ಹೊಸ ಹಜ್‌ ಮಸೂದೆಗೆ ಕೇಂದ್ರ ಸಚಿವ ಸಂಪುಟ ಅಸ್ತು

ನವದೆಹಲಿ : ಬಹು ದಿನಗಳಿಂದ ನಿರೀಕ್ಷಿಸಲಾಗಿದ್ದ ಹೊಸ ಹಜ್‌ ಮಸೂದೆಗೆ ಕೇಂದ್ರ ಸಚಿವ ಸಂಪುಟ ಮಂಗಳವಾರ ಅನುಮತಿ ನೀಡಿದೆ.

ಬರುವ ಸಂಸತ್‌ ಅಧಿವೇಶನದಲ್ಲಿ ಈ ಮಸೂದೆಯನ್ನು ಮಂಡಿಸಲಾಗುವುದೆಂದು ವಿದೇಶಾಂಗ ವ್ಯವಹಾರಗಳ ಸಹಾಯಕ ಸಚಿವ ಅಜಿತ್‌ಕುಮಾರ್‌ ಪಾಂಜಾ ಮಂಗಳವಾರ ತಿಳಿಸಿದ್ದಾರೆ.

ಹೊಸ ಮಸೂದೆಯನ್ವಯ ಸಮಿತಿಗಳಿಗೆ ಶಾಸನಾತ್ಮಕ ಅಧಿಕಾರ ಮತ್ತು ಇನ್ನೂ ಹೆಚ್ಚಿನ ಅಧಿಕಾರಗಳನ್ನು ಒದಗಿಸಲಾಗುವುದು ಎಂದು ಅಖಿಲ ಭಾರತ ವಾರ್ಷಿಕ ಹಜ್‌ ಸಮಿತಿ ಸಭೆ ಉದ್ದೇಶಿಸಿ ಮಾತನಾಡುತ್ತಿದ್ದ ಸಚಿವರು ತಿಳಿಸಿದ್ದಾರೆ.

1959ರ ಹಜ್‌ ಸಮಿತಿಯ ಅಧಿನಿಯಮದಂತೆ ವಿದೇಶಾಂಗ ವ್ಯವಹಾರಗಳ ಸಚಿವಾಲಯ, ಹಜ್‌ ನೀತಿಯೂ ಸೇರಿದಂತೆ ಉನ್ನತ ಮಟ್ಟದ ಅಧಿಕಾರ ಹೊಂದಿದೆ. ಯಾತ್ರಿಗಳಿಗೆ ವಿವಿಧ ಸೌಲಭ್ಯ ಸೇರಿದಂತೆ ಯಾತ್ರೆಯ ಇಡೀ ಉಸ್ತುವಾರಿಯನ್ನು ವಿದೇಶಾಂಗ ವ್ಯವಹಾರಗಳ ಸಚಿವಾಲಯ ನೋಡಿಕೊಳ್ಳುತ್ತಿದೆ.

ಸೌದಿಯಲ್ಲಿರುವ ಭಾರತದ ರಾಯಭಾರಿ, ಭಾರತದಲ್ಲಿರುವ ಸೌದಿ ಅರೇಬಿಯಾದ ರಾಯಭಾರಿ ಸೇರಿದಂತೆ 14 ಕೇಂದ್ರ ಸಚಿವರು ಹಾಗೂ ಸಂಬಂಧಿಸಿದ ಸಚಿವಾಲಯಗಳ ಕಾರ್ಯದರ್ಶಿಗಳು, ರಾಜ್ಯ ಸಮಿತಿ ಸದಸ್ಯರು ಸಮಾವೇಶದಲ್ಲಿ ಭಾಗವಹಿಸಿ ಈ ಬಾರಿಯ ಯಾತ್ರೆಯ ಬಗ್ಗೆ ಹಾಗೂ ಮುಂದಿನ ಬಾರಿ ತೆಗೆದುಕೊಳ್ಳಬೇಕಾದ ಕ್ರಮಗಳ ಬಗ್ಗೆ ಚರ್ಚಿಸಿದರು.

ಈ ಬಾರಿ ಒಂದು ಲಕ್ಷ 18 ಸಾವಿರ ಮುಸ್ಲಿಂ ಭಾಂಧವರು ಯಾತ್ರೆ ಕೈಗೊಂಡಿದ್ದರು. ಆ ಪೈಕಿ 72 ಸಾವಿರ ಜನರಿಗೆ ಸರಕಾರದ ಆಡಿಯಲ್ಲಿ ಸೌಲಭ್ಯ ಒದಗಿಸಲಾಗಿದ್ದು, 120ಕೋಟಿ ರುಪಾಯಿಗಳನ್ನು ಖರ್ಚು ಮಾಡಲಾಗಿದೆ. ಹಜ್‌ ಯಾತ್ರಿಕರಿಗೆ ಟಿಕೆಟ್‌ನಲ್ಲಿ ರಿಯಾಯಿತಿ ಸೇರಿದಂತೆ ವಿವಿಧ ಸೌಲಭ್ಯ ಒದಗಿಸುತ್ತಿರುವ ಏಕೈಕ ದೇಶ ಭಾರತ ಎಂದು ಸಚಿವರು ತಿಳಿಸಿದರು.

ವಿದೇಶ ವಿನಿಮಯ ಸಮಸ್ಯೆ ತಪ್ಪಿಸಲು ಯಾತ್ರಿಗಳು ಭಾರತ ಬಿಡುವ ಮುಂಚೆ ಪರಿವರ್ತಿತ ಹಣ ನೀಡಲಾಗುವುದು ಹಾಗೂ ಬೇರೆ ಬೇರೆ ನಗರಗಳಿಂದ ಪ್ರಯಾಣ ಮಾಡಲು ಅನುಕೂಲವಾಗುವಂತೆ ಮತ್ತು ಸೌದಿಯಲ್ಲಿ ತಂಗಲು ಬಾಡಿಗೆಗೆ ಸೂಕ್ತ ಕಟ್ಟಡ ವ್ಯವಸ್ಥೆ ಮಾಡಲಾಗುವುದೆಂದು ಸಚಿವರು ತಿಳಿಸಿದ್ದಾರೆ.