ನಿರ್ಮಲೆ ಜೀವದ ಸೆಲೆ ನಮ್ಮಮ್ಮ

ಗುಡಿಯಲಿ ಕುಳಿತು ಅಭಯ ಹಸ್ತ ತೋರುವವಳಲ್ಲ ವರಗಳ ಕೊಡುವವಳಲ್ಲ

ಗದ್ದೆ ಕಚೇರಿ ಶಾಲೆ ಮನೆಮಠಗಳಲಿ ದುಡಿದು ಹಿಟ್ಟು ನಾದಿ ಹೊಟ್ಟೆಗ್ಹಾಕುವವಳು

ರುಂಡಗಳ ಚೆಂಡಾಡುವ ರಣಚೆಂಡಿಯಲ್ಲ ರಕ್ತ ಕುಡಿವ ಕಾಳಿಯಲ್ಲ
ಬೊಬ್ಬಿರಿವ ಗಾಳಿಯಲಿ ಅಬ್ಬರದ ಅಲೆಗಳಲಿ ಹೂ ನಗೆ ಬೀರುವವಳು

ಚಂಚಲ ಚಪಲೆಯಲ್ಲ ವೆಂಕಟನ ರಮಣಿಯಲ್ಲ ವೀಣಾ ವಾಣಿಯಲ್ಲ
ಸಂಸಾರದೀಜಲು ನಾಲ್ಕಕ್ಷರ ಕಲಿತವಳು ಕಾಯಕವೇ ಕೈಲಾಸವೆನುವವಳು

ವಿಶ್ವದ ಒಗಟು ಒಡೆಯುವವಳಲ್ಲ ಅಧ್ಯಾತ್ಮ ಅನುಭಾವವೆನುವವಳಲ್ಲ
ತನ್ನೊಡಲಲಿ ಬೀಜ ಮೊಳೆಸಿ ನಮ್ಮನೆಲ್ಲ ಹಡೆದು ಸಾಕಿ ಸಲಹುವವಳು

ಪಂಚಭೂತಗಳನರಿಯದೆ ಗರ್ಭದಲಿ ಹೊಸೆದು ಜೀವ ತುಂಬುವವಳಮ್ಮ
ಸಹನೆ ಶಾಂತಲೆ ಶೀತಲೆ ಕೋಮಲೆ ನಿರ್ಮಲೆ ಜೀವದ ಸೆಲೆ ನಮ್ಮಮ್ಮ