Jodi No 1 Grand Finale: ಫೈನಲ್ನಲ್ಲಿ ಗೆಲ್ಲೋದು ಪಕ್ಕಾ ಈ ಜೋಡಿನೇ ಅಂತಿದ್ದಾರೆ ಪ್ರೇಕ್ಷಕರು
ಕನ್ನಡ ಕಿರುತೆರೆಯ ಇತಿಹಾಸದಲ್ಲೇ ರಿಯಾಲಿಟಿ ಶೋಗಳ ಮೂಲಕ ಹೊಸ ಕ್ರಾಂತಿ ಸೃಷ್ಟಿಸಿರುವ ಜೀ ಕನ್ನಡ ವಾಹಿನಿ, ಇದೀಗ ಮತ್ತೊಂದು ಅದ್ಧೂರಿ ಕ್ಲೈಮ್ಯಾಕ್ಸ್ ಹಂತಕ್ಕೆ ತಲುಪಿದೆ. ಜನಪ್ರಿಯ ಕೌಟುಂಬಿಕ ರಿಯಾಲಿಟಿ ಶೋ "ಜೋಡಿ ನಂ.1" ಯಶಸ್ವಿಯಾಗಿ 14 ವಾರಗಳ ಸುದೀರ್ಘ ಪಯಣವನ್ನು ಮುಗಿಸಿದ್ದು, ಇದೀಗ ಬಹುನಿರೀಕ್ಷಿತ 'ಗ್ರ್ಯಾಂಡ್ ಫಿನಾಲೆ' ಹಂತಕ್ಕೆ ಬಂದು ತಲುಪಿದೆ. ಇಡೀ ಸೀಸನ್ನಲ್ಲಿ ಪ್ರೇಕ್ಷಕರನ್ನು ನಗಿಸಿ, ಭಾವನಾತ್ಮಕವಾಗಿ ಕನೆಕ್ಟ್ ಮಾಡಿದ್ದ ಈ ಶೋನ ಅಂತಿಮ ಮಹಾಸಂಚಿಕೆಗಳು ಜುಲೈ 11 ಮತ್ತು 12ರಂದು (ಇಂದು-ನಾಳೆ) ರಾತ್ರಿ 9 ಗಂಟೆಗೆ ಪ್ರಸಾರವಾಗುತ್ತಿದ್ದು, ಕಿರುತೆರೆ ವೀಕ್ಷಕರಲ್ಲಿ ಕುತೂಹಲ ಹೆಚ್ಚಾಗಿದೆ.
ಫೈನಲ್ ಅಂಗಳದಲ್ಲಿ ಯಾರೆಲ್ಲ ಇದ್ದಾರೆ
ಕಳೆದ ಮೂರೂವರೆ ತಿಂಗಳಿನಿಂದ ನಡೆದ ವಿವಿಧ ಟಾಸ್ಕ್ಗಳು, ಡ್ಯಾನ್ಸ್ ಹಾಗೂ ಮನರಂಜನಾತ್ಮಕ ಸವಾಲುಗಳನ್ನು ಎದುರಿಸಿ, ಎಲಿಮಿನೇಷನ್ ಭೀತಿಯಿಂದ ಪಾರಾಗಿ ಒಟ್ಟು ಹತ್ತು ಸೆಲೆಬ್ರಿಟಿ ಜೋಡಿ ಫಿನಾಲೆ ವೇದಿಕೆಗೆ ಎಂಟ್ರಿ ಕೊಟ್ಟಿದೆ. ಪ್ರತಿಯೊಂದು ಜೋಡಿ ತಮ್ಮದೇ ಆದ ವಿಶಿಷ್ಟ ಪ್ರತಿಭೆಯಿಂದ ಜನರ ಮನ ಗೆದ್ದಿದ್ದಾರೆ. ಅಂತಿಮವಾಗಿ ಟ್ರೋಫಿ ಗೆಲ್ಲಲು ಕಾದಾಡುತ್ತಿದ್ದಾರೆ. ಆ 10 ಜೋಡಿಗಳ ವಿವರ ಹೀಗಿದೆ.
ಅಭಿಲಾಷ್ ಮತ್ತು ಅಪೂರ್ವ: ತಮ್ಮ ಕ್ಯೂಟ್ ಕೆಮಿಸ್ಟ್ರಿಯಿಂದಲೇ ಅಭಿಮಾನಿ ಬಳಗ ಸೃಷ್ಟಿಸಿಕೊಂಡಿರುವ ಜೋಡಿ.
ಕೋಟೆ ಪ್ರಭಾಕರ್ ಮತ್ತು ಮಾಲತಿ: ಹಿರಿಯ ನಟ ಕೋಟೆ ಪ್ರಭಾಕರ್ ಅವರ ಈ ಕೌಟುಂಬಿಕ ಜರ್ನಿ ವೀಕ್ಷಕರಿಗೆ ಸಖತ್ ಇಷ್ಟವಾಗಿದೆ.
ಗೀತಾ ಭಾರತಿ ಭಟ್ ಮತ್ತು ರಾಜಾರಾಮ್ ಭಟ್: ಪ್ರತಿಯೊಂದು ಎಪಿಸೋಡ್ನಲ್ಲೂ ಭರ್ಜರಿ ಪರ್ಫಾರ್ಮೆನ್ಸ್ ನೀಡಿ ಸೈ ಎನಿಸಿಕೊಂಡ ಜೋಡಿ.
* ರಜಿನಿ ಮತ್ತು ಅರುಣ್: ಸದಾ ಲವಲವಿಕೆಯಿಂದ ಇರುತ್ತಾ ಕಠಿಣ ಸವಾಲುಗಳನ್ನು ಗೆದ್ದು ಬಂದ ಜೋಡಿ.
* ರುದ್ರ ಮಾಸ್ಟರ್ ಮತ್ತು ನಿರೀಕ್ಷಾ: ನೃತ್ಯ ಮತ್ತು ಟಾಸ್ಕ್ಗಳಲ್ಲಿ ಇವರ ಎನರ್ಜಿ ಲೆವೆಲ್ ಅದ್ಭುತವಾಗಿದೆ.
* ಮಿಮಿಕ್ರಿ ಗೋಪಿ ಮತ್ತು ಉಷಾರಾಣಿ: ತಮ್ಮ ಹಾಸ್ಯಪ್ರಜ್ಞೆ ಹಾಗೂ ಮುಗ್ಧತೆಯಿಂದಲೇ ಮನೆಮಾತಾದ ಜೋಡಿ.
* ಧನರಾಜ್ ಮತ್ತು ಪ್ರಜ್ಞಾ: ಸೋಷಿಯಲ್ ಮೀಡಿಯಾದಲ್ಲಿ ಸದ್ದು ಮಾಡಿದ್ದ ಈ ಜೋಡಿ ಕಿರುತೆರೆಯಲ್ಲೂ ಸಕ್ಸಸ್ ಕಂಡಿದೆ.
* ಜಗಪ್ಪ ಮತ್ತು ಸುಶ್ಮಿತಾ: ಇಡೀ ಸೀಸನ್ನಾದ್ಯಂತ ಕಾಮಿಡಿ ಟೈಮಿಂಗ್ ಮೂಲಕ ಸಖತ್ ಹೈಲೈಟ್ ಆದ ಜೋಡಿ.
* ಬಾಳು ಬೆಳಗುಂದಿ ಮತ್ತು ಮಾಲಾಶ್ರೀ: ತಮ್ಮ ಗಾಯನ ಮತ್ತು ಪ್ರೀತಿಯ ನಡೆ ಇಡೀ ಶೋನ ಕಳೆ ಹೆಚ್ಚಿಸಿತ್ತು.
* ನಯನ ಮತ್ತು ಸುಹಾಸ್: ಭಿನ್ನವಾದ ಟಾಸ್ಕ್ಗಳಲ್ಲಿ ತಮ್ಮದೇ ಆದ ಶೈಲಿಯಲ್ಲಿ ಹೋರಾಡಿ ಫಿನಾಲೆ ತಲುಪಿದ ಜೋಡಿ.
ಈ ರಿಯಾಲಿಟಿ ಶೋ ಇಷ್ಟೊಂದು ಯಶಸ್ವಿಯಾಗಲು ಅದರ ಜಡ್ಜ್ಗಳು ಹಾಗೂ ಆಂಕರ್ಗಳ ಪಾತ್ರವೂ ದೊಡ್ಡದಿದೆ. ಸ್ಯಾಂಡಲ್ವುಡ್ ಹಾಗೂ ಕಿರುತೆರೆಯ ದಿಗ್ಗಜರಾದ ಮಾಳವಿಕ ಅವಿನಾಶ್, ಲವ್ಲಿ ಸ್ಟಾರ್ ಪ್ರೇಮ್, ರಾಜೇಶ್ ನಟರಂಗ ಮತ್ತು ಛಾಯಾಸಿಂಗ್ ಅವರ ಈ ಸೀಸನ್ನ ತೀರ್ಪುಗಾರರಾಗಿ ಕಳೆ ಹೆಚ್ಚಿಸಿದ್ದಾರೆ. ಇನ್ನು ಕಾರ್ಯಕ್ರಮಕ್ಕೆ ತಮ್ಮದೇ ಆದ ಕಾಮಿಡಿ ಟಚ್ ನೀಡಿ ವೀಕ್ಷಕರನ್ನು ಹಿಡಿದಿಟ್ಟುಕೊಳ್ಳುವಲ್ಲಿ ನಿರೂಪಕರಾದ ಕುರಿ ಪ್ರತಾಪ್ ಮತ್ತು ಶ್ವೇತಾ ಚೆಂಗಪ್ಪ ಕೂಡ ಗಮನ ಸೆಳೆದಿದ್ದಾರೆ. ಫಿನಾಲೆ ವೇದಿಕೆಯಲ್ಲೂ ಇವರ ಜುಗಲ್ಬಂದಿ ಪ್ರೇಕ್ಷಕರಿಗೆ ಭರಪೂರ ನಗು ತರಿಸುವುದರಲ್ಲಿ ಡೌಟೇ ಇಲ್ಲ.
ಸಾಮಾಜಿಕ ಜಾಲತಾಣಗಳಲ್ಲಿ ವಿನ್ನರ್ ಚರ್ಚೆ
ಗ್ರ್ಯಾಂಡ್ ಫಿನಾಲೆ ಪ್ರಸಾರವಾಗುವ ಮುನ್ನವೇ ಸೋಷಿಯಲ್ ಮೀಡಿಯಾ ವೇದಿಕೆಗಳಲ್ಲಿ "ಯಾರು ವಿನ್ನರ್ ಆಗಲಿದ್ದಾರೆ?" ಎಂಬ ಚರ್ಚೆ ಜೋರಾಗಿದೆ. ಪ್ರತಿಯೊಂದು ಜೋಡಿಯ ಅಭಿಮಾನಿಗಳು ತಮ್ಮ ನೆಚ್ಚಿನ ಸ್ಪರ್ಧಿಗಳ ಫೋಟೋಗಳನ್ನು ಶೇರ್ ಮಾಡಿಕೊಳ್ಳುತ್ತಾ ಬೆಂಬಲ ವ್ಯಕ್ತಪಡಿಸುತ್ತಿದ್ದಾರೆ. ಜಗಪ್ಪ, ಮಿಮಿಕ್ರಿ ಗೋಪಿ, ಧನರಾಜ್ ಅಥವಾ ರುದ್ರ ಮಾಸ್ಟರ್ ಜೋಡಿಯೇ ಈ ಬಾರಿ ಗೆಲ್ತಾರೆ ಎಂದು ಪ್ರೇಕ್ಷಕರು ಭವಿಷ್ಯ ನುಡಿಯುತ್ತಿದ್ದಾರೆ. ಹಲವು ಜೋಡಿಗಳ ಹೆಸರುಗಳು ಈಗಾಗಲೇ ವಿನ್ನರ್ ರೇಸ್ನಲ್ಲಿ ಮುಂಚೂಣಿಯಲ್ಲಿ ಕೇಳಿಬರುತ್ತಿದ್ದರೂ, ಅಂತಿಮವಾಗಿ ಜೀ ಕನ್ನಡದ ಈ ಪ್ರತಿಷ್ಠಿತ ಟ್ರೋಫಿ ಯಾರ ಕೈ ಸೇರಲಿದೆ ಎಂಬ ಅಸಲಿ ಸತ್ಯ ಇಂದಿನ ಮತ್ತು ನಾಳಿನ ರೋಚಕ ಸಂಚಿಕೆಗಳಲ್ಲಿ ಅಧಿಕೃತವಾಗಿ ಹೊರಬೀಳಲಿದೆ.
Click it and Unblock the Notifications
Sign in with Google