Mohanlal: ದೃಶ್ಯಂ 3 ಬಿಡುಗಡೆಗೂ ಮುನ್ನವೇ 4-5ನೇ ಭಾಗದ ಸುಳಿವು ನೀಡಿದ ನಟ ಮೋಹನ್ ಲಾಲ್

Published: Sunday, May 10, 2026, 17:06 [IST]

ಮಲಯಾಳಂ ಚಿತ್ರರಂಗದ ಮೆಗಾ ಹಿಟ್ 'ದೃಶ್ಯಂ' ಫ್ರಾಂಚೈಸಿಯು ಮೂರನೇ ಭಾಗಕ್ಕೆ ಕೊನೆಗೊಳ್ಳುವುದಿಲ್ಲ ಎಂಬ ಸುಳಿವನ್ನು ನೀಡುವ ಮೂಲಕ ನಟ ಮೋಹನ್ ಲಾಲ್ ಅವರು ಅಭಿಮಾನಿಗಳಲ್ಲಿ ಕುತೂಹಲ ಕೆರಳಿಸಿದ್ದಾರೆ. 'ದೃಶ್ಯಂ 3' ಸಿನಿಮಾ ಬಿಡುಗಡೆಗೆ ಸಜ್ಜಾಗಿರುವ ಬೆನ್ನಲ್ಲೇ ಅವರು ಈ ಆಸಕ್ತಿದಾಯಕ ವಿಚಾರವನ್ನು ಹಂಚಿಕೊಂಡಿದ್ದಾರೆ.

ಜಾರ್ಜ್‌ಕುಟ್ಟಿ ಕಥೆ ಮುಗಿದಿಲ್ಲ

ಚಿತ್ರದ ಟ್ರೈಲರ್ ಲಾಂಚ್ ಕಾರ್ಯಕ್ರಮದಲ್ಲಿ ಮಾತನಾಡಿದ ಮೋಹನ್ ಲಾಲ್, "ನಾನು ಜಾರ್ಜ್‌ಕುಟ್ಟಿಯನ್ನು ಹಲವು ಬಾರಿ ಉಳಿಸಲು ಪ್ರಯತ್ನಿಸಿದ್ದೇನೆ, ಆದರೆ ಆತ ಇನ್ನೂ ಸೇಫ್ ಆಗಿಲ್ಲ. ಹಾಗಾಗಿ ನೀವು 'ದೃಶ್ಯಂ 4' ಅನ್ನು ಸಹ ನಿರೀಕ್ಷಿಸಬಹುದು" ಎಂದು ಹೇಳಿದ್ದಾರೆ. ಮುಂದಿನ ಭಾಗಗಳ ಬಗ್ಗೆ ನಾನು ಸುಮ್ಮನೆ ತಮಾಷೆ ಮಾಡುತ್ತಿಲ್ಲ. ಜನರು ಮೂರನೇ ಭಾಗವನ್ನು ನೋಡಿ ನಿರ್ಧರಿಸಲಿ, ಅದರ ಆಧಾರದ ಮೇಲೆ 4 ಮತ್ತು 5ನೇ ಭಾಗಗಳನ್ನು ಮಾಡಲು ನಾವು ಸಿದ್ಧರಿದ್ದೇವೆ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.

ನಿರ್ಮಾಪಕ ಆಂಟೋನಿ ಪೆರುಂಬವೂರ್ ಅವರು ನಾಲ್ಕನೇ ಭಾಗದ ಕೆಲಸ ಆರಂಭವಾಗುವ ಮೊದಲೇ ಐದನೇ ಭಾಗದ ಬಗ್ಗೆ ಚರ್ಚಿಸುತ್ತಿದ್ದಾರೆ ಎಂದು ಮೋಹನ್ ಲಾಲ್ ಮಾಹಿತಿ ನೀಡಿದ್ದಾರೆ. ಜೀತು ಜೋಸೆಫ್ ನಿರ್ದೇಶನದ ಈ ಸರಣಿಯು 2013ರಲ್ಲಿ ಆರಂಭವಾಗಿ ಮಲಯಾಳಂ ಚಿತ್ರರಂಗದ ಅತ್ಯಂತ ಯಶಸ್ವಿ ಥ್ರಿಲ್ಲರ್ ಸರಣಿಯಾಗಿ ಹೊರಹೊಮ್ಮಿದೆ. 2021ರಲ್ಲಿ ದೃಶ್ಯಂ 2 ನೇರವಾಗಿ ಒಟಿಟಿಯಲ್ಲಿ ಬಿಡುಗಡೆಯಾಗಿತ್ತು. ಈ ಕಥೆಯ ಜನಪ್ರಿಯತೆಯಿಂದಾಗಿ ಹಿಂದಿಯಲ್ಲಿ ಅಜಯ್ ದೇವಗನ್ ಮತ್ತು ತೆಲುಗಿನಲ್ಲಿ ವೆಂಕಟೇಶ್ ದಗ್ಗುಬಾಟಿ ನಟನೆಯಲ್ಲಿ ಯಶಸ್ವಿ ರಿಮೇಕ್‌ಗಳು ಕೂಡ ಬಂದಿವೆ. ಬಹುನಿರೀಕ್ಷಿತ 'ದೃಶ್ಯಂ 3' ಸಿನಿಮಾ ಇದೇ ಮೇ 21 ರಂದು ವಿಶ್ವದಾದ್ಯಂತ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ.

ಮುಂಗಡ ಬುಕಿಂಗ್‌ನಲ್ಲಿ ದಾಖಲೆ

'ದೃಶ್ಯಂ 3' ಚಿತ್ರದ ವಿಶ್ವವ್ಯಾಪಿ ಮುಂಗಡ ಟಿಕೆಟ್ ಮಾರಾಟವು ಈಗಾಗಲೇ 2 ಕೋಟಿ ರೂಪಾಯಿಗಳ ಗಡಿಯನ್ನು ತಲುಪುತ್ತಿದೆ. ಬಾಕ್ಸ್ ಆಫೀಸ್ ಟ್ರ್ಯಾಕರ್ ಜೆರಿನ್ ಜಾರ್ಜ್‌ಕುಟ್ಟಿ ಅವರು ಹಂಚಿಕೊಂಡಿರುವ ಮಾಹಿತಿಯ ಪ್ರಕಾರ, ಮೇ 8ರ ಮಧ್ಯಾಹ್ನ 12:41ರ ಹೊತ್ತಿಗೆ ಚಿತ್ರವು ಜಾಗತಿಕವಾಗಿ ಅಂದಾಜು 1.80 ಕೋಟಿ ರೂಪಾಯಿಗಳ ಮುಂಗಡ ಬುಕಿಂಗ್ ಕಂಡಿದೆ.

ಆರಂಭಿಕ ಬುಕಿಂಗ್ ಟ್ರೆಂಡ್ ಗಮನಿಸಿದರೆ, ಸಿನಿಮಾ ಬಿಡುಗಡೆಗೂ ಮುನ್ನವೇ ಈ ಮೊತ್ತವು ಬಹಳ ಬೇಗನೆ 2 ಕೋಟಿ ರೂಪಾಯಿಗಳ ಗಡಿ ದಾಟುವುದು ಖಚಿತವಾಗಿದೆ. ಹಿಂದಿನ ಎರಡು ಭಾಗಗಳ ಭರ್ಜರಿ ಯಶಸ್ಸು ಮತ್ತು ಮೋಹನ್ ಲಾಲ್ ಅವರು ಇತ್ತೀಚೆಗೆ 4 ಮತ್ತು 5ನೇ ಭಾಗಗಳ ಬಗ್ಗೆ ನೀಡಿರುವ ಸುಳಿವು ಅಭಿಮಾನಿಗಳಲ್ಲಿ ಚಿತ್ರದ ಬಗ್ಗೆ ಕುತೂಹಲವನ್ನು ಇಮ್ಮಡಿಗೊಳಿಸಿದೆ. ದೃಶ್ಯಂ ಸರಣಿಯ ಮೊದಲ ಎರಡು ಭಾಗಗಳು ಭಾರತೀಯ ಚಿತ್ರರಂಗದಲ್ಲಿ ಸಂಚಲನ ಮೂಡಿಸಿದ್ದವು. ಇದೀಗ ಮೂರನೇ ಭಾಗವು ಚಿತ್ರಮಂದಿರಗಳಲ್ಲಿ ಯಾವ ರೀತಿ ಧೂಳೆಬ್ಬಿಸಲಿದೆ ಎಂಬುದನ್ನು ನೋಡಲು ಇಡೀ ಭಾರತೀಯ ಚಿತ್ರರಂಗ ಕಾತರದಿಂದ ಕಾಯುತ್ತಿದೆ.

Published On May 10, 2026