ಟಾಡಾ ಮೊಕದ್ದಮೆ : ಕಾಯ್ದಿರಿಸಿದ ತೀರ್ಪು

ಮೈಸೂರು : ರಾಜ್‌ ಹಾಗೂ ಇತರ ಮೂವರ ಅಪಹರಣ ಪ್ರಕರಣಕ್ಕೆ ಸಂಬಂಧಿಸಿದಂತೆ 51 ಟಾಡಾ ಆರೋಪಿಗಳ ಮೇಲಿನ ಮೊಕದ್ದಮೆ ಕೈಬಿಡುವ ಅರ್ಜಿಯ ವಿಚಾರಣೆ ನಡೆಸುತ್ತಿರುವ ಮೈಸೂರಿನ ಟಾಡಾ ವಿಶೇಷ ನ್ಯಾಯಾಲಯ ಗುರುವಾರ ತನ್ನ ತೀರ್ಪು ಕಾಯ್ದಿರಿಸಿದೆ. ತೀರ್ಪು 19ರಂದು ಹೊರಬೀಳಲಿದೆ.

ವೀರಪ್ಪನ್‌ ಸಹಚರರಿಂದ ಹತ್ಯೆಗೀಡಾದ ಪೊಲೀಸ್‌ ಅಧಿಕಾರಿ ಶಖೀಲ್‌ ಅಹ್ಮದ್‌ ಅವರ ತಂದೆ ಅಬ್ದುಲ್‌ ಖರೀಂ ಅವರು ಟಾಡಾ ಮೊಕದ್ದಮೆಗಳನ್ನು ಕೈಬಿಡುವ ಸರಕಾರದ ನಿರ್ಧಾರದ ವಿರುದ್ಧ ತಕರಾರು ಅರ್ಜಿ ಸಲ್ಲಿಸಿದ್ದು, ಅವರ ಪರ ನ್ಯಾಯವಾದಿ ರಾಮಕೃಷ್ಣ ಗುರುವಾರ ತಮ್ಮ ವಾದ ಮಂಡಿಸಿದರು. ಹಲವು ದುಷ್ಕೃತ್ಯಗಳಲ್ಲಿ ಭಾಗಿಯಾದವರನ್ನು ಬಿಟ್ಟುಬಿಡುವುದು ಸೂಕ್ತವಲ್ಲ ಎಂದ ಅವರು ಟಾಡಾ ಮೊಕದ್ದಮೆಗಳನ್ನು ಕೈಬಿಡಲು ಕೇಂದ್ರ ಸರಕಾರದ ಅನುಮತಿ ಪಡೆಯಬೇಕಾಗುತ್ತದೆ ಎಂದೂ ವಾದಿಸಿದರು.

ರಾಮಕೃಷ್ಣ ಅವರ ಈ ವಾದವನ್ನು ನ್ಯಾಯವಾದಿಗಳಾದ ರವೀಂದ್ರ ಹಾಗೂ ಮಂಜುನಾಥ್‌ ಅವರು ಬೆಂಬಲಿಸಿದರು. ರಾಜ್‌ಕುಮಾರ್‌ ಅವರನ್ನು ಅಪಹರಿಸಿರುವ ವೀರಪ್ಪನ್‌ ಬೇಡಿಕೆಗಳಲ್ಲಿ ಟಾಡಾ ಮೊಕದ್ದಮೆ ಎದುರಿಸುತ್ತಿರುವ ತನ್ನ 51 ಸಹಚರರನ್ನು ಬಿಡಬೇಕು ಎಂಬುದೂ ಒಂದಾಗಿದೆ.