ಮಲ್ಲಿಕಾರ್ಜುನ ಮನ್ಸೂರರ ವಸ್ತು ಸಂಗ್ರಹಾಲಯ ಅನಾವರಣ

ಧಾರವಾಡ : ಖ್ಯಾತ ಹಿಂದೂಸ್ತಾನಿ ಗಾಯಕ ದಿವಂಗತ ಮಲ್ಲಿಕಾರ್ಜುನ ಮನ್ಸೂರ್‌ ಅವರ 8ನೇ ಪುಣ್ಯತಿಥಿಯನ್ನು ಧಾರವಾಡದಲ್ಲಿ ಮಂಗಳವಾರ ಗೌರವಾದರಗಳಿಂದ ಆಚರಿಸಲಾಯಿತು. ಮನ್ಸೂರರ ಪುಣ್ಯತಿಥಿಯ ಅಂಗವಾಗಿ ವಸ್ತು ಸಂಗ್ರಹಾಲಯವನ್ನು ಉದ್ಘಾಟಿಸಲಾಯಿತು.

ಡಾ. ಮಲ್ಲಿಕಾರ್ಜುನ ಮನ್ಸೂರ್‌ ರಾಷ್ಟ್ರೀಯ ಸ್ಮಾರಕ ಟ್ರಸ್ಟ್‌ ರೂಪಿಸಿರುವ ಈ ಸಂಗ್ರಹಾಲಯವನ್ನು ಹೆಸರಾಂತ ಗಾಯಕಿ ಗಂಗೂಬಾಯಿ ಹಾನಗಲ್‌ ಅವರು ಉದ್ಘಾಟಿಸಿದರು. ಗಾನ ಸರಸ್ವತಿಯ ವರಪುತ್ರ ಹಾಗೂ ಹಿರಿಯ ಕಲಾವಿದ ವಾಸಿಸುತ್ತಿದ್ದ ‘ಮೃತ್ಯುಂಜಯ’ ದಲ್ಲಿ ಮನ್ಸೂರ್‌ ಅವರ ಅಪರೂಪದ ಭಾವಚಿತ್ರಗಳು, ಧ್ವನಿಸುರುಳಿ, ಮನ್ಸೂರರಿಗೆ ದೊರೆತಿದ್ದ ನೂರಾರು ಪ್ರಶಸ್ತಿ ಫಲಕ, ಪಾರಿತೋಷಕಗಳು, ಮನ್ಸೂರರು ಬಳಸುತ್ತಿದ್ದ ಹಲವು ಅಪರೂಪದ ವಸ್ತುಗಳನ್ನು ಪ್ರದರ್ಶಿಸಲಾಗಿದೆ.

ಜಿಲ್ಲಾಧಿಕಾರಿ ವಂದನಾ ಗುರುನಾನಿ ಅವರು ಹಿರಿಯ ಚೇತನ ಮನ್ಸೂರರಿಗೆ ಸರಕಾರದ ಪರವಾಗಿ ಗೌರವ ಅರ್ಪಿಸಿದರು. ಮನ್ಸೂರರ 8ನೇ ಪುಣ್ಯ ಸ್ಮರಣೆಯ ಅಂಗವಾಗಿ ಡಾ. ಮಲ್ಲಿಕಾರ್ಜುನ ಮನ್ಸೂರ್‌ ರಾಷ್ಟ್ರೀಯ ಸ್ಮಾರಕ ಟ್ರಸ್ಟ್‌ ಹಾಗೂ ಹುಬ್ಬಳ್ಳಿ - ಧಾರವಾಡ ಮಹಾನಗರ ಪಾಲಿಕೆಯ ಸಂಯುಕ್ತ ಆಶ್ರಯದಲ್ಲಿ ಮಂಗಳವಾರ ಸಂಜೆ ಮನ್ಸೂರ್‌ ಕಲಾಭವನದಲ್ಲಿ ಸಂಗೀತೋತ್ಸವ ಕಾರ್ಯಕ್ರಮ ಏರ್ಪಡಿಸಲಾಗಿದೆ.

ಮುಖಪುಟ / ಇವತ್ತು... ಈ ಹೊತ್ತು...