ಅಪ್ಪಾಜಿ ಆದಷ್ಟು ಬೇಗ ಹಿಂತಿರುಗುತ್ತಾರೆ : ಶಿವರಾಜ್‌ ಕುಮಾರ್‌

ಬೆಂಗಳೂರು : ವೀರಪ್ಪನ್‌ ಅಪಹರಿಸಿರುವ ನಮ್ಮ ನಿಮ್ಮೆಲ್ಲರ ಪ್ರೀತಿಪಾತ್ರರಾದ ನಮ್ಮ ಅಪ್ಪಾಜಿ ಆದಷ್ಟು ಬೇಗ ಹಿಂತಿರುಗುತ್ತಾರೆ ಎಂದು ರಾಜ್‌ಕುಮಾರ್‌ ಅವರ ಪುತ್ರ ಶಿವರಾಜಕುಮಾರ್‌ ಶನಿವಾರ ಇಲ್ಲಿ ತಿಳಿಸಿದ್ದಾರೆ.

ರಾಜ್‌ಕುಮಾರ್‌ ಬಿಡುಗಡೆಗೆ ಒತ್ತಾಯಿಸಿ ಸದಾಶಿವನಗರದ ತಮ್ಮ ಮನೆಯ ಮುಂದೆ ಧರಣಿ ನಡೆಸುತ್ತಿರುವ ಕನ್ನಡ ಸಂಘಟನೆಗಳ ಕಾರ್ಯಕರ್ತರಿಗೆ ಶಿವರಾಜ್‌ಕುಮಾರ್‌ ಈ ಭರವಸೆ ನೀಡಿದ್ದಾರೆ. ಅಪ್ಪಾಜಿಯವರಿಗೆ ಯಾವುದೇ ರೀತಿಯ ಅಪಾಯ ಆಗುವುದಿಲ್ಲ, ಅವರು ಸುರಕ್ಷಿತವಾಗಿದ್ದಾರೆ ಹಾಗೂ ಆರೋಗ್ಯವಾಗಿದ್ದಾರೆ. ವೀರಪ್ಪನ್‌ ಅಪ್ಪಾಜಿಯವರನ್ನು ಚೆನ್ನಾಗಿ ನೋಡಿಕೊಳ್ಳುತ್ತಿದ್ದಾನೆ ಎಂದು ತಮಗೆ ಕಾಡಿನಿಂದ ಹಿಂತಿರುಗಿರುವ ಸಂಧಾನಕಾರ ಗೋಪಾಲ್‌ ತಿಳಿಸಿದರೆಂದು ಶಿವರಾಜ್‌ಕುಮಾರ್‌ ಹೇಳಿದ್ದಾರೆ.

ನಾವೆಲ್ಲ ಈಗ ತಾಳ್ಮೆಯಿಂದ ಇರಬೇಕು. ಅಪ್ಪಾಜಿಯವರೂ ನಮ್ಮೆಲ್ಲರಿಂದ ಬಯಸುವುದು ಶಾಂತಿಯನ್ನೇ. ಅವರಿಗೆ ನಮ್ಮೆಲ್ಲರ ಕ್ಷೇಮದ ಬಗ್ಗೆ ಕಾಳಜಿ ಇದೆ. ಅಪ್ಪಾಜಿಯವರ ಮನವಿಗೆ ನಾವೆಲ್ಲ ಗೌರವ ಕೊಡೋಣ, ದೇವರಿದ್ದಾನೆ ಅಪ್ಪಾಜಿ ಖಂಡಿತಾ ಸುರಕ್ಷಿತವಾಗಿ ಹಿಂತಿರುಗುತ್ತಾರೆ ಎಂದು ಶಿವರಾಜ್‌ಕುಮಾರ್‌ ಕಾರ್ಯಕರ್ತರಿಗೆ ಮನವಿ ಮಾಡಿಕೊಂಡರು.

ಈ ಮಧ್ಯೆ ಐಟಿಐ ಕನ್ನಡ ಸಂಘದ ಸದಸ್ಯರು ರಾಜ್‌ಕುಮಾರ್‌ ಅವರ ಬಿಡುಗಡೆಗೆ ಒತ್ತಾಯಿಸಿ ಶನಿವಾರ ಮಧ್ಯಾಹ್ನ ಮುಖ್ಯಮಂತ್ರಿ ಎಸ್‌.ಎಂ. ಕೃಷ್ಣ ಅವರ ಅಧಿಕೃತ ನಿವಾಸದ ಎದುರು ಧರಣಿ ನಡೆಸಿದರು. ರಾಜ್ಯಾದ್ಯಂತ ನಾನಾ ಕಡೆ ರಾಜ್‌ಕುಮಾರ್‌ ಅವರ ಬಿಡುಗಡೆಗೆ ಒತ್ತಾಯಿಸಿ ಪ್ರತಿಭಟನೆಗಳು ನಡೆದಿವೆ. ದೇವಾಲಯಗಳಲ್ಲಿ ವಿಶೇಷ ಪೂಜೆ ನಡೆಯುತ್ತಲೇ ಇವೆ.