿತ ಯೋಜನೆಗಳ ವಿಳಂಬ, ಪೂರಕ ಯೋಜನೆಗಳ ಅನುಷ್ಠಾನ ಕ್ಷೇತ್ರವನ್ನು ಮತ್ತಷ್ಟು ಬಲಗೊಳಿಸಬೇಕಿದೆ. ಬೃಹತ್‌ ಮೊತ್ತದ ಬಂಡವಾಳ ಹೂಡಿಕೆಗೆ ಸಂಬಂಧಿಸಿದಂತೆ ಎದುರಾಗುವ ಸಮಸ್ಯೆಗಳನ್ನು ತಕ್ಷಣ ಪರಿಹರಿಸಲು ಸಾಧ್ಯವಾಗುವಂತೆ ಪ್ರಧಾನಮಂತ್ರಿಗಳ ಕಚೇರಿಯಲ್ಲಿ ಕಾರ್ಯತಂತ್ರ ವ್ಯವಸ್ಥೆ ರೂಪಿಸಲಾಗುವುದೆಂದು ಪ್ರಧಾನಿ ಇದೇ ಸಂದರ್ಭದಲ್ಲಿ ಘೋಷಿಸಿದ್ದಾರೆ.

ರಾಜ್ಯಗಳ ಹಣಕಾಸು ವಿಷಯದ ಮೇಲೆ ಹಣಕಾಸು ಆಯೋಗ ಮಾಡಿರುವ ಪ್ರಮುಖ ಶಿಫಾರಸುಗಳನ್ನು ಜಾರಿಗೆ ತರಲು ಗಂಭೀರವಾಗಿ ಯತ್ನಿಸಲಾಗುವುದು. ರಾಜ್ಯಗಳಿಗೆ ಸಂಬಂಧಿಸಿದ ಸಮಸ್ಯಗಳನ್ನೂ ಶೀಘ್ರವಾಗಿ ಬಗೆಹರಿಸಲು ಆಯಾ ರಾಜ್ಯಗಳ ಮುಖ್ಯಮಂತ್ರಿಗಳೊಂದಿಗೆ ಚರ್ಚಿಸಲಾಗುವುದೆಂದೂ ಹೇಳಿದ್ದಾರೆ.