Actress: ರಶ್ಮಿಕಾ, ಆಶಿಕಾ, ಶ್ರೀಲೀಲಾ ಬೆನ್ನಲ್ಲೆ ಕನ್ನಡದ ಸಿಕ್ಸ್ ಪ್ಯಾಕ್ ಸುಂದರಿ ಟಾಲಿವುಡ್‌ಗೆ ಎಂಟ್ರಿ

ಬೆಂಗಳೂರು, ಜೂನ್ 25: ಕನ್ನಡದಲ್ಲಿ ನಟಿಮಣಿಯರಿಗೆ ಅವಕಾಶ ಸಿಗುತ್ತಿದೆಯೋ ಇಲ್ಲವೋ ಗೊತ್ತಿಲ್ಲ. ಈ ಬಗ್ಗೆ ಅವರೇ ಸ್ಪಷ್ಟಪಡಿಸಬೇಕು. ಮೊದಲು ಕನ್ನಡಕ್ಕೆ ಬೇರೆ ಭಾಷೆ ನಟಿಮಣಿಯರನ್ನು ಕರೆತರುತ್ತಿದ್ದರು. ಇದೀಗ ಕಾಲ ಬದಲಾಗಿದೆ. ನಮ್ಮ ಕನ್ನಡದ ನಟಿ ಮಣಿಯರೇ ಪ್ಯಾನ್ ಇಂಡಿಯಾ ಸಿನಿಮಾಗಳಲ್ಲಿ, ಅದು ಬೇರೆ ಬೇರೆ ಭಾಷೆ ಸಿನಿಮಾಗಳಲ್ಲಿ ನಟಿಸಿ ಸೈ ಅನ್ನಿಸಿಕೊಂಡಿದ್ದಾರೆ. ಇದಕ್ಕೆ ಕನ್ನಡದ ನಟಿ ರಶ್ಮಿಕಾ, ನಟಿ ಶ್ರೀಲೀಲಾ ಸಾಕ್ಷಿಯಾಗಿದ್ದಾರೆ. ನಟಿ ಆಶಿಕಾ ರಂಗನಾಥ್ ಸಹ ತೆಲುಗು ಪ್ರವೇಶಿಸಿದ್ದು, ಈ ಎಲ್ಲ ನಟಿಮಣಿಯರ ಬೆನ್ನಲ್ಲೆ ಕನ್ನಡದ ಸಿಕ್ಸ್ ಪ್ಯಾಕ್ಸ್ ಸುಂದರಿ ತೆಲುಗಿಗೆ ಎಂಟ್ರಿ ಕೊಟ್ಟಿದ್ದಾರೆ.

ಮಲ್ಲಿಡಿ ವಶಿಷ್ಟ ನಿರ್ದೇಶಿಸುತ್ತಿರುವ ತೆಲುಗಿನ ಮೆಗಾಸ್ಟಾರ್ ಚಿರಂಜೀವಿ ಅವರು ನಟಿಸುತ್ತಿರುವ 'ವಿಶ್ವಂಭರ' (Vishwambhara) ಸಿನಿಮಾ ಚಿತ್ರೀಕರಣ ನಡೆಯುತ್ತಿದೆ. ಆಸ್ಕರ್ ಪ್ರಶಸ್ತಿ ವಿಜೇತ ಎಂ.ಕೀರವಾಣಿ ಸಂಗೀತ ನೀಡಲಿದ್ದಾರೆ. ಈ ಚಿತ್ರದಲ್ಲಿ ದೊಡ್ಡ ತಾರಾಬಳಗವೇ ಇದೆ. ನಟಿ ತ್ರಿಶಾ ಮುಖ್ಯ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಚಿರಂಜೀವಿಗೆ ಎರಡನೇ ನಾಯಕಿಯಾಗಿ ಕನ್ನಡದ ನಟಿ ಆಶಿಕಾ ರಂಗನಾಥ್ ಅವರು ಆಯ್ಕೆ ಆಗಿದ್ದಾರೆ.

ಇದರ ಬೆನ್ನಲ್ಲೆ ಮತ್ತೋರ್ವ ಕನ್ನಡ ನಟಿ 'ವಿಶ್ವಂಭರ' ಸಿನಿಮಾ ತಂಡ ಸೇರಿಕೊಳ್ಳಲಿದ್ದಾರೆ ಎನ್ನುವ ಮಾಹಿತಿ ಲಭ್ಯವಾಗಿದೆ. ಕನ್ನಡದ ಸಿಕ್ಸ್‌ ಪ್ಯಾಕ್ ಸುಂದರಿ ಅಂತಲೇ ಕರೆಸಿಕೊಳ್ಳುವ ನಟಿ ನಿಶ್ವಿಕಾ ನಾಯ್ಡು (Nishvika Naidu) ಅವರು ಅಧಿಕೃತವಾಗಿ ಟಾಲಿವುಡ್ ಪ್ರವೇಶಿಸಿದಂತಾಗಿದೆ. ರಶ್ಮಿಕಾ, ಶ್ರೀಲೀಲಾ ಮತ್ತು ಆಶಿಕಾ ಬೆನ್ನಲ್ಲೆ, ಬೇರೆ ಚಿತ್ರರಂಗದಲ್ಲಿ ನಿಶ್ವಿಕಾ ತಮ್ಮ ಅದೃಷ್ಟ ಪರೀಕ್ಷೆ ಇಳಿಯಲಿದ್ದಾರೆ.

ಬಹುಕೋಟಿ ವೆಚ್ಚದಲ್ಲಿ ಸಿದ್ಧವಾಗುತ್ತಿರುವ ಈ ''ವಿಶ್ವಂಭರ'' ಸಿನಿಮಾದಲ್ಲಿ ನಿಶ್ವಿಕಾ ನಾಯ್ಡು ಅವರು ನಾಯಕ ನಟಿ ಆಗಿರದೇ, ಐಟಂ ಸಾಂಗ್‌ಗೆ ಮೆಗಾಸ್ಟಾರ್ ಜೊತೆಗೆ ಭರ್ಜರಿ ಸ್ಟೆಪ್ಸ್ ಹಾಕಲಿದ್ದಾರೆ. ಕನ್ನಡದ 'ಕರಟಕ ದಮನಕ' ಸಿನಿಮಾದಲ್ಲಿ ನಟ ಪ್ರಭುದೇವ್ ಜೊತೆಗೆ 'ಹಿತ್ತಲಕ್ಕ ಕರಿಬ್ಯಾಡ ಮಾವ..' ಎಂಬ ಹಾಡಿನಲ್ಲಿ ಕುಣಿದು ಬೇಷ್ ಅನ್ನಿಸಿಕೊಂಡಿದ್ದ ನಟಿ ನಿಶ್ವಿಕಾ ಅವರ ಡಾನ್ಸ್ ನೋಡಿಯೋ 'ವಿಶ್ವಂಭರ'ದಲ್ಲಿ ಅವಕಾಶ ಸಿಕ್ಕಿದೆ ಎನ್ನಲಾಗಿದೆ. ಈ ಬಗ್ಗೆ ಮತ್ತಷ್ಟು ಮಾಹಿತಿಗಳು ಮುಂದಿನ ದಿನಗಳಲ್ಲಿ ಸಿಗಲಿವೆ.

ಕನ್ನಡ ಸಿಕ್ಸ್‌ ಪ್ಯಾಕ್ ನಟಿ

ಹೌದು, ಸ್ಟಾರ್‌ ನಟರುಗಳೇ ಸಿಕ್ಸ್ ಪ್ಯಾಕ್ ದೇಹ ಹೊಂದಲು ಪರದಾಡುತ್ತಾರೆ. ಸೆಲೆಬ್ರೆಟಿಗಳಿಗೆ ದೈಹಿಕವಾಗಿ ಚೆಂದ ಕಾಣುವುದು ಮುಖ್ಯವಾಗಿರುತ್ತದೆ. ಅದಕ್ಕಾಗಿ ಜಿಮ್ ಹೋಗುತ್ತಾರೆ, ಯೋಗ ಇನ್ನಿತರ ವ್ಯಾಯಾಮ, ಡಯಟ್ ಮಾಡುತ್ತಾರೆ. ಆದರೆ ಸಿಕ್ಸ್ ಪ್ಯಾಕ್ ಮಾಡುವುದು ಅಷ್ಟು ಸುಲಭದ ಮಾತಲ್ಲ. ಅಂಥಹರದಲ್ಲಿ ನಟಿ ನಿಶ್ವಿಕಾ ನಾಯ್ಡು ಅವರು ಸಿಕ್ಸ್ ಪ್ಯಾಕ್ ಮಾಡಿದ್ದಾರೆ. ಆರೋಗ್ಯ ಮತ್ತು ಸೌಂದರ್ಯಕ್ಕೆ, ಫಿಟ್ ಆಗಿರಲು ಅವರು ಹೆಚ್ಚಿನ ಆದ್ಯತೆ ನೀಡುತ್ತಾರೆ. ಹೀಗಾಗಿ ಅವರನ್ನು ಸ್ಯಾಂಡಲ್‌ವುಡ್ ಸಿಕ್ಸ್ ಪ್ಯಾಕ್ಸ್ ಸುಂದರಿ ಅಂತಲೇ ಕರೆಯುತ್ತಾರೆ.

English summary

Kannada actress Nishvika Naidu enters to Tollywood debut in film 'Vishwambhara', starring Chiranjeevi. Following Rashmika Mandanna, Sreeleela, and Ashika Ranganath, Nishvika will special dance in the film.