• search
  • Live TV
ತ್ವರಿತ ಅಲರ್ಟ್ ಗಳಿಗಾಗಿ
ನೋಟಿಫಿಕೇಷನ್ ಅನುಮತಿಸಿ  
ತ್ವರಿತ ಅಲರ್ಟ್ ಗಳಿಗಾಗಿ
ನೋಟಿಫಿಕೇಷನ್ ಅನುಮತಿಸಿ  
For Daily Alerts

ಚಂದ್ರಶೇಖರ ಕಂಬಾರ : ಒಂದು ಸಂಕ್ಷಿಪ್ತ ವಿವೇಚನೆ

By Staff
|
S.K. Harihareshwara, Mysore ಶಿಕಾರಿಪುರ ಕೆ. ಹರಿಹರೇಶ್ವರ,

ಸರಸ್ವತೀಪುರಂ, ಮೈಸೂರು

hoysala_usa@yahoo.com

ಮೊನ್ನೆ ಹೊರಗೆ ಹೋಗಿ ಮನೆಗೆ ಹಿಂತಿರುಗಿದಾಗ ನನಗೂ ನಾಗಲಕ್ಷ್ಮಿಗೂ ಒಂದು ನಿರಾಶೆಯ ಸುದ್ದಿ ಕಾದಿತ್ತು. ‘‘ಸ್ವಲ್ಪಹೊತ್ತಿನ ಮುಂಚೆ ನಾಗತಿಹಳ್ಳಿ ಚಂದ್ರು ಬಂದಿದ್ದರು; ನೀವಿಲ್ಲದುದನ್ನ ಕಂಡು ಒಂದು ಚೀಟಿ ಬರೆದಿಟ್ಟು ಹೋಗಿದ್ದಾರೆ, ನೋಡಿ’’- ಎಂದು ಮನೆಯಲ್ಲಿದ್ದವರು ಹೇಳಿದರು. ನಾನು ಕೈಕೈ ಹಿಸುಕಿ ಕೊಂಡೆ. ‘‘ಛೆ, ಎಂಥಾ ಕೆಲಸ ಆಗಿ ಹೋಯ್ತು ; ಸ್ವಲ್ಪ ಮುಂಚೆಯೇ ನಾನು ಮನೆಗೆ ಹಿಂತಿರುಗಬಾರದಿತ್ತೇ; ಎಷ್ಟೊಂದು ಮಾತಾಡುವುದಿತ್ತು’’- ಎಂದೆಲ್ಲಾ ಅಂದುಕೊಂಡು, ಇಲ್ಲೇ ಮೈಸೂರಿನಲ್ಲೇ ಎಲ್ಲೋ ಹತ್ತಿರದಲ್ಲೇ ಇದ್ದರೆ ‘ಬನ್ನಿ’ ಎಂದು ಕರೆಯೋಣವೆಂದುಕೊಂಡು, ಮೊಬೈಲ್‌(ಸೆಲ್‌) ಫೋನ್‌ ತೆಗೆದುಕೊಂಡು ಅವರಿಗೆ ಫೋನ್‌ ಮಾಡಿದೆ.

ಚಂದ್ರು ಸಿಕ್ಕರು; ಆದರೆ ಅವರು ಹೇಳಿದರು: ‘‘ನಾವೀಗ ಎಲ್ಲಿದ್ದೇವೆ ಗೊತ್ತೇ? ಕೊಡಗಿನ ಕುಶಾಲನಗರದ ಹತ್ತಿರ! ಈಗ ಬರುವ ಹಾಗಿಲ್ಲ.. ..’’- ಅಂತ. ಜೊತೆಗೆ ಸೇರಿಸಿದರು- ‘‘ನನ್ನ ಜೊತೆ ಈಗ ಕಾರಿನಲ್ಲಿ ಯಾರಿದ್ದಾರೆ ಗೊತ್ತಾ? ಚಂದ್ರಶೇಖರ ಕಂಬಾರರು’’- ಅಂದರು ಚಂದ್ರು. ಅವರಿಬ್ಬರೂ ಬಂದಿದ್ದರಂತೆ ಆ ದಿನ ಬೆಳಗ್ಗೆ ನಮ್ಮ ಮನೆಗೆ, ನಾವೇ ಇರಲಿಲ್ಲ!

Chandrashekhar Kambar‘‘ಛೆ, ಎಂಥಾ ಕೆಲಸ ಆಗಿ ಹೋಯ್ತು ; ಸ್ವಲ್ಪ ಮುಂಚೆಯೇ ನಾನು ಮನೆಗೆ ಹಿಂತಿರುಗಬಾರದಿತ್ತೇ; ಕಂಬಾರರೊಂದಿಗೂ ಎಷ್ಟೊಂದು ಮಾತಾಡುವುದಿತ್ತು ; ಅವರ ಇತ್ತೀಚಿನ ಸಾಧನೆಗಳ ಬಗ್ಗೆ ಚರ್ಚಿಸುವುದಿತ್ತು ; ಕನ್ನಡಿಗರೆಲ್ಲರ ಮನೆಮಾತಾಗಿರುವ, ಜನಪ್ರಿಯ ಈ-ಟಿವಿ ಧಾರಾವಾಹಿ ‘ಮೂಡಲ ಮನೆ’ಯ ಕಂಬಾರರು ಬರೆದ ಶೀರ್ಷಿಕೆ ಗೀತೆಯ ಬಗ್ಗೆ ಹಾಡಿ ಹೊಗಳುವುದಿತ್ತು’’- ಅಂತ ಮತ್ತೊಮ್ಮೆ ನಾಗಲಕ್ಷ್ಮಿಯೂ ನಾನೂ ಪೇಚಾಡಿಕೊಂಡೆವು. ಕಂಬಾರರು ನಾಗಲಕ್ಷ್ಮಿಗೆ ಮೇಷ್ಟರು. ಅವಳು ಕನ್ನಡ ಎಂ. ಎ. ವ್ಯಾಸಂಗ ಮಾಡುತ್ತಿದ್ದಾಗ ಬೆಂಗಳೂರು ವಿಶ್ವವಿದ್ಯಾಲಯದಲ್ಲಿ ಜಾನಪದ ವಿಷಯಗಳನ್ನು ಬೋಧಿಸುತ್ತಿದ್ದ ಕಂಬಾರರ ಬಗ್ಗೆ ಅವಳು ನನಗೆ ಬಹಳ ವಿಚಾರಗಳನ್ನ ಹೇಳುತ್ತಿದ್ದಳು. ನಮ್ಮ ಮನೆಯಲ್ಲಿ ಅವಳ ಸಹಪಾಠಿಗಳು ಸೇರಿ ಆಗಾಗ್ಗೆ ಪಾಠದ ಬಗ್ಗೆ, ಪಾಠ ‘ಮಾಡುತ್ತಿದ್ದ’ ಮೇಷ್ಟರುಗಳ ಬಗ್ಗೆ ಪಟ್ಟಾಂಗ ಹೊಡೆಯುತ್ತಿದ್ದಾಗ ನಾನೂ ಸೇರಿಕೊಳ್ಳುತ್ತಿದ್ದೆನಲ್ಲ. ಅವೆಲ್ಲ ಇನ್ನೂ ಅಲ್ಪ ಸ್ವಲ್ಪ ನೆನಪಿದೆ. ಮೊನ್ನೆ ಮೊನ್ನೆ ತಾನೇ ಇನ್ನೊಂದು ಸಭೆಗಾಗಿ ನಾವು ಹೋಗಿದ್ದಾಗ, ಅಲ್ಲಿಗೆ ಬಂದಿದ್ದ ಕಂಬಾರರನ್ನು ಭೇಟಿಯಾಗಿ, ‘‘ನಮ್ಮ ಮನೆಗೆ ಬನ್ನಿ ಸಾರ್‌!’’ ಎಂದು ಅವರನ್ನೂ ಆಹ್ವಾನಿಸಿದ್ದೂ ನೆನಪಿತ್ತು. ಈಗ ಎಲ್ಲಾ ಕೈತಪ್ಪಿ ಹೋುತು. ಆದರೆ, ಕಂಬಾರರ ಬಗ್ಗೆ ಬಹಳ ದಿನಗಳ ಹಿಂದೆಯೇ ನಾನು ಟಿಪ್ಪಣಿಮಾಡಿಕೊಂಡಿದ್ದು ಈ ಸಂಕ್ಷಿಪ್ತ ಲೇಖನ ಬರೆಯಲು ಈಗ ಸಹಾಯಕವಾಯಿತು.

***

‘‘ಮಳೆಯಾಗಿ ಬಿದ್ದವನೆ, ಸ್ವಾಮಿ,

ಬೆಳೆಯಾಗಿ ಎದ್ದವನೆ,

ಎಳಿ ನಗಿ ನಕ್ಕವನೆ, ಬೇಲಿ ಹೂವಿನೊಳಗೆ ... ...’’

ಎಂದು ಪ್ರಾರಂಭವಾಗುವ ಚಂದ್ರಶೇಖರ ಕಂಬಾರರ ನಾಟಕ ‘ಜೋಕುಮಾರಸ್ವಾಮಿ’ (ಪ್ರಕಟಣೆ 1972)ಗೆ ಮೇಳದವರ ನಗೆಯಾಟದ ಮಾತುಗಳೇ ನಾಂದಿಯಾಗುತ್ತದೆ.

ಹಾಗೆ ನೋಡಿದರೆ, ನಗೆಯಾಟದ ಹಾಡು, ಕುಣಿತ, ವೇಷ, ಮಾತುಗಳ ಪ್ರಾರಂಭ ಪ್ರೇಕ್ಷಕರಿಗೆ ಎಷ್ಟು ಮೋಡಿ ಮಾಡಬಹುದು ಎಂಬುದು ನಾಟಕಕಾರ ಕಂಬಾರರಿಗೆ ಗೊತ್ತು. ಉದಾಹರಣೆಗೆ, ಅವರ ಒಂದು ಮಕ್ಕಳ ನಾಟಕ ‘‘ಅಲೀಬಾಬಾ ಮತ್ತು ನಲವತ್ತು ಕಳ್ಳ’’(ಪ್ರ್ರ: 1980)ರನ್ನು ನೋಡಿ:

ಅಲ್ಲಿ ಪ್ರಾರಂಭದಲ್ಲಿ, ಗಣೇಶನ ವೇಷಧಾರಿ ಒಂದು ಮಗು ರಂಗದ ಮೇಲೆ ಮೊದಲು ಓಡಿ ಬರುತ್ತದೆ. ಮೇಳದವರು ಕುಣಿಯುತ್ತಾ, ಹಾಡುತ್ತಾ ಬರುತ್ತಾರೆ:

‘ಶ್ರೀ ಗಜವದನಾ/ ಗಿರಿಜಾನಂದನ/ ಸ್ವೀಕರಿಸಯ್ಯಾ ಸಾವಿರ ನಮನ। ... ...

ಭದ್ರಾಕೃತಿಯವನೆ/ ಜೋಕಿಲಿ ಕುಳಿತವನೆ/ ಜೋಕೆ ತಪ್ಪದ ಮಾತು ದಯಪಾಲಿಸಣ್ಣ।

ಕಲಿಸಿದ ಗುರುವರ್ಯ/ ಭೂಸನೂರು ಮಠದಯ್ಯ/ ಸಾವಳಿಗಿ ಶಿವನಿಂಗ/ ಘೂಡಗೇರಿ ಗಜನಿಂಗ।

ಇಂತಿಂಥಾ ಸಂತರ ಮಾತಾಗಿ ಬಂದವನೆ/ ತಪ್ಪಿದ ಪದ ಒಪ್ಪಿ ಅಪ್ಪಿಕೊಂಬಂಥವನೆ।

ಮತಿವಂತ ಮಂದೀಯ ವಿದ್ಯೆಗೆ ಅಧಿಕಾರಿ/ ಅಹಂಕಾರ ಪಡುವಂಥ ಹುಂಬರ ಕಡುವೈರಿ।

ಸ್ವೀಕರಿಸಯ್ಯ ಸಾವಿರ ನಮನ ।।’’

ನೋಡಿ, ಎಷ್ಟು ಚೆನ್ನಾಗಿ ಗಣಪತಿಯನ್ನ ಬಣ್ಣಿಸಿದ್ದಾರೆ, ಮಕ್ಕಳಿಗೂ ಅರ್ಥವಾಗುವ ಹಾಗೆ. ಈಗ ಬಲು ದೊಡ್ಡ ಪದವಿಗೆ ಏರಿ, ಸಹಸ್ರಾರು ವಿದ್ಯಾರ್ಥಿಗಳ ಪ್ರಾಚಾರ್ಯ, ಕುಲಪತಿ- ಹೀಗೆ ಏನೇನೋ ಆಗಿರಬಹುದು, ಆದರೂ ಚಿಕ್ಕಂದಿನಲ್ಲಿ ಅ ಆ ಇ ಈ ಕಲಿಸಿದ, ಮುಂದಿನದ ಎಲ್ಲಕ್ಕೂ ಬುನಾದಿ ಹಾಕಿದ ಆ (ಬೆಳಗಾವಿ ಜಿಲ್ಲೆಯ ಹುಕ್ಕೇರಿ ತಾಲ್ಲೂಕಿನ ಗೋಡಗೇರಿ ಗ್ರಾಮದ) ಪ್ರಾಥಮಿಕ ಶಾಲೆಯ ಮಾಸ್ತರುಗಳನ್ನು ಕವಿ, ನಾಟಕಕಾರ ಮರೆಯುವುದಿಲ್ಲ, ಆ ಗುರುಗಳ, ಸಂತರ ಮಾತೇ ನೀನಪ್ಪ- ಎಂದು, ವಿನಯಪೂರ್ವಕವಾಗಿ ನೆನೆಯುತ್ತಾರೆ, ಕಂಬಾರರು. ವಿನಯ ಕಂಬಾರರ ಹುಟ್ಟುಗುಣ. ಇರಲಿ, ಮಾತು ಎಲ್ಲಿ ಎಲ್ಲಿಗೋ ಹೋುತು.

‘‘ಅಲಿಬಾಬಾ’’ ನಾಟಕದಲ್ಲಿ ಗಣೇಶನನ್ನ ಅದು ಹೇಗೆ ತಂದರು, ಏನು ಸಂಬಂಧ ?- ಎಂದು ನೀವು ಆಶ್ಚರ್ಯ ಪಡಬಹುದು. ಅದಕ್ಕೆ ಉತ್ತರವನ್ನೂ ಕಂಬಾರರೇ ಕೊಟ್ಟುಬಿಟ್ಟಿದ್ದಾರೆ. ಮೇಳದವರ ಹಾಡು, ಕುಣಿತವಾದ ಮೇಲೆ, ಸೂತ್ರಧಾರ ಪ್ರವೇಶಿಸಿ, ಸಭಿಕರನ್ನ ಉದ್ದೇಶಿಸಿ ಹೇಳುತ್ತಾನೆ:

‘‘ಬಾಲಕ ಬಾಲಕಿಯರೇ, ಮತ್ತು ಪಾಲಕರೇ, ನಾವು ಓದೋ ಮಕ್ಕಳು ನಾಟಕ ಆಡತೀವಿ. ನಾಟಕದ ಹೆಸರು ‘ಅಲಿಬಾಬಾ ಮತ್ತು ನಲವತ್ತು ಕಳ್ಳರು’ ಅಂತ. ನಾಟಕದ ಪ್ರಾರಂಭದಲ್ಲಿ ಗಣೇಶನ ಪೂಜೆ ಮಾಡಬೇಕು. ಇದೇನಪ್ಪಾ, ಅಲ್ಲಾನ ಊರಲ್ಲಿ ಕಲ್ಲಯ್ಯಂದು ಏನು? ಅಂದಂತೆ, ಮುಸ್ಲಿಮರ ಕಥೇಲಿ ಗಣೇಶನ ಪೂಜೆ ಯಾಕೆ ಅಂತ ಗಲಾಟೆ ಮಾಡಬೇಡಿ. ನಿಮ್ಮ ಗಲಾಟೆ ಎಂಬ ವಿಘ್ನ ದೂರ ಮಾಡೋದಕ್ಕೇ ನಾವು ಗಣೇಶನ ಪೂಜೆ ಮಾಡ್ತಾ ಇರೋದು.

ಇದು ಹೇಳಿ ಕೇಳಿ ಕಳ್ಳರ ಕಥೆ. ಗಣೇಶ ಶಿಷ್ಟ-ಪಾಲಕ, ದುಷ್ಟ-ಶಿಕ್ಷಕ. ಅಂದರೆ, ಶಿಷ್ಟರಿಗೆ ಪಾಲಕ ಅಂದರೆ, ಪೇರೆಂಟ್‌ ಥರ, ದುಷ್ಟರಿಗೆ ಶಿಕ್ಷಕ ಅಂದರೆ ಟೀಚರ್‌ ಥರ, ಟೀಚರೋಪಾದಿಯಲ್ಲೂ ಇರತಕ್ಕವನು. ಅದಕ್ಕೇ ಪ್ರಾರಂಭದಲ್ಲಿ ಅವನ ಪೂಜೆ ಮಾಡಿ, ನಾಟಕ ಸುರು ಮಾಡ್ತೀವಿ.’’-ಎನ್ನುತ್ತಾನೆ.

ನಾನೂನು, ಅದೇ ರೀತಿ, ಗಣೇಶನ ಮಾತು ಮೊದಲು ಹೇಳಿಯೇ, ಮುಂದೆ ಮಾತನಾಡ್ತೇನೆ.

ಈಗ ‘ಜೋಕುಮಾರಸ್ವಾಮಿ’ ನಾಟಕದ ಕಡೆಗೆ ಬರೋಣ. 1975ರ ಭಾರತೀಯ ಭಾಷೆಯ ಅತ್ಯುತ್ತಮ ನಾಟಕ ಎಂದು ‘ಕಮಲಾದೇವಿ ಚಟ್ಟೋಪಾಧ್ಯಾಯ ಪ್ರಶಸ್ತಿ’, ಇನ್ನೂ ಅನೇಕ ಪ್ರಶಸ್ತಿಗಳನ್ನ ಪಡೆದ ನಾಟಕ ಇದು. (ವರ್ಧಮಾನ ಪ್ರಶಸ್ತಿ ಪಡೆದ ‘ಜೈಸಿದನಾಯ್ಕ’(1975) ಆಮೇಲೆ ಬಂತು. ಇರಲಿ.)

ನಾಟಕದ ನೆಲಗಟ್ಟು ಆದರೂ ಏನು? ಕಂಬಾರರ ಮೂರನೆಯ ನಾಟಕ ‘ಋಷ್ಯಶೃಂಗ’(1970) ವಾಗಲಿ, ಅದರಲ್ಲಿನ ಹಾಗೇನೇ ‘ಕಮಲಾದೇವಿ ಚಟ್ಟೋಪಾಧ್ಯಾಯ ಪ್ರಶಸ್ತಿ’ ಪಡೆದ ‘ಜೋಕುಮಾರಸ್ವಾಮಿ’ ಯಲ್ಲಾಗಲೀ ಜಾನಪದದ ಸಾರ, ಆಕಾರ, ನೇರ ವಿಚಾರ ಹೇಳೋ ವ್ಯಾಪಾರ- ಎಲ್ಲಾ ಇದೆ. ಹಾಗೆ ನೋಡಿದರೆ, ಜಗತ್ತಿನ ಎಲ್ಲಾ ಜಾನಪದದ ಕಾವ್ಯಗಳ ಒಳ ತಿರುಳು ಏನು? ಒಳ್ಳೆಯದು ಮತ್ತು ಕೆಟ್ಟದರ ಸಂಘರ್ಷ. ಶಕ್ತಿ ಮತ್ತು ಪ್ರತಿಶಕ್ತಿಗಳ ಸಮರ. ಮೊದ ಮೊದಲು ಕೆಟ್ಟದ್ದೇ ಗೆದ್ದಿತೇನೋ ಎಂದು ಭಾಸವಾದರೂ, ಕೊನೆಗೆ ಗೆಲ್ಲುವುದು ಯಾವುದು? ಸಾಮಾಜಿಕವಾಗಿ, ಎಲ್ಲರೂ ಯಾವುದನ್ನ ಒಳ್ಳೆಯದು ಎಂದು ಒಪ್ಪಿಕೊಂಡಿದ್ದಾರೋ, ಅದೇ! ಇಲ್ಲೂ ಆಗುವುದು ಅದೇನೇ.

ಬೆಳಗಾವಿ ಜಿಲ್ಲೆಯ ಗೋಡಗೇರಿಯಲ್ಲಿ, ಬಸವಣ್ಣೆಪ್ಪ ರಾಮಪ್ಪ ಕಂಬಾರ ಮತ್ತು ಚೆನ್ನವ್ವ ಅವರ ಮಗನಾಗಿ ಜನಿಸಿದ (ಜನನ: ಜನವರಿ 2, 1938) ಚಂದ್ರಶೇಖರ ಕಂಬಾರರಿಗೆ ಜಾನಪದ, ಅದರಲ್ಲೂ ಉತ್ತರ ಕರ್ನಾಟಕ ಭಾಗದ ಜಾನಪದವೇ ಉಸಿರು, ಜೀವ. ಉತ್ತರ ಕರ್ನಾಟಕದ ಜಾನಪದ ರಂಗಭೂಮಿ ಇವರ ಸಂಶೋಧನಾ ಕ್ಷೇತ್ರ. ‘ಜಾನಪದ ವಿಶ್ವಕೋಶ’ (ಪ್ರ: 1985) ದಂಥ ಬೃಹದ್‌ ಗ್ರಂಥ ಸಂಪುಟವನ್ನು ಕನ್ನಡದಲ್ಲಿ ಹೊರತಂದ ಕೀರ್ತಿ ಇವರದು. ‘ಬೆಂಬತ್ತಿದ ಕಣ್ಣು’(1961) ‘ನಾರ್ಸಿಸಸ್‌’(1969) ಮತ್ತು ಸಹ ಹೆಸರು ಮಾಡಿದ ಇವರ ನಾಟಕಗಳು.

ಸಿರಿಸಂಪಿಗೆ (1991)ನಾಟಕಕ್ಕೆ ಕೇಂದ್ರ ಸಾಹಿತ್ಯ ಅಕಡೆಮಿ ಪ್ರಶಸ್ತಿ ಬಂತು. ಇವರ ಇನ್ನೊಂದು ನಾಟಕ ‘ಕಾಡುಕುದುರೆ’(1976) ಅದೇ ಹೆಸರಿನಲ್ಲಿ ಸಿನಿಮಾ ಆಯಿತು, ರಾಷ್ಟ್ರೀಯ ಪ್ರಶಸ್ತಿ ಗಳಿಸಿತು. ಅದೇ ವರುಷದಲ್ಲಿ ಹೊರತಂದ ‘ನಾಯೀಕತೆ’ ನಾಟಕ ಸಹ ‘ಸಂಗೀತಾ’ ಎಂಬ ಹೆಸರಿನಲ್ಲಿ ಚಲನಚಿತ್ರವಾಯಿತು; ಐದು ರಾಜ್ಯ ಪ್ರಶಸ್ತಿಗಳಿಸಿತು. ‘ಹರಕೆಯ ಕುರಿ’(1983)ಯೂ ಅದೇ ಹೆಸರಿನ ಸಿನೆಮಾ ಆಗಿ, ರಾಷ್ಟ್ರಪ್ರಶಸ್ತಿ ಗಳಿಸಿತು.

ಕಾವ್ಯ ಪ್ರಕಾರದಲ್ಲಿ ಕಂಬಾರರ ‘ಮುಗುಳು’(1958), ‘ಹೇಳತೇನ ಕೇಳ’(1964), ‘ತಕರಾರಿನವರು’(1971) ಎಲ್ಲರ ಕಣ್ಣ ಸೆಳೆಯಿತು; ‘ತಕರಾರಿನವರು’ಗೆ ಕರ್ನಾಟಕ ರಾಜ್ಯ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿಯೂ ಬಂತು. ಮೊದಲ ಕಾದಂಬರಿ ‘ಅಣ್ಣತಂಗಿ’ (1956), ನಂತರ ‘ಕರಿಮಾಯಿ’(1975), ಆಮೇಲೆ ಬಂತು, ರಾಜ್ಯ ಸಾಹಿತ್ಯ ಅಕಡೆಮಿ ಪ್ರಶಸ್ತಿ ಪುರಸ್ಕೃತ ಕಾದಂಬರಿ ‘ಸಿಂಗಾರವ್ವ ಮತ್ತು ಅರಮನೆ’ (1982). ಇತ್ತೀಚಿನದೆಂದರೆ, ‘ಜಿ ಕೆ ಮಾಸ್ತರ ಪ್ರಣಯ ಪ್ರಸಂಗ’ (1986). ಮೊದಲ ಕಾದಂಬರಿಯಲ್ಲಿ ಕಾಣುವ ಬೀಸು, ಘಟನೆಗಳ ಒಡಮೂಡಿಸುವ ಕಲೆ ‘ಸಿಂಗಾರವ್ವ’ನಲ್ಲೂ ಕಾಣುತ್ತೇವೆ. ಪಾತ್ರಗಳನ್ನು ಪರಿಣಾಮಕಾರಿಯಾಗಿ ಹುಟ್ಟಿಸಿ ಬೆಳಸುವ, ಓದುಗನ ಮೇಲೆ ಪ್ರಭಾವ ಬೀರುವ ರಸಪೋಷಣೆಯನ್ನು ಇಲ್ಲೂ ಕಾಣುತ್ತೇವೆ. ಅನುಭವವನ್ನು ಅದರ ಎಲ್ಲಾ ಆಳ- ಮಗ್ಗುಲುಗಳಲ್ಲಿ ನೋಡಿ ಬೆಲೆ ಕಟ್ಟುವುದು ಒಂದು ಅಸಾಮಾನ್ಯ ಕಲೆ. ಕಂಬಾರರು ತಮ್ಮ ಕಾದಂಬರಿಗಳಲ್ಲಿ ಇದನ್ನು ಸಾಧಿಸಿದ್ದಾರೆ.

ಹಳೆಯ ಮೌಲ್ಯಗಳನ್ನ ಒತ್ತರಿಸಿಕೊಂಡು ಹೊಸ ಮೌಲ್ಯಗಳು ಹೇಗೆ ಹುಟ್ಟಿಯಾವು ಎಂಬುದನ್ನ, ಹೊಸನೀರು ಹಳೆಯ ನೀರನ್ನು ಹೇಗೆ ಕೊಚ್ಚಿಕೊಂಡು ಹೋಗಬಲ್ಲದು ಎಂದು, ಕಂಬಾರರು ವಿವೇಚಿಸುತ್ತಾರೆ. ಅವರ ನಾಟಕಗಳಲ್ಲಿ, ಕಾದಂಬರಿಗಳಲ್ಲಿ, ಕಾವ್ಯದಲ್ಲಿ ಹೊಸತು- ಹಳತುಗಳ ಮಿಶ್ರಣ ರಸಮಿಶ್ರಣವಾಗಿ ಅಚ್ಚಳಿಯದ ಪರಿಣಾಮ ಓದುಗರ ಮೇಲೆ ಬೀರುತ್ತದೆ.

ಇದೇನೆ ಚಂದ್ರಶೇಖರ ಕಂಬಾರರು ಕೇಳುಗರ ಮೇಲೆ, ಓದುಗರ ಮೇಲೆ, ನೋಡುಗರ ಮೇಲೆ ಹಾಕುವ ಮೋಡಿ!

ಮುಖಪುಟ / ಎನ್‌ಆರ್‌ಐ

ಕನ್ನಡ ಮ್ಯಾಟ್ರಿಮೋನಿಯಲ್ಲಿ - ಉಚಿತ ನೋಂದಣಿ !

ತಾಜಾ ಸುದ್ದಿ ತಕ್ಷಣ ಪಡೆಯಿರಿ
Enable
x
Notification Settings X
Time Settings
Done
Clear Notification X
Do you want to clear all the notifications from your inbox?
Settings X
We use cookies to ensure that we give you the best experience on our website. This includes cookies from third party social media websites and ad networks. Such third party cookies may track your use on Oneindia sites for better rendering. Our partners use cookies to ensure we show you advertising that is relevant to you. If you continue without changing your settings, we'll assume that you are happy to receive all cookies on Oneindia website. However, you can change your cookie settings at any time. Learn more