ಶಿಕ್ಷಣ ಇಲಾಖೆ; ಬೋಧಕೇತರ ವೃಂದದ 279 ಹುದ್ದೆಗಳು ತಕ್ಷಣದಿಂದ ರದ್ದು

ಸಾರ್ವಜನಿಕ ಶಿಕ್ಷಣ ಇಲಾಖೆ ಆಯುಕ್ತರು ಬೋಧಕೇತರ ವೃಂದದ 279 ಹುದ್ದೆಗಳನ್ನು ರದ್ದುಗೊಳಿಸುವ ಬಗ್ಗೆ ಆದೇಶ ಹೊರಡಿಸಿದ್ದಾರೆ.

ಬೆಂಗಳೂರು, ಫೆಬ್ರವರಿ 15; ಕರ್ನಾಟಕ ಸರ್ಕಾರ ಕರ್ನಾಟಕ ಪಬ್ಲಿಕ್‌ ಶಾಲೆಗಳಿಗೆ ಮುಖ್ಯೋಪಾಧ್ಯಾಯರ ವೃಂದದ 58 ಹುದ್ದೆಗಳ ಮಂಜೂರಾತಿ ಸಂಬಂಧ ಸರ್ಕಾರದ ಆದೇಶದಲ್ಲಿನ ಷರತ್ತಿನಂತೆ ಬೋಧಕೇತರ ವೃಂದದ 279 ಹುದ್ದೆಗಳನ್ನು ರದ್ದುಗೊಳಿಸುವ ಬಗ್ಗೆ ಆದೇಶ ಹೊರಡಿಸಿದೆ.

ಸಾರ್ವಜನಿಕ ಶಿಕ್ಷಣ ಇಲಾಖೆ ಆಯುಕ್ತ ಡಾ. ವಿಶಾಲ್. ಆರ್ ಈ ಕುರಿತು ಆದೇಶ ಹೊರಡಿಸಿದ್ದಾರೆ. ದಿನಾಂಕ 19/01/2023ರಂದು ಬೆಂಗಳೂರಿನಲ್ಲಿ ನಡೆದ ಸಭೆಯ ನಡಾವಳಿ, ಅಪರ ಆಯುಕ್ತರ ಕಲಬುರಗಿ ಮತ್ತು ಧಾರವಾಡದ ನಿರ್ದೇಶಕರು ಡಿ. ಎಸ್‌. ಇ. ಆರ್. ಟಿ., ಕೆ. ಎಸ್. ಇ. ಎ. ಬಿ, ಕೆಟಿ. ಬಿ. ಎಸ್. ಹಾಗೂ ಜಿಲ್ಲಾ ಉಪನಿರ್ದೇಶಕರುಗಳಿಂದ ಸ್ವೀಕೃತವಾಗಿರುವ ಪ್ರಸ್ತಾವನೆಗಳ ಉಲ್ಲೇಖ ಈ ಆದೇಶ ಹೊರಡಿಸಲಾಗಿದೆ.

ಸಾರ್ವಜನಿಕ ಶಿಕ್ಷಣ ಇಲಾಖೆಯಲ್ಲಿ ಕರ್ನಾಟಕ ಪಬ್ಲಿಕ್ ಶಾಲೆಯ ಮುಖ್ಯೋಪಾಧ್ಯಾಯರು/ ಉಪ ಪ್ರಾಂಶುಪಾಲರ ವೃಂದದ 58 ಹುದ್ದೆಗಳನ್ನು ಸೃಜಿಸಲು ಬೋಧಕೇತರ ವೃಂದದ 279 ಹುದ್ದೆಗಳನ್ನು ತಕ್ಷಣದಿಂದ ಜಾರಿಗೆ ಬರುವಂತೆ ರದ್ದುಪಡಿಸಿ ಆದೇಶಿಸಲಾಗಿದೆ ಎಂದು ತಿಳಿಸಲಾಗಿದೆ.

ಯಾವ-ಯಾವ ಹುದ್ದೆಗಳು; ಶೀಘ್ರಲಿಪಿಗಾರ 50, ಹಿರಿಯ ಬೆರಳಚ್ಚುಗಾರ 29, ದ್ವಿತೀಯ ದರ್ಜೆ ಸಹಾಯಕ 100, ಕ್ಲರ್ಕ್-ಕಂ-ಡಾಟಾ ಎಂಟ್ರಿ ಆಪರೇಟರ್ 50, ಬೆರಳಚ್ಚುಗಾರ 50 ಸೇರಿ 279 ಹುದ್ದೆಗಳನ್ನು ರದ್ದುಗೊಳಿಸಲಾಗಿದೆ.

ಈ ಕುರಿತ ಆದೇಶ ಹೀಗಿದೆ, ಪ್ರಸ್ತಾವನೆಯಲ್ಲಿ ವಿವರಿಸಿರುವ ಅಂಶಗಳಂತೆ ಒಟ್ಟು 279 ಬೋಧಕೇತರ ವೃಂದದ ಹುದ್ದೆಗಳನ್ನು ತಕ್ಷಣದಿಂದ ಜಾರಿಗೆ ಬರುವಂತೆ ರದ್ದುಪಡಿಸಿ ಆದೇಶಿಸಿದೆ. ಹುದ್ದೆವಾರು ಮಾಹಿತಿಯನ್ನು ಮಾಹಿತಿಯನ್ನು ಲಗತ್ತಿಸಿದೆ ಎಂದು ಹೇಳಿದೆ.

ಪ್ರಸ್ತಾವನೆ ಏನಿತ್ತು?; ಸರ್ಕಾರದ ಆದೇಶದಲ್ಲಿ ರದ್ದತಿಗೊಳಿಸಿರುವ ವಿವಿಧ ಬೋಧಕೇತರ ಹುದ್ದೆಗಳ ಸಂಬಂಧ ಶಾಲೆ/ ಕಛೇರಿಗಳಲ್ಲಿ ಮಂಜೂರಾಗಿರುವ ಆಯಾ ವೃಂದದ ಒಟ್ಟಾರೆ ಹುದ್ದೆಗಳ ಮಾಹಿತಿಯನ್ನು ಮತ್ತು ಶಾಲಾ/ ಕಛೇರಿಗಳಲ್ಲಿ ರದ್ದುಗೊಳಿಸಬಹುದಾದ ಒಟ್ಟಾರೆ ಹುದ್ದೆಗಳ ಮಾಹಿತಿಯನ್ನು ಆಯಾ ಜಿಲ್ಲಾ ಉಪನಿರ್ದೇಶಕರುಗಳಿಂದಲೂ ಮತ್ತು ಈ ಬಗ್ಗೆ ಆಯಾ ವಿಭಾಗೀಯ ಸಹನಿರ್ದೇಶಕರುಗಳಿಂದ ಪೂರಕ ವರದಿಗಳನ್ನು ಪಡೆಯಲಾಗಿರುತ್ತದೆ.

ಹಾಗೇಯೇ, ರಾಜ್ಯ ಮಟ್ಟದ ಕಛೇರಿಗಳಲ್ಲಿ ರದ್ದುಪಡಿಸಬಹುದಾದ ಹುದ್ದೆಗಳಿದ್ದಲ್ಲಿ ಆಯಾ ಕಛೇರಿ ಮುಖ್ಯಸ್ಥರುಗಳಿಂದ ವರದಿಗಳನ್ನು ಪಡೆಯಲಾಗಿದೆ. ಸದರಿ ಮಾಹಿತಿಗಳನ್ನು ಅವಲೋಕಿಸಿ ರೂಪದ ನೀತಿಯನ್ನು ಅಳವಡಿಸಿಕೊಳ್ಳಲಾಗಿದೆ.

* ರಾಜ್ಯದ ಡಯಟ್ ಹಾಗೂ ಸಿ.ಟಿ.ಇ ಗಳಲ್ಲಿನ ಶೀಘ್ರಲಿಪಿಗಾರರ ಹುದ್ದೆಗೆ ಸಂಬಂಧ ಪಟ್ಟಂತೆ ರಾಜ್ಯ ಶಿಕ್ಷಣ ಸಂಶೋಧನೆ ಮತ್ತು ತರಬೇತಿ ನಿರ್ದೇಶನಾಲಯದ ವರದಿಯನ್ನು ಪಡೆಯಲಾಗಿದೆ. ವರದಿಯಂತೆ ಶೀಘ್ರಲಿಪಿಗಾರರ ಹುದ್ದೆಯನ್ನು ಏಕರೂಪವಾಗಿ ಎಲ್ಲಾ ಡಯಟ್‌ಗಳಲ್ಲಿ ರದ್ದುಪಡಿಸಬಹುದಾಗಿದೆ. ಡಯಟ್/ ಸಿ.ಟಿ.ಇನ ಒಟ್ಟು 33 ಹುದ್ದೆಗಳು ರದ್ದುಗೊಳ್ಳಲಿವೆ.

* ಕೇಂದ್ರ ಕಛೇರಿಗಳಲ್ಲಿನ ಹುದ್ದೆಗಳಿಗೆ ಸಂಬಂಧಪಟ್ಟಂತೆ ವರದಿಗಳನ್ನು ಪಡಯಲಾಗಿದ್ದು ಖಾಲಿ ಇರುವ ಒಟ್ಟು 17 ಶೀಘ್ರಲಿಪಿಗಾರರ ಹುದ್ದೆಗಳನ್ನು ರದ್ದುಪಡಿಸಬಹುದಾಗಿದೆ.

* ಬೆರಳಚ್ಚುಗಾರರು/ ಹಿರಿಯ ಬೆರಳಚ್ಚುಗಾರರು, ದ್ವಿತೀಯ ದರ್ಜೆ ಸಹಾಯಕರು, ಮತ್ತು ಕ್ಲರ್ಕ್-ಕಂ-ಡಾಟಾ ಎಂಟ್ರಿ ಆಪರೇಟರ್ ಹುದ್ದೆಗಳ ಮಾಹಿತಿ ವರದಿಗಳನ್ನು ಅವಲೋಕಿಸಲಾಗಿದೆ. ಯಾವುದೇ ಶಾಲೆಯಲ್ಲಿ ಕಡಿಮೆ ದಾಖಲಾತಿ ಇದ್ದು ಒಂದಕ್ಕಿಂತ ಹೆಚ್ಚು ಹುದ್ದೆ ಮಂಜೂರಾಗಿದ್ದು ಹೆಚ್ಚುವರಿ ಎಂಬುದಾಗಿ ಗುರುತಿಸಿ ರದ್ದುಪಡಿಸಲು ಉಪನಿರ್ದೇಶಕರು ಹಾಗೂ ಕಛೇರಿ ಮುಖ್ಯಸ್ಥರು ಅಭಿಪ್ರಾಯಿಸಿರುವಂತೆ ಪರಿಶೀಲಿಸಿದೆ.

* ಬೆರಳಚ್ಚುಗಾರರು/ ಹಿರಿಯ ಬೆರಳಚ್ಚುಗಾರರು ಮತ್ತು ದ್ವಿತೀಯ ದರ್ಜೆ ಸಹಾಯಕರು ಮತ್ತು ಕ್ಲರ್ಕ್-ಕಂ- ಡಾಟಾ ಎಂಟ್ರಿ ಆಪರೇಟರ್ ಹುದ್ದೆಗಳು ನಿಗದಿತ ಪ್ರಮಾಣದಲ್ಲಿ ರದ್ಧತಿಗೆ ದೊರೆತಿರುವುದಿಲ್ಲ. ಆದರೆ ಪಮಾಣಕ್ಕಿಂತ ಹೆಚ್ಚುವರಿ ಸಂಖ್ಯೆಯಲ್ಲಿ ದ್ವಿ.ದ.ಸ ಹುದ್ದೆಗಳನ್ನು ರದ್ದತಿಗೆ ಪ್ರಸ್ತಾಪಿಸಿರುತ್ತಾರೆ.

ಈ ಅಂಶಗಳನ್ನು ಪರಿಶೀಲಿಸಿ ದ್ವಿತೀಯ ದರ್ಜೆ ಸಹಾಯಕರು, ಬೆರಳಚ್ಚುಗಾರರು/ ಹಿರಿಯ ಬೆರಳಚ್ಚುಗಾರರು, ದ್ವಿತೀಯ ದರ್ಜೆ ಸಹಾಯಕರು, ಮತ್ತು ಕ್ಲರ್ಕ್ ಕಂ ಡಾಟಾ ಎಂಟ್ರಿ ಆಪರೇಟರ್ ಹುದ್ದೆಗಳು ಸಮಾನಾಂತರ ವೇತನ ಶ್ರೇಣಿಯಿರುವ ಹುದ್ದೆಗಳಾಗಿದ್ದು ದ್ವಿ.ದ.ಸ ಹುದ್ದೆಗಳಲ್ಲಿ ಹೆಚ್ಚುವರಿಯಾಗಿ ರದ್ಧತಿಗೆ ದೂರೆತಿರುವ 05 ಹುದ್ದೆಗಳನ್ನು ಬೆರಳಚ್ಚುಗಾರರು/ ಹಿರಿಯ ಬೆರಳಚ್ಚುಗಾರರು ಮತ್ತು ಕ್ಲರ್ಕ್ ಕಂ ಡಾಟಾ ಎಂಟ್ರಿ ಆಪರೇಟರ್ ಹುದ್ದೆಗಳ ಕೊರತೆಗೆ ಸರಿದೂಗಿಸಬಹುದಾಗಿದೆ.

* ಒಟ್ಟು 50 ಶೀಘ್ರಲಿಪಿಗಾರರು, 105 ದ್ವಿ.ದ.ಸ, 76 ಬೆರಳಚ್ಚುಗಾರರು/ ಹಿರಿಯ ಬೆರಳಚ್ಚುಗಾರರು, 48 ಕ್ಲರ್ಕ್ ಕಂ ಡಾಟಾ ಎಂಟ್ರಿ ಆಪರೇಟರ್ (ಸಿ.ಸಿಟಿ) ಹುದ್ದೆಗಳನ್ನು ರದ್ದುಪಡಿಸಬಹುದಾಗಿದೆ.

* ರದ್ದುಪಡಿಸಬಹುದಾದ ಹುದ್ದೆಗಳಲ್ಲಿ ಕರ್ತವ್ಯ ನಿರತ ಸಿಬ್ಬಂದಿಯನ್ನು ಹತ್ತಿರದ ಖಾಲಿ ಹುದ್ದೆಗೆ ಅಥವಾ ಖಾಲಿ ಹುದ್ದೆ ಲಭ್ಯವಿಲ್ಲದೇ ಇದ್ದಲ್ಲಿ ಸಮಾನ ವೃಂದಕ್ಕೆ ಸ್ಥಳಾಂತರಿಸಬಹುದಾಗಿದೆ. ಒಟ್ಟಾರೆ 279 ಬೋಧಕೇತರ ವಿವಿಧ ವೃಂದದ ಹುದ್ದೆಗಳನ್ನು ಗುರುತಿಸಿ ಕೆಳಕಂಡಂತೆ ರದ್ದು ಪಡಿಸಿ ಆದೇಶಿಸಲಾಗಿದೆ.

ವರದಿ ಸಲ್ಲಿಕೆಗೆ ಸೂಚನೆ; ಈ ಬಗ್ಗೆ ಆಯಾ ಕಛೇರಿ ಮುಖ್ಯಸ್ಥರು ಕೆಳಕಂಡ ಕ್ರಮಗಳನ್ನು ತುರ್ತಾಗಿ ಕೈಗೊಂಡು ವರದಿಯನ್ನು ಸಲ್ಲಿಸಬೇಕು ಎಂದು ಸೂಚಿಸಲಾಗಿದೆ.

* ಆಯಾ ಕಛೇರಿ ಮುಖ್ಯಸ್ಥರು ಹಾಗೂ ಸಂಬಂಧಪಟ್ಟ ನಿರ್ದೇಶಕರು, ಸಹ ನಿರ್ದೇಶಕರು, ಹಾಗೂ ಜಿಲ್ಲಾ ಉಪ ನಿರ್ದೇಶಕರು ಅನುಬಂಧದಲ್ಲಿನ ಹುದ್ದೆಗಳನ್ನು ಪರಿಶೀಲಿಸಿಕೊಳ್ಳತಕ್ಕದ್ದು.

* ಖಾಲಿ ಹುದ್ದೆಗಳು ಮತ್ತು ಕಾರ್ಯನಿರತ ಹುದ್ದೆಗಳಾಗಿದ್ದಲ್ಲಿ ಆ ಹುದ್ದೆಗಳೂ ಸೇರಿದಂತೆ, ಒಟ್ಟಾರೆ 279 ಹುದ್ದೆಗಳು ರದ್ದಾಗಿರುವುದರಿಂದ ಸದರಿ ಕಾರ್ಯ ನಿರತ ಸಿಬ್ಬಂದಿಗಳನ್ನು ಹತ್ತಿರದ ಸ್ಥಳಕ್ಕೆ ಸ್ಥಳಾಂತರಿಸಿರುವಂತ ಆಯಾ ಸಹ ನಿರ್ದೇಶರು/ ಉಪ ನಿರ್ದೇಶಕರು ಕ್ರಮವಹಿಸಿ ಹತ್ತಿರದ ಸ್ಥಳ ಆಯ್ಕೆಗೆ ಅನುವುಮಾಡಿಕೊಟ್ಟು, ಮೂಲ ಸ್ಥಳದಿಂದ ಬಿಡುಗಡೆಗೊಳಿಸಿ ಹೊಸ ಸ್ಥಳಕ್ಕೆ ಹಾಜರಾಗುವಂತೆ ಕ್ರಮವಹಿಸತಕ್ಕದ್ದು.

* ಒಂದು ವೇಳೆ ಯಾವುದಾದರೂ ಅಂತಹ ಕಾರ್ಯನಿರತ ಸಿಬ್ಬಂದಿಯು ಇಚ್ಛೆಪಟ್ಟಲ್ಲಿ ಆಯಾ ವಿಭಾಗೀಯ ಸಹನಿರ್ದೇಶಕರು ಹತ್ತಿರದ ಮತ್ತೂಂದು ಖಾಲಿ ಹುದ್ದೆಯನ್ನು ಆಯ್ಕೆಮಾಡಿಕೊಳ್ಳಲು ಅನುವಾಗುವಂತೆ ಕ್ರಮವಹಿಸತಕ್ಕದ್ದು,

* ಕಾರ್ಯನಿರತ ಸಿಬ್ಬಂದಿಗೆ ಸಂಬಂಧಿಸಿದಂತೆ ಮೇಲಿನಂತೆ ಸ್ಥಳಾಂತರಿಸಲು ಖಾಲಿ ಹುದ್ದೆ ಲಭ್ಯವಿಲ್ಲದೇ ಇದ್ದ ಪಕ್ಷದಲ್ಲಿ ಅದೇ ಘಟಕದೊಳಗಿನ ಸಮಾನಾಂತರ ವೃಂದದ ಹುದ್ದೆಯನ್ನು ಗುರುತಿಸಿ ಹುದ್ದೆ ಎದುರಾಗಿ ಅಂತಹ ಸಿಬ್ಬಂದಿಗೆ ಸ್ಥಳ ನಿಯುಕ್ತಿಗೊಳಿಸುವುದು. ಈ ಕ್ರಮವು ಬೇರೆ ಯಾವುದೇ ಆಯ್ಕೆ ಇಲ್ಲದೇ ಇದ್ದಾಗ ಮಾತ್ರ ಅನಿವಾರ್ಯ ಸಂದರ್ಭದಲ್ಲಿನ ಆಯ್ಕೆಯಾಗಿರತಕ್ಕದ್ದು, ಈ ಬಗ್ಗೆ ಕಟ್ಟುನಿಟ್ಟಿನ ಎಚ್ಚರ ವಹಿಸತಕ್ಕದ್ದು ಮತ್ತು ಅಂತಹ ಸಿಬ್ಬಂದಿಗೆ ವೇತನಕ್ಕೆ ಯಾವುದೇ ತೊಂದರೆಯಾಗದಂತೆ ನಿಯಮಾನುಸಾರ ಅಗತ್ಯ ಕ್ರಮಗಳನ್ನು ವಹಿಸಿ ಆಯುಕ್ತರು/ ಅಪರ ಆಯುಕ್ತರ ಅನುಮೋದನೆಯನ್ನು ಪಡೆಯತಕ್ಕದ್ದು, ಅಂತಹ ಯಾವುದೇ ಸಿಬ್ಬಂದಿಗೂ ಜೇಷ್ಟತೆಯ ವಿಷಯಗಳಲ್ಲಿ ತೊಂದರೆಯಾಗತಕ್ಕದ್ದಲ್ಲ.

* ಸದರಿ ಎಲ್ಲಾ ರದ್ದುಗೊಂಡಿರುವ ಹುದ್ದೆಗಳ ಮಾಹಿತಿಗಳನ್ನು ಆಯಾ ಕಛೇರಿಯ ಹುದ್ದೆ ಮಂಜೂರಾತಿ ವಹಿಗಳು/ ಸಿಬ್ಬಂದಿ ಪರಿಶಿಷ್ಟ್ಯಗಳಲ್ಲಿ (ಶೆಡ್ಯೂಲ್)ಗಳಲ್ಲಿ ಹುದ್ದೆ ರದ್ಧತಿ ಸಂಬಂಧ ಕೆಂಪುಶಾಹಿಯಲ್ಲಿಯೇ ನಮೂದಿಸಿ ಕಛೇರಿ ಮುಖ್ಯಸ್ಥರು ದಾಖಲಿಸಿ ದೃಢೀಕರಿಸತಕ್ಕದ್ದು. ಆಯಾ ಉಪನಿರ್ದೇಶಕರು ಸಹ ಈ ಮಾಹಿತಿಯನ್ನು ಹೊಂದಿರತಕ್ಕದ್ದು.

* ಕಲಬುರಗಿ ಮತ್ತು ಧಾರವಾಡ ಆಯುಕ್ತಾಲಯದ ವ್ಯಾಪ್ತಿಯಲ್ಲಿ ರದ್ದುಪಡಿಸಿರುವ ಹುದ್ದೆಗಳಲ್ಲಿ ಕರ್ತವ್ಯ ನಿರ್ವಹಿಸುತ್ತಿರುವ ನೌಕರರನ್ನು ಸ್ಥಳನಿಯುಕ್ತಿಗೊಳಿಸಲು ಅಪರ ಆಯುಕ್ತರು ಕಲಬುರಗಿ ಮತ್ತು ಧಾರವಾಡ ರವರು ಅಗತ್ಯ ಕ್ರಮವಹಿಸತಕ್ಕದ್ದು ಎಂದು ತಿಳಿಸಲಾಗಿದೆ.

English summary

Education department of Karnataka ordered to cancel 279 various post immediate effect.