ಪ್ರತಿದಿನ ಗುಡೀಗಾ? ಯಾಕೆ? ಅದೂ ಬೆಳಿಗ್ಗೆ ಸಂಜೆ?
ಪ್ರೇಮಿಗಳಿಬ್ಬರೂ ಕಬ್ಬನ್ ಪಾರ್ಕ್ ನಲ್ಲಿರುವ ಆಲದ ಮರದ ಕೆಳಗೆ ಇರುವ ಬೆಂಚಿನ ಮೇಲೆ ಕುಳಿತು, ಕೈಯಲ್ಲಿ ಕೈಯನ್ನು ಹಿಡಿದುಕೊಂಡು ಮಾತನಾಡುತ್ತಿರುತ್ತಾರೆ. ಯುವಕನ ಹೆಗಲ ಮೇಲೆ ತಲೆಯನ್ನಿಟ್ಟು ಯುವತಿ ಮಾತಿಗೆ ಶುರು ಹಚ್ಚಿಕೊಳ್ಳುತ್ತಾಳೆ.
ಯುವತಿ : ಈ ವಾರ ಪೂರ್ತಿ ಪ್ರತಿದಿನ ಎರಡೆರಡು ಸಿನೆಮಾ ನೋಡೋಣ. ಏನಂತೀಯಾ? ಅದರ ಮುಂದಿನ ವಾರ ಪ್ರತಿದಿನ ಸಂಜೆ ಶಾಪಿಂಗ್ ಹೋಗೋಣ, ಏನಂತೀಯಾ?
ಯುವಕ : ಓಕೆ ಡಾರ್ಲಿಂಗ್. ಅದರ ಮುಂದಿನ ವಾರ ಪ್ರತಿದಿನ ಬೆಳಿಗ್ಗೆ ಮತ್ತು ಸಂಜೆ ಇಲ್ಲೇ ಹತ್ತಿರದಲ್ಲಿದೆಯಲ್ಲ ಗುಡಿಗೆ ಹೋಗೋಣ. ಏನಂತೀಯಾ?
ಯುವತಿ : ಗುಡೀಗಾ? ಯಾಕೆ? ಅದೂ ಪ್ರತಿದಿನ? ಇಬ್ಬರಿಗೂ ಬೇಗನೆ ಮದುವೆ ಆಗಲಿ ಅಂತ ಬೇಡಿಕೊಳ್ಳುವುದಕ್ಕಾ?
ಯುವಕ : ಅಲ್ಲ, ಭಿಕ್ಷೆ ಬೇಡೋದಕ್ಕೆ!
***
ಪುಟ್ಟನಿಗೆ ವಿಚಿತ್ರವಾದ ಪ್ರಶ್ನೆಯೊಂದು ಕಾಡಲು ಶುರು ಮಾಡುತ್ತದೆ. ಅಮ್ಮನ ಬಳಿಗೆ ಬಂದು ಕೇಳೇಬಿಡುತ್ತಾನೆ.
ಪುಟ್ಟ : ಅಮ್ಮ ಅಮ್ಮ, ನಿನ್ನ ತಲೆಯಲ್ಲಿ ಬಿಳಿ ಕೂದಲು ಯಾಕೆ ಆಗುತ್ತಿದೆ?
ಈ ಪ್ರಶ್ನೆ ಕೇಳಿ ಕ್ಷಣ ಏನು ಹೇಳಬೇಕೆಂದು ಅಮ್ಮನಿಗೆ ತಿಳಿಯದಿದ್ದರೂ, ಈ ಪ್ರಶ್ನೆಯನ್ನು ಮುಂದಿಟ್ಟುಕೊಂಡು ಆತನ ತುಂಟತನ ನಿಯಂತ್ರಣದಲ್ಲಿ ಇಡಬೇಕೆಂದು ಒಂದು ನಿರ್ಧಾರಕ್ಕೆ ಬಂದಳು.
ಅಮ್ಮ : ಇನ್ನೇನೋ ಮತ್ತೆ. ನೀನು ಮಾಡೋ ತುಂಟತನ ನೋಡಿ ನೋಡಿ, ಬೇಜಾರಾಗಿ, ಚಿಂತೆ ಜಾಸ್ತಿಯಾಗಿ, ತಲೆಯಲ್ಲಿನ ಕೂದಲೆಲ್ಲ ಬಿಳಿಯಾಗಲು ಪ್ರಾರಂಭಿಸಿವೆ.
ಪುಟ್ಟ : ಓಹೋ ಹಾಗಾ.
ಅಮ್ಮ : ಈಗಲಾದರೂ ಗೊತ್ತಾಯ್ತಲ್ಲ? ಅಮ್ಮನ ತಲೆಗೂದಲು ಬಿಳಿಯಾಗಬಾರದಿದ್ದರೆ ನೀನು ತುಂಟತನ ನಿಲ್ಲಿಸಲೇಬೇಕು, ಗೊತ್ತಾಯ್ತಾ?
ಪುಟ್ಟ : ಹೀಗೋ ಸಮಾಚಾರ, ನಿಮ್ಮಮ್ಮ ಅಂದ್ರೆ ಅಜ್ಜಿ ತಲೆ ತುಂಬ ಬಿಳಿ ಕೂದಲು ಯಾಕಾಗಿದೆ ಎಂಬ ಪ್ರಶ್ನೆಗೂ ಉತ್ತರ ಸಿಕ್ಕಿತು ಬಿಡು!
Click it and Unblock the Notifications
Sign in with Google