ಇನ್ನೂ 920 ಐಟಿ ಎಂಜಿನಿಯರಿಂಗ್‌ ಸೀಟುಗಳು ಮಂಜೂರು

ಬೆಂಗಳೂರು : ಮಾಹಿತಿ ತಂತ್ರಜ್ಞಾನಕ್ಕೆ ಸಂಬಂಧಿಸಿದ ಕೋರ್ಸುಗಳಲ್ಲಿ ಇನ್ನೂ 920 ಸೀಟುಗಳನ್ನು ಹೆಚ್ಚಿಸಲು ಅಖಿಲ ಭಾರತ ತಾಂತ್ರಿಕ ಶಿಕ್ಷಣ ಮಂಡಳಿ (ಎಐಸಿಟಿಇ) ಒಪ್ಪಿಗೆ ನೀಡಿದೆ.

ಮಂಡಳಿಯು ಬುಧವಾರ ಈ ಸೀಟು ಹೆಚ್ಚಳಕ್ಕೆ ಅನುಮತಿ ಕೊಟ್ಟಿದ್ದು, ಪ್ರವೇಶ ಪ್ರಕ್ರಿಯೆಯಲ್ಲಿ ಸೂಕ್ತ ಬದಲಾವಣೆಗಳನ್ನು ಮಾಡಿಕೊಳ್ಳುವಂತೆ ಸಿಇಟಿಗೆ ರಾಜ್ಯ ಸರ್ಕಾರ ಆದೇಶ ಕೊಟ್ಟಿದೆ. ತತ್ಪರಿಣಾಮ ಆಗಸ್ಟ್‌ 31ರಂದು ನಡೆಯಬೇಕಿದ್ದ ಸೀಟು ಆಯ್ಕೆ ಪ್ರಕ್ರಿಯೆಯನ್ನು ಸೆಪ್ಟೆಂಬರ್‌ 3ಕ್ಕೆ ಮುಂದೂಡಲಾಗಿದೆ ಎಂದು ಸಿಇಟಿ ಪ್ರಕಟಿಸಿದೆ.

ಹೆಚ್ಚಳವಾಗಿರುವ 920 ಸೀಟುಗಳ ಪೈಕಿ 730 ಸೀಟುಗಳನ್ನು ಉಚಿತ, ಪೇಮೆಂಟ್‌, ಕರ್ನಾಟಕ ಹಾಗೂ ಕರ್ನಾಟಕೇತರ ವರ್ಗದವರಲ್ಲಿ ಹಂಚಲಾಗುವುದು. ಈ ಮೊದಲೇ ಎಐಸಿಟಿಇ 1590 ಹೆಚ್ಚುವರಿ ಸೀಟುಗಳನ್ನು ಮಂಜೂರು ಮಾಡಿದ್ದು, ಅದರಂತೆ ಸಿಇಟಿ ಹೊಸ ಸೀಟು ಹಂಚಿಕೆ ಲೆಕ್ಕಾಚಾರ ಪ್ರಕಟಿಸಿ, ಹಂಚಿಕೆಯನ್ನೂ ಪ್ರಾರಂಭಿಸಿದೆ.

ಆಗಸ್ಟ್‌ 28, 29 ಮತ್ತು 30ನೇ ತಾರೀಖು ಪರಿಶಿಷ್ಟ ಜಾತಿ- ಪಂಗಡ ಹಾಗೂ 2ಎ ವರ್ಗದ ವಿದ್ಯಾರ್ಥಿಗಳು ತಮ್ಮ ತಮ್ಮ ಸೀಟುಗಳನ್ನು ಆಯ್ಕೆ ಮಾಡಿಕೊಂಡಿದ್ದಾರೆ. ಈಗ ಮತ್ತಷ್ಟು ಸೀಟುಗಳ ಹೆಚ್ಚಳವಾಗಿರುವುದರಿಂದ ತಮ್ಮ ಆಯ್ಕೆಯಲ್ಲಿ ಬದಲಾವಣೆ ಬಯಸಿದಲ್ಲಿ , ಸೆಪ್ಟೆಂಬರ್‌ 2ನೇ ತಾರೀಖು ಬೆಳಗ್ಗೆ 9 ಗಂಟೆಗೆ ಸಿಇಟಿ ಕಚೇರಿ ಅಧಿಕಾರಿಗಳನ್ನು ಸಂಪರ್ಕಿಸಬಹುದು ಎಂದು ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.

(ಇನ್ಫೋ ವಾರ್ತೆ)