ಸದ್ಯದಲ್ಲೇ ಬೆಂಗಳೂರಲ್ಲಿ ಟಿ.ಎ.ಪೈ ಮ್ಯಾನೇಜ್ಮೆಂಟ್ ಸಂಸ್ಥೆ ಪ್ರಾರಂಭ
ಬೆಂಗಳೂರು : ಮಣಿಪಾಲ್ನ ಟಿ.ಎ. ಪೈ ಮ್ಯಾನೇಜ್ಮೆಂಟ್ ಸಂಸ್ಥೆ (ಟಿಎಪಿಎಂಐ) ಬೆಂಗಳೂರಿನಲ್ಲಿ ಹೊಸ ಕಾಲೇಜು ತೆರೆಯಲಿದೆ.
ಕಾಲೇಜು ತೆರೆಯುವತನಕ ಕೋರ್ಸು ನಡೆಸುವ ಸಲುವಾಗಿ ಸಂಸ್ಥೆ ಎಸ್ಸೆ ಚಂದ್ರನ್ ಇನ್ಸ್ಟಿಟ್ಯೂಟ್ ಜತೆ ಒಪ್ಪಂದ ಮಾಡಿಕೊಂಡಿದ್ದು, ಎರಡು ವರ್ಷಗಳ ಸ್ನಾತಕೋತ್ತರ ಮ್ಯಾನೇಜ್ಮೆಂಟ್ ಕೋರ್ಸನ್ನು ಪ್ರಾರಂಭಿಸಿದೆ. ಟಿಎಪಿಎಂಐ ನಿರ್ದೇಶಕ ಡಿ.ನಾಗಬ್ರಹ್ಮಂ ಸುದ್ದಿಗಾರರಿಗೆ ಈ ವಿಷಯ ತಿಳಿಸಿದರು. ಇನ್ನು 5 ವರ್ಷಗಳಲ್ಲಿ ಸಂಸ್ಥೆಗೆ ಏಷ್ಯಾ ಪೆಸಿಫಿಕ್ ಪ್ರದೇಶದಲ್ಲಿ ಪ್ರತಿಷ್ಠಿತ ಸ್ಥಾನ ದಕ್ಕಿಸಿಕೊಡುವುದು ನಮ್ಮ ಗುರಿಯಾಗಿದೆ. ಉತ್ತಮ ಬೋಧನೆ, ಹೊರೆಯಾಗದ ಶುಲ್ಕ ಹಾಗೂ ಭವಿಷ್ಯದ ಭರವಸೆ ನಮ್ಮ ಸಂಸ್ಥೆಯ ವಿಶೇಷಗಳು ಎಂದರು.
ಸಂಸ್ಥೆ 2 ವರ್ಷದ ಸ್ನಾತಕೋತ್ತರ ತರಗತಿ ಹಾಗೂ ಪಾರ್ಟ್ ಟೈಂ ಎಂಬಿಎ ತರಗತಿಗಳಿಗೆ ಪ್ರವೇಶ ನೀಡಲಿದೆ. ಲಿಖಿತ- ಮೌಖಿಕ ಪರೀಕ್ಷೆ ಹಾಗೂ ಸಮೂಹ ಚರ್ಚೆಗಳ ನಂತರ ಅರ್ಹ ವಿದ್ಯಾರ್ಥಿಗಳಿಗೆ ಪ್ರವೇಶ ನೀಡಲಾಗುವುದು. ಮಾರ್ಕೆಟಿಂಗ್ ಫೈನಾನ್ಸ್, ಸಿಸ್ಟಂಸ್, ಮಾನವ ಸಂಪನ್ಮೂಲ ಹಾಗೂ ಟಿಕ್ಯೂಎಂ ವಿಷಯಗಳನ್ನು ಕೋರ್ಸಿನಲ್ಲಿ ಬೋಧಿಸಲಾಗುವುದು ಎಂದು ನಾಗಬ್ರಹ್ಮಂ ತಿಳಿಸಿದರು.