ನೋವು ನಲಿವಿನ ಮಿಲನ ಕವನ

ನಕ್ಕು ಬಿಡು ಗೆಳೆಯಾ
ಹಗುರಾಗಲಿ ಹೃದಯಾ

ವುಕ್ಕಿ ಬರುತಿಹ ದುಃಖ
ಸೊಕ್ಕಿ ಮೆರೆಯುವ ಮುನ್ನ
ನಕ್ಕೊಮ್ಮೆ ಹೇಳಿಬಿಡು
ಬದುಕಲ್ಲ ಶೂನ್ಯ

ನೋವ ಮರೆತಾ ಗಳಿಗೆ
ನಾಕ ಬಂದಿದೆ ಬಳಿಗೆ
ಮನಬಿಚ್ಚಿ ನಕ್ಕುಬಿಡು
ಎದೆ ಭಾರ ಇಳಿಸಿಬಿಡೋ

ಹೊಸಹುಟ್ಟ ಹಿಂದಿಹುದು
ಪ್ರಸವ ವೇದನೆ ತಾನೆ?
ವುಕ್ಕಿಬರುತಿಹ ನಗೆಗೆ
ಮಾಪಕವು ಅಳು ತಾನೆ?

ನಸು ನಕ್ಕು ತುಸು ಮುಂದೆ
ಹುಸಿನೋವ ಮರೆತಂತೆ
ಬದುಕು ಹಸನಾಗುವುದು
ಬಲವು ಮೈ ಗೂಡುವುದು

ಜೀವಕಲ್ಲವೇ ನೋವು
ಜಡಕೆ ಬರಬಹುದೇನು?
ನೋವು ನಲಿವಿನ ಮಿಲನ
ಇದುವೇ ಬದುಕಿನ ನಿಯಮ