ಬರಲಿದೆ 500ರು. ಹೊಸ ನೋಟು

ನವದೆಹಲಿ : 500ರ ನೋಟು ಕಂಡರೇ ಬೆಚ್ಚಿ ಬೀಳುವವರಿದ್ದಾರೆ. 500ರ ನೋಟುಗಳಲ್ಲಿ ಅಸಲಿ ಯಾವುದು? ನಕಲಿ ಯಾವುದು ಎಂದು ತಿಳಿಯುವುದೇ ಕಷ್ಟವಾಗಿದೆ. ದೇಶದ ಕೆಲವೆಡೆಗಳಲ್ಲಿ ತಮಗೆ ವ್ಯಾಪಾರ ಆಗದಿದ್ದರೂ ಅಡ್ಡಿಯಿಲ್ಲ 500ರುಪಾಯಿ ನೋಟು ಮಾತ್ರ ಸ್ವೀಕರಿಸುವುದಿಲ್ಲ ಎನ್ನುವವರೂ ಇದ್ದಾರೆ.

ಇದನ್ನು ಮನಗಂಡಿರುವ ಭಾರತೀಯ ರಿಸರ್ವ್‌ ಬ್ಯಾಂಕ್‌ ಜನರ ಈ ಆತಂಕವನ್ನು ದೂರ ಮಾಡಲು ಹೊಸ ಮಾದರಿಯ 500ರುಪಾಯಿ ನೋಟುಗಳನ್ನು ಶೀಘ್ರದಲ್ಲೇ ಬಿಡುಗಡೆ ಮಾಡಲು ನಿರ್ಧರಿಸಿದೆ. ಈ ಹೊಸ ನೋಟುಗಳು ಇನ್ನೂ ಹೆಚ್ಚುವರಿ ಭದ್ರತೆ ಒದಗಿಸಲಿದ್ದು, ಖೋಟಾ ನೋಟು ಹಾವಳಿ ತಪ್ಪಿಸಲಿದೆ.

ಆರಂಭದಲ್ಲಿ 1987ರಲ್ಲಿ ಬಿಡುಗಡೆ ಮಾಡಲಾಗಿರುವ 500 ರುಪಾಯಿ ನೋಟುಗಳಿಗೆ ಈ ಹೊಸ ನೋಟುಗಳನ್ನು ಬದಲಾಯಿಸಿಕೊಡಲು ನಿರ್ಧರಿಸಲಾಗಿದೆ. ಈ ವಿಷಯವನ್ನು ಕೇಂದ್ರ ಹಣಕಾಸು ಸಚಿವಾಲಯದ ಮೂಲಗಳು ತಿಳಿಸಿವೆ.