ಶಿಕಾರಿಪುರ ಹರಿಹರೇಶ್ವರ ಕವನ ಎಂದು?
ನಾನು ಸೆಲ್ಫ್-ಸ್ಟಾರ್ಟರ್ ಆಗುವುದು ಯಾವಾಗ?
ಕುದುರೆಯ ಕಸಿನ್ಗೆ ಆದಷ್ಟು ವಯಸ್ಸು ಆಯ್ತಲ್ಲ ;
ಹುಟ್ಟಿ ಬೆಳೆದ ನಾಡಿನ ಹಂಗಿನಲ್ಲಿ
ಸಾವಿರಾರು ಡಾಲರು ಸಮಾ ಖರ್ಚಿನಲ್ಲಿ
ದಿನನಿಶಿ ಅವಿರತ ಶ್ರಮದ ಹಣ್ಣ ತಿರುಳು ಅಂಗೈನೆಲ್ಲಿ
ಅನುಭವದ ಸೊಂಪಾದ ಬೆಳೆ, ಕಳೆ- ಇದ್ದೂ
ಹೊತ್ತ ಪರಿಮಳವ ಅರಿಯದ ಹುಂಬ
ಸ್ವಾರಂಭಿಯಾಗುವುದು ಯಾವಾಗ?
ಅನುಗಾಲ ಎಕ್ಸ್ಟೆನ್ಷನ್ ಕಾರ್ಡನ್ನೇ ನೆಚ್ಚಿ
ಲಘು-ಕಂಪನಕ್ಕೂ ಬೆಚ್ಚಿ
ಕುಳಿ-ತ ಪರಪುಟ್ಟ , ಮೈಮರೆತವನೆ ಕೊಡವಿ,
'ನಾವು ಸಮ ನಿಮಗೆ’- ಎಂದು ಮೆರೆವುದೆಂದು?
ಅವಕಾಶಗಳ ಸ್ವರ್ಗ ಹೊಕ್ಕರೂ
ತಲೆಯಿದ್ದರೇ ಉಳಿವು ;
ಚುರುಕಾಗಿರಬೇಕು ಗುರೂ, ನಾನಾಗ ಬೇಡವೆ ಕಣದಲ್ಲಿ ಮಲ್ಲ ;
'ಮೇಲೆ ಮಹಡಿಯಲ್ಲಿ ಬೆಳ್ಳಿ ಕೋಲು ಆಡಿದೆ’-
ಯೆಂದು ಖಂಡಿತಾ ಇಲ್ಲ ,
ಕೆಂಪು ನೆಲಗಂಬಳಿ ಹಾಸುವುದಿಲ್ಲ ;
ಇಲ್ಲಿ , ಸುತ್ತ ಗಮನಿಸುತ್ತ ,
ಕ್ರಿಟಿಕಲ್ ಪಾಥ್ ಚಾರ್ಟನ್ನು ದಿನವೂ ಪರಿಷ್ಕರಿಸುತ್ತ,
ನನ್ನ ಥರ್ಮೋಸ್ಟಾಟನ್ನ ನಾನೇ ಹೂಡಿ,
ಪಂದ್ಯದಲ್ಲಿ ತೊಡಗಬೇಕು,
ಗೆಲ್ಲುವ ಗುರಿ ಬೇಕು, ಹಂಬಲ ಬೇಕು, ಛಲ ಬೇಕು,
ನನ್ನಲ್ಲಿ ನನಗೆ ನಂಬಿಕೆ ತುಂಬಿ ತುಳುಕತಲಿ ಇರಲೇಬೇಕು!
Click it and Unblock the Notifications
Sign in with Google