• search
ತ್ವರಿತ ಅಲರ್ಟ್ ಗಳಿಗಾಗಿ
ನೋಟಿಫಿಕೇಷನ್ ಅನುಮತಿಸಿ  
For Daily Alerts

ಮ್ಯಾನೇಜ್‌ಮೆಂಟ್‌ ಕೋರ್ಸಿಗೆ ಸೇರುತ್ತೀರಾ?ಇಂಥ ಕಾಲೇಜು ಮತ್ತು ಕೋರ್ಸುಗಳ ಗುಣಮಟ್ಟ ಪರೀಕ್ಷೆ ನಡೆಯುತ್ತದೆ, ಸ್ವಲ್ಪ ತಡೆಯಿರಿ.

By Staff
|

ಬೆಂಗಳೂರು : ಕುರುಚಲು ಗಿಡಗಳಂತೆ ತಲೆ ಎತ್ತುತ್ತಿರುವ ಮ್ಯಾನೇಜ್‌ಮೆಂಟ್‌ ಕಾಲೇಜುಗಳ ಗುಣಮಟ್ಟ ಪರೀಕ್ಷಿಸಬೇಕೆಂಬ ಕೂಗು ಇಷ್ಟು ದಿನ ಬಿಟ್ಟು ಇದೀಗ ಕೇಳಿಬರತೊಡಗಿದೆ.

ಈ ಸಂಬಂಧ ದನಿ ಎತ್ತಿರುವ ಭಾರತೀಯ ಮ್ಯಾನೇಜ್‌ಮೆಂಟ್‌ ತಜ್ಞರು, ಇತ್ತೀಚಿನ ವರ್ಷಗಳಲ್ಲಿ ನೂರಾರು ಸಂಖ್ಯೆಯಲ್ಲಿ ತಲೆ ಎತ್ತುತ್ತಿರುವ ಮ್ಯಾನೇಜ್‌ಮೆಂಟ್‌ ಕಾಲೇಜುಗಳ ಗುಣಮಟ್ಟ ಪರೀಕ್ಷೆ ಅನಿವಾರ್ಯ ಮತ್ತು ತುರ್ತು ಕೆಲಸ ಎಂದು ಹೇಳಿದ್ದಾರೆ.

ಭಾರತೀಯ ಮ್ಯಾನೇಜ್‌ಮೆಂಟ್‌ ಕಾಲೇಜುಗಳ 12ನೇ ಸಮಾವೇಶದಲ್ಲಿ ಮಾತನಾಡಿರುವ ಕೇಂದ್ರ ಮಾನವ ಸಂಪನ್ಮೂಲ ಅಭಿವೃದ್ಧಿ ಖಾತೆಯ ವಿಶೇಷ ಕಾರ್ಯದರ್ಶಿ ಅಶೋಕ್‌ ಚಂದ್ರ ಅವರು, ದೇಶಾದ್ಯಂತ ಎಂಜಿನಿಯರಿಂಗ್‌ ಕಾಲೇಜುಗಳಲ್ಲಿ 10 ಸಾವಿರ ಉಪನ್ಯಾಸಕರ ಹುದ್ದೆಗಳು ಖಾಲಿ ಇಂದು ಲೋಕಸಭೆಯಲ್ಲಿ ನೀಡಿರುವ ಹೇಳಿಕೆಯನ್ನು ಉಲ್ಲೇಖಿಸಿದ್ದಾರೆ. ಇದೇ ಸಂದರ್ಭದಲ್ಲಿ ಮಾನ್ಯ ಸಂಸದರುಗಳು ಅದೃಷ್ಟವಶಾತ್‌ ಮ್ಯಾನೇಜ್‌ಮೆಂಟ್‌ ಶಾಲೆಗಳ ಬಗ್ಗೆ ಪ್ರಶ್ನಿಸಿಲ್ಲ ಎಂದು ಹೇಳಿರುವುದು ಗಂಭೀರ ಚರ್ಚೆಗೆ ಗ್ರಾಸವಾಗಿದೆ.

ದೇಶಾದ್ಯಂತ ಇರುವ ಮ್ಯಾನೇಜ್‌ಮೆಂಟ್‌ ಮತ್ತು ಎಂಜಿನಿಯರಿಂಗ್‌ ಕಾಲೇಜುಗಳ ಗುಣಮಟ್ಟ ಪರೀಕ್ಷಿಸಲು ಇರುವ ಅಖಿಲ ಭಾರತ ತಾಂತ್ರಿಕ ಶಿಕ್ಷಣ ಪರಿಷತ್ತನ್ನು (ಎಐಸಿಟಿಇ) ಸ್ಥಾಪಿಸಿ ಅದಕ್ಕೆ ಕಾನೂನುಬದ್ಧ ಅಧಿಕಾರ ನೀಡಿ 14 ವರ್ಷ ಕಳೆದಿರುವಾಗ ಗುಣಮಟ್ಟದ ಕುರಿತು ಮಾತು ಕೇಳಿಬಂದಿರುವುದು ಅನೇಕರ ಗಮನ ಸೆಳೆದಿದೆ.

ಗುಣಮಟ್ಟ ಯೋಚಿಸಿದರೆ ಕಳವಳ : ಮ್ಯಾನೇಜ್‌ಮೆಂಟ್‌ ಕಾಲೇಜುಗಳು ಜಾಸ್ತಿ ಇವೆ ಎಂಬುದೇ ಸಮಸ್ಯೆಯಲ್ಲ. ಏಕೆಂದರೆ ಬೆಳೆಯುತ್ತಿರುವ ಬೇಡಿಕೆಯಿಂದಾಗಿ ಈಗಿರುವ 742 ಮ್ಯಾನೇಜ್‌ಮೆಂಟ್‌ ಕಾಲೇಜುಗಳಿಂದ ಬರುವ ಪದವೀಧರರು ಸಾಕಾಗುವುದಿಲ್ಲ. ಆದರೆ ಗುಣಮಟ್ಟ ಕುರಿತು ಯೋಚಿಸಿದಾಗ ತೀರ್ವ ಕಳವಳವಾಗುತ್ತದೆ ಎಂದು ಅಖಿಲ ಭಾರತ ಮ್ಯಾನೇಜ್‌ಮೆಂಟ್‌ ಕಾಲೇಜುಗಳ ಸಂಘದ ಹೊರಹೋಗುತ್ತಿರುವ ಅಧ್ಯಕ್ಷ ಅಶೋಕ್‌ ಜೋಷಿ ಅಭಿಪ್ರಾಯಪಟ್ಟಿದ್ದಾರೆ.

ಕಾಲೇಜುಗಳ ಆಡಳಿತ ಮಂಡಳಿಗೆ ಮ್ಯಾನೇಜ್‌ಮೆಂಟ್‌ ಶಿಕ್ಷಣದ ಬಗ್ಗೆ ಪ್ರಾಥಮಿಕ ಅರಿವು ಇಲ್ಲದಿರುವುದು ಮುಖ್ಯ ಸಮಸ್ಯೆ ತಂದೊಡ್ಡುತ್ತಿದೆ. ಇದನ್ನು ಮೊದಲು ಸರಿಪಡಿಸಬೇಕು ಎಂದು ಇನ್ನೊಬ್ಬ ತಜ್ಞರು ಹೇಳಿದ್ದಾರೆ.

ಇನ್ನು ಬೋಧಕರ ವಿಷಯಕ್ಕೆ ಬಂದರೆ ಅನೇಕ ಉಪನ್ಯಾಸಕರು ಒಂದೊಂದು ವಿಷಯದಲ್ಲಿ ತಜ್ಞರಾಗಿರುತ್ತಾರೆ. ಆದರೆ ಮ್ಯಾನೇಜ್‌ಮೆಂಟ್‌ನಂಥ ವಿಷಯಗಳಿಗೆ ಸಮಗ್ರ ದೃಷ್ಟಿಕೋನ ಮತ್ತು ಬಹು ವಿಷಯಗಳ ಮೇಲಿನ ಹಿಡಿತ ಬಹಳ ಮುಖ್ಯ.

ನಿಯಮಗಳು ಸೃಷ್ಟಿಸುವ ತೊಡಕು : ಎಲ್ಲಕ್ಕಿಂತ ಮುಖ್ಯವಾಗಿ ಕಾಲೇಜಿನ ಕೋರ್ಸ್‌ ಮತ್ತು ಸೌಲಭ್ಯಗಳ ಕುರಿತು ಪ್ರಮಾಣ ಪತ್ರ ನೀಡುವಾಗ ಅನುಸರಿಸಲಾಗುತ್ತಿರುವ ನಿಯಮಗಳು ಇನ್ನೊಂದು ರೀತಿಯ ತೊಡಕನ್ನು ಸೃಷ್ಟಿಸುತ್ತಿವೆ. ಈಗ ಪ್ರಮಾಣಪತ್ರ ನೀಡುವ ಎರಡು ರೀತಿಯ ಏಜೆನ್ಸಿಗಳಿದ್ದು, ಎಐಸಿಟಿಇ ವ್ಯಾಪ್ತಿಯಡಿ ಬರುವ ರಾಷ್ಟ್ರೀಯ ಅಕ್ರಡಿಷನ್‌ ಬೋರ್ಡ್‌ ಮತ್ತು ಯುಜಿಸಿ ವ್ಯಾಪ್ತಿಯಲ್ಲಿ ಬರುವ ಇನ್ನೊಂದು ಘಟಕ, ಸಂಸ್ಥೆಗಳಿಗೆ ಪ್ರಮಾಣಪತ್ರ ನೀಡುತ್ತವೆ. ಈಗ ಜಾರಿಯಲ್ಲಿರುವ ನಿಯಮದ ಪ್ರಕಾರ ಕಾಲೇಜಿನಲ್ಲಿ ನಡೆಯುವ ಕೋರ್ಸುಗಳಿಗೆ ಅನುಮತಿ ದೊರಕದಿದ್ದರೂ ಕಾಲೇಜಿಗೆ ಪ್ರಮಾಣಪತ್ರ ನೀಡಬಹುದಾಗಿದೆ. ಈ ನಿಯಮ ಅಸ್ಥಿತ್ವಕ್ಕೆ ಬಂದು 14 ವರ್ಷಗಳಾದ ನಂತರ ದೇಶಾದ್ಯಂತ ಕೇವಲ 9 ಕಾಲೇಜುಗಳು ಎರಡೂ ಘಟಕಗಳಿಂದ ಅನುಮತಿ ಪಡೆದಿವೆ.

ಅಖಿಲ ಭಾರತ ಮ್ಯಾನೇಜ್‌ಮೆಂಟ್‌ ಕಾಲೇಜುಗಳ ಸಂಘ ಈಗ ಈ ಸಂಬಂಧ ಚರ್ಚಿಸುತ್ತಿದ್ದು, ಕಾಲೇಜಿಗೆ ಪ್ರಮಾಣಪತ್ರ ಕೊಡುವುದಕ್ಕೆ ಬದಲಾಗಿ ಕೋರ್ಸ್‌ಗಳಿಗೆ ಅನುಮತಿ ನೀಡಬೇಕು ಏಕೆಂದರೆ ಕಾಲೇಜಿಗೆ ಅನುಮತಿ ನೀಡಿ ಕೋರ್ಸುಗಳಿಗೆ ನೀಡದಿದ್ದರೆ ಅದರಿಂದ ಯಾವುದೇ ಉದ್ದೇಶ ಈಡೇರಿದಂತಾಗುವುದಿಲ್ಲ . ಇಂಥ ಅನೇಕ ಕಾರಣಗಳಿಂದ ಭಾರತದಲ್ಲಿನ ಮ್ಯಾನೇಜ್‌ಮೆಂಟ್‌ ಶಿಕ್ಷಣದ ಗುಣಮಟ್ಟ ಕುಸಿಯುತ್ತಿದ್ದು, ಬುಡಮಟ್ಟದಿಂದ ಸರಿಪಡಿಸಲು ಬ್ರಿಟನ್‌ ಮತ್ತು ಯೋರೊಪ್‌ನ ಇತರ ದೇಶಗಳಲ್ಲಿರುವಂತೆ ಪ್ರತ್ಯೇಕ ನೀತಿನಿಯಮಗಳನ್ನು ರೂಪಿಸಬೇಕು ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ವಿದ್ಯಾರ್ಥಿಗಳಿಗೆ ಪ್ರವೇಶ ಪರೀಕ್ಷೆ ಮತ್ತು ಕಾಲೇಜುಗಳಿಗೆ ಅನುಮತಿ ಮತ್ತು ಗುಣಮಟ್ಟ ಹೆಚ್ಚಿಸುವ ನಿಟ್ಟಿನಲ್ಲಿ ವಿಶೇಷ ಶಿಬಿರಗಳನ್ನು ಅಖಿಲ ಭಾರತ ಮ್ಯಾನೇಜ್‌ಮೆಂಟ್‌ ಕಾಲೇಜುಗಳ ಸಂಘ ಇತ್ತೀಚೆಗೆ ಹಮ್ಮಿಕೊಳ್ಳುತ್ತಿದೆ.

(ಐಎಎನ್‌ಎಸ್‌)

ಕನ್ನಡ ಮ್ಯಾಟ್ರಿಮೋನಿಯಲ್ಲಿ - ಉಚಿತ ನೋಂದಣಿ !

Oneindia ಬ್ರೇಕಿಂಗ್ ನ್ಯೂಸ್,
ತಾಜಾ ಸುದ್ದಿ ತಕ್ಷಣವೇ ಪಡೆಯಿರಿ

Notification Settings X
Time Settings
Done
Clear Notification X
Do you want to clear all the notifications from your inbox?
Settings X
X
We use cookies to ensure that we give you the best experience on our website. This includes cookies from third party social media websites and ad networks. Such third party cookies may track your use on Oneindia sites for better rendering. Our partners use cookies to ensure we show you advertising that is relevant to you. If you continue without changing your settings, we'll assume that you are happy to receive all cookies on Oneindia website. However, you can change your cookie settings at any time. Learn more