ಸ್ಟಾರ್‌ ಟಿವಿಗೆ ರಿkುೕ ಟಿವಿ ಸವಾಲು: ದಶ ಕೋಟಿ ಅವತಾರ

ನವದೆಹಲಿ : ವೀಕ್ಷಕರೆಲ್ಲಾ ತನ್ನತ್ತ ಮುಖ ಮಾಡುವಂತೆ ಮಾಡಿರುವ ಸ್ಟಾರ್‌ ಟಿವಿಯ ಕೌನ್‌ ಬನೇಗ ಕರೋಡ್‌ಪತಿಗೆ ಸೆಡ್ಡು ಹೊಡೆಯುವಂಥ 10 ಕೋಟಿ ರುಪಾಯಿ ಬಹುಮಾನವಿರುವ ಕಾರ್ಯಕ್ರಮವೊಂದನ್ನು ರಿkುೕಟಿವಿ ಶುರು ಮಾಡಲಿದೆ.

ಬುಧವಾರ ಸುದ್ದಿಗಾರರಿಗೆ ಈ ವಿಷಯ ತಿಳಿಸಿರುವ ರಿkುೕ ಟಿವಿಯ ಮುಖ್ಯ ಕಾರ್ಯ ನಿರ್ವಾಹಕ ಅಧಿಕಾರಿ ಆರ್‌.ಕೆ. ಸಿಂಗ್‌, ‘ಅಮಿತಾಬ್‌ ಬಚ್ಚನ್‌ ನಡೆಸಿಕೊಡುವ ಕೌನ್‌ ಬನೇಗಾ ಕರೋಡ್‌ಪತಿ ಜನರಲ್ಲಿ ಹೊಸ ಕನಸನ್ನು ಹುಟ್ಟು ಹಾಕಿದೆ. ಇದರಿಂದ ಸಹಜವಾಗೇ ಜನ ಬೇರೆ ಚಾನೆಲ್‌ಗಳಲ್ಲೂ ಕಂಡಾಪಟ್ಟೆ ಬಹುಮಾನದ ಕಾಯಕ್ರಮಗಳನ್ನು ನಿರೀಕ್ಷಿಸುತ್ತಾರೆ. ಈ ಕಾರಣಕ್ಕಾಗೇ ನಮ್ಮ ಪ್ರಸಿದ್ಧ ಕಾರ್ಯಕ್ರಮ ‘ಅಂತಾಕ್ಷರಿ’ಯ ಬಹುಮಾನದ ಮೊತ್ತವನ್ನೂ ಒಂದು ಕೋಟಿಗೆ ಏರಿಸಿದ್ದೇವೆ’ ಎನ್ನುತ್ತಾರೆ.

‘ಬರುವ ಅಕ್ಟೋಬರ್‌ನಿಂದ ಹೊಸ ಕಾರ್ಯಕ್ರಮ ಪ್ರಾರಂಭವಾಗಲಿದ್ದು, ಜನರಿಗೆ ಸುಲಭದ ತುತ್ತಾಗುವಂಥ ಪ್ರಶ್ನೆಗಳನ್ನು ಕೇಳಲಾಗುವುದು. ವಿದೇಶಗಳಿಗೆ ಸಂಬಂಧಿಸಿದ ಪ್ರಶ್ನೆಗಳ ಗೊಡವೆಗೆ ನಾವು ಹೋಗುವುದಿಲ್ಲ. ಭಾರತದ ಸಂಸ್ಕೃತಿ ಹಾಗೂ ಪರಂಪರೆಗೆ ಸಂಬಂಧಿಸಿದ ಪ್ರಶ್ನೆಗಳನ್ನು ನಾವು ಕೇಳುತ್ತೇವೆ’ ಎನ್ನುತ್ತಾರೆ ಸಿಂಗ್‌.

ಕೌನ್‌ ಬನೇಗಾ ಕರೋಡ್‌ಪತಿ ಸ್ಫೂರ್ತಿಯಿಂದ ಪ್ರಾರಂಭವಾಗಲಿರುವ, ವಾರಕ್ಕೆ 21 ಲಕ್ಷದವರೆಗೆ ಬಹುಮಾನ ಗೆಲ್ಲಬಹುದಾದ ‘ಮಾಲಾಮಾಲ್‌’ (ಹೋದ ತಿಂಗಳೇ ಈ ಕಾರ್ಯಕ್ರಮ ಶುರು ಮಾಡುವುದಾಗಿ ಹೇಳಿದ್ದರು) ಕಾರ್ಯಕ್ರಮವೂ ಇದರ ಜೊತೆಗೆ ನಡೆಯಲಿದೆ ಎಂದು ಸಿಂಗ್‌ ತಿಳಿಸಿದ್ದಾರೆ.

(ಯುಎನ್‌ಐ)