‘ನೂರೊಂದು ’ನಮನ

• ಚೆನ್ನವೀರ ಕಣವಿ

ನೀವು ಮೆಲ್ಲಗೆ ಬಂದು ಎದುರು ಬಂದು ಕುಳಿತರೆ ಸಾಕು

ಸಭೆಗೊಂದು ಗಾಂಭೀರ್ಯ; ತಿಳಿನಗೆ ಸೂಸುಪಾರ್ಯ

ನೆನಪಿನ ಗಣಿಯ ಮಣಿಯ ಹೊರತರುವುದನಿವಾರ್ಯ

ಶತಮಾನದಿತಿಯಾಸ ಬಿಚ್ಚಿ -ಕಟ್ಟುವ ಮೆಲುಕು

ವೃತ್ತಿ-ಪ್ರವೃತ್ತಿ-ನ್ಯಾಯ ನಿಷ್ಠುರತೆ? ನಿಟ್ಟೂರು

ಬೋಧೆ-ಬರವಣಿಗೆ -ಪ್ರಕಾಶನ-ಸತ್ಯಶೋಧನೆ

ಸಾಮಾನ್ಯರೊಡನೆ ಬೆರೆತು ನುರಿತ ಸವಿಚಿಂತನೆ

ಶಾಂತಿ ಚಳವಳಿಗೆ ಬಳುವಳಿ ಮಾನವ ಹಕ್ಕು

ಕಿರಿಯರಾದರು ಕಲಿಯಬಹುದೆಂಬ ಹಿರಿಯ ಗುಣ

ಕಲೆ-ಸಾಹಿತ್ಯ-ಸಂಸ್ಕೃತಿ; ಸದಾ ಸಂವಾದಿ

ಎಲ್ಲಾ ಹದಗೆಟ್ಟಿಲ್ಲ ಎಂಬ ಆಶಾವಾದಿ

ಒಟ್ಟಾಗಿ ನಿಂತು ನೈತಿಕ ಮಟ್ಟವೆತ್ತೋಣ

ಪ್ರಜಾಸತ್ತೆಗೆ ನೀಡಿ ಪರಿಶುದ್ಧತೆಯ ದೀಕ್ಷೆ

ನೂರಕ್ಕೆ ನೂರು ನಿಮ್ಮದೇ ಚಾರಿತ್ರ್ಯ-ನಕ್ಷೆ

(ನಿಟ್ಟೂರರಿಗೆ ನೂರು ತುಂಬಿದ ಸಂದರ್ಭದಲ್ಲಿ ಬರೆದದ್ದು)

ಮುಖಪುಟ / ಸಾಹಿತ್ಯ-ಸಂಸ್ಕೃತಿ