ಆಹಾ ರಸಗುಲ್ಲಾ.. ಬಾಯಲ್ಲಿ ಅಧರ ಒಸರಿತಲ್ಲಾ..!

ಹೆಚ್ಚು ಬಗೆಯ ಸಾಮಾನುಗಳ ಅಗತ್ಯವಿಲ್ಲದಿದ್ದರೂ ರಸಗುಲ್ಲ ತಯಾರಿಕೆ ಸ್ವಲ್ಪ ವೇಳೆ ತಿನ್ನುತ್ತದೆ. ತಾಳ್ಮೆಯಾಂದಿದ್ದರೆ ಎಲ್ಲಿ ಗೆಲುವಿಲ್ಲ ಹೇಳಿ?

• ಮಾಲಾ

ಹಾಲಿನ ಹಾದಿಯಲ್ಲೇ ಇರುವ ಸಿಹಿ ರಸಗುಲ್ಲಾ... ಇದು ಸ್ವಲ್ಪ ಪಾಪ್ಯುಲರ್‌ ತಿಂಡಿ. ಆದರೆ ಮನೆಯಲ್ಲಿ ಮಾಡಿದರೆ ಅದರ ರುಚಿಯೇ ಭಿನ್ನವಾಗಿರುತ್ತೆ. ಒಂದು ಕೈ ನೋಡೇ ಬಿಡೋಣವೇ ? ಬೇಕಾಗುವ ಸಾಮಾನುಗಳೂ ಸಿಂಪಲ್‌. ಯಥಾ ಪ್ರಕಾರ ಮೂಲಭೂತ ಅಗತ್ಯ ಎಂದರೆ ದಪ್ಪನೆಯ ಸ್ವಚ್ಚ ಹಾಲು. 12 ಕುಡ್ತೆ ಅಂದರೆ 2 ಲೀಟರ್‌ ಹಾಲು ಸೋಸಿ ರೆಡಿ ಮಾಡಿಟ್ಟುಕೊಳ್ಳಿ. ಇಷ್ಟು ಹಾಲಿಗೆ ಮುಕ್ಕಾಲು ಕೆಜಿ ಸಕ್ಕರೆ ಬೇಕು. 2 ನಿಂಬೆ ಹಣ್ಣು ಮತ್ತು ಅರ್ಧ ಚಮಚ ರೋಸ್‌ ಎಸೆನ್ಸ್‌ ಇರಲಿ. ಚೆನ್ನಾಗಿ ಕಾಯಿಸಿ.

ನಿಂಬೆ ಹಣ್ಣನ್ನು ಬೀಜ ತೆಗೆದು ಕುದಿವ ಹಾಲಿಗೆ ಹಿಂಡಿ ಕೆಳಗಿಳಿಸಿ, 5 ನಿಮಿಷ ಮುಚ್ಚಿಟ್ಟರೆ ಹಾಲು ಒಡೆದಿರುತ್ತದೆ. ಅದನ್ನು ಬಿಳುಪಾದ ದಪ್ಪ ಬಟ್ಟೆಯಲ್ಲಿ ಸೋಸಿ. ಆ ಹಾಲನ್ನು ಮತ್ತೊಮ್ಮೆ ನೀರಿನಿಂದ ಶೋಧಿಸಬೇಕು. ಈಗ ಇದನ್ನು ಸ್ವಲ್ಪ ಎತ್ತರದಲ್ಲಿ ದಾರ ಬಿಗಿದು ತೂಗು ಹಾಕಿ. 2 ಗಂಟೆಯ ನಂತರ ಗಂಟನ್ನು ಬಿಚ್ಚಿ. ಒಂದು ತಟ್ಟೆಯಲ್ಲಿ ಈ ಮುದ್ದೆಯನ್ನು ಹಾಕಿ 10 ನಿಮಿಷ ಚೆನ್ನಾಗಿ ನಾದಬೇಕು.

ಅಂಗೈಯಿಂದ ದೊಡ್ಡ ಸುಲಿದ ಅಡಿಕೆ ಗಾತ್ರದ ಉಂಡೆ ಮಾಡಿ. ಸ್ವಲ್ಪ ಚಪ್ಪಟೆಯಾಗಿದ್ದರೆ ಚೆಂದ ಕಾಣುತ್ತದೆ. ಉಂಡೆಗಳು ಒಂದಕ್ಕೊಂದು ಅಂಟದಂತೆ ನೋಡಿಕೊಂಡು 1 ತಟ್ಟೆಯಲ್ಲಿ ಇಟ್ಟುಬಿಡಿ.

ಸಕ್ಕರೆ ನೀರು ಹಾಕಿ ಒಲೆಯ ಮೇಲೆ ಇಟ್ಟು ಕುದಿದ ನಂತರ ಮಿಶ್ರಣವನ್ನು ಬಟ್ಟೆಯಲ್ಲಿ ಗಾಳಿಸಿ. ಅಗಲವಾದ ಪಾತ್ರೆಯಲ್ಲಿ ಸಕ್ಕರೆ ಪಾಕವನ್ನು ಒಲೆಯ ಮೇಲಿಟ್ಟು ಕುದಿಯುತ್ತಿರುವಾಗಲೇ ಏಳೆಂಟು ಉಂಡೆಗಳನ್ನು ಹಾಕಿ. ಸ್ವಲ್ಪ ಕುದಿದ ಮೇಲೆ ಪುನಃ ಉಂಡೆಗಳನ್ನು ಹಾಕಿ, ಕುದಿಸಿ- ಹೀಗೆ ಮಾಡುತ್ತ 10 ನಿಮಿಷ ಕುದಿಸಿ ಎಸೆನ್ಸ್‌ ಹಾಕಿ ಇಳಿಸಿ. ಆರಿದ ಮೇಲೆ ಡಬ್ಬದಲ್ಲಿ ಹಾಕಿಡಿ.

ಹೆಚ್ಚು ಬಗೆಯ ಸಾಮಾನುಗಳ ಅಗತ್ಯವಿಲ್ಲದಿದ್ದರೂ ರಸಗುಲ್ಲ ತಯಾರಿಕೆ ಸ್ವಲ್ಪ ವೇಳೆ ತಿನ್ನುತ್ತದೆ. ತಾಳ್ಮೆಯಾಂದಿದ್ದರೆ ಎಲ್ಲಿ ಗೆಲುವಿಲ್ಲ ಹೇಳಿ?