• search
  • Live TV
ತ್ವರಿತ ಅಲರ್ಟ್ ಗಳಿಗಾಗಿ
ನೋಟಿಫಿಕೇಷನ್ ಅನುಮತಿಸಿ  
ತ್ವರಿತ ಅಲರ್ಟ್ ಗಳಿಗಾಗಿ
ನೋಟಿಫಿಕೇಷನ್ ಅನುಮತಿಸಿ  
For Daily Alerts

ಮೇ 2019 - ಕ್ಯಾಲೆಂಡರ್ ಮೇಲೆ ತಿಂಗಳ ರಾಶಿ ಭವಿಷ್ಯ

By ಪಂಡಿತ್ ಅನುಜ್ ಕೆ. ಶುಕ್ಲಾ
|

ಈ ಜ್ಯೋತಿಷ್ಯ ಕ್ಯಾಲೆಂಡರನ್ನು ಖ್ಯಾತ ಜ್ಯೋತಿಷಿ ಪಂಡಿತ ಅನುಜ್ ಕೆ. ಶುಕ್ಲಾ ಅವರು ಮೇ 2019ರ ಪಂಚಾಂಗದ ಆಧಾರದ ಮೇಲೆ ಆಯಾ ರಾಶಿಗೆ ಅನುಗುಣವಾಗಿ ರೂಪಿಸಿದ್ದಾರೆ. ನಿಮ್ಮ ರಾಶಿಗೆ ತಕ್ಕಂತೆ ಅಂದಿನ ದಿನ ನಿಮ್ಮ ಜೀವನದಲ್ಲಿ ಹೇಗಿರುತ್ತದೆ ಎಂಬುದನ್ನು ತಿಳಿದುಕೊಳ್ಳಿ. ಇಂದು ಮಾತ್ರವಲ್ಲ, ನಾಳೆ, ನಾಡಿದ್ದು ಅಥವಾ ಮುಂದಿನ ದಿನ ಹೇಗಿರುತ್ತದೆಂದು ಕೂಡ ಈ ಕ್ಯಾಲೆಂಡರ್ ಮುಖಾಂತರ ತಿಳಿಯಬಹುದು.

ವಾರ ಭವಿಷ್ಯ ಅಥವಾ ತಿಂಗಳ ಭವಿಷ್ಯ ಒಂದು ಬಾರಿ ನೋಡಿ ಮರೆತುಬಿಟ್ಟಿರುತ್ತೇವೆ. ನಾವು ಅವುಗಳನ್ನು ಮರೆತರೂ ಗ್ರಹ, ನಕ್ಷತ್ರ ಮತ್ತು ಕಾಲಚಕ್ರಗಳನ್ನು ನಮ್ಮನ್ನು ಮರೆಯುವುದಿಲ್ಲ. ಭಾರತದ ಪ್ರಾಚೀನ ಜ್ಯೋತಿಷ್ಯಶಾಸ್ತ್ರ ನಮ್ಮ ಜೀವನದೊಂದಿಗೆ ಯಾವತ್ತೂ ಕೂಡಿಕೊಂಡಿರುತ್ತದೆ. ನಿಮ್ಮ ಜೀವನವನ್ನು ಸರಳಗೊಳಿಸುವ ಉದ್ದೇಶದಿಂದ ಜ್ಯೋತಿಷ್ಯ ಕ್ಯಾಲೆಂಡರನ್ನು ಇಲ್ಲಿ ಸಾದರಪಡಿಸುತ್ತಿದ್ದೇವೆ. ನಮ್ಮ ಭವಿಷ್ಯಫಲ ಏನಿದೆ ಎಂದು ಇಲ್ಲಿ ಖುದ್ದಾಗಿ ನಾವೇ ನೋಡಿಕೊಳ್ಳಬಹುದು.

ಚಂದ್ರನ ಚಲನೆಯನ್ನು ಆಧಿರಿಸಿ ರೂಪಿಸಲಾಗಿರುವ ಈ ಕ್ಯಾಲೆಂಡರನ್ನು ನೋಡಿ ಆಯಾ ದಿನ ಪ್ರೇಮ ಪರಿಣಯ ಎಂದು ಹೇಗೆ, ಮನೆ ಕೊಳ್ಳಲು ಯಾವ ದಿನ ಸೂಕ್ತ, ಎಂದು ಧನ ಪ್ರಾಪ್ತಿಯಾಗುತ್ತದೆ, ಯಾವ ದಿನ ಖಿನ್ನತೆ ಆವರಿಸುತ್ತದೆ, ಎಂದು ಸಂತಸದ ಬುಗ್ಗೆ ಉಕ್ಕುತ್ತದೆ ಮುಂತಾದ ವಿಷಯಗಳ ಬಗ್ಗೆ ತಿಳಿಯಬಹುದು. ಎಲ್ಲ ಸಂಗತಿಗಳನ್ನು ಪಂಡಿತರು ವಿವಿಧ ಚಿಹ್ನೆಗಳ ಮುಖಾಂತರ ಅತ್ಯಂತರ ಸರಳವಾಗಿ ತಿಳಿಸಿಕೊಡುತ್ತಾರೆ.

ಯಾವ ಚಿಹ್ನೆ ಏನು ಹೇಳುತ್ತದೆ?

ಹೃದಯ - ಪ್ರೀತಿ ಪ್ರೇಮ ಪ್ರಣಯಕ್ಕೆ ಆ ದಿನ ಅತ್ಯಂತ ಸುದಿನವಾಗಿರುತ್ತದೆ.
ಮಿಂಚು - ಆ ದಿನ ನಿಮ್ಮ ಜೀವನದಲ್ಲಿ ಆಪತ್ತು ಬರಬಹುದು.
ಮನೆ - ಮನೆ ಅಥವಾ ಅಂಗಡಿಯನ್ನು ಆ ದಿನ ಕೊಳ್ಳಬಹುದು ಅಥವಾ ಮಾರಬಹುದು.
ಮುಗುಳ್ನಗೆ - ಆ ದಿನ ನಿಮ್ಮ ಜೀವನದಲ್ಲಿ ಸಂತಸ ಬರಬಹುದು.
ಚಿಂತೆ - ಯಾವುದೋ ವಿಷಯದಲ್ಲಿ ಚಿಂತೆ ಅಥವಾ ಖಿನ್ನತೆ ಆವರಿಸಬಹುದು.
ನಕ್ಷತ್ರ - ಆ ದಿನ ಜೀವನದಲ್ಲಿ ಸೌಭಾಗ್ಯದ ದಿನವಾಗಿರುತ್ತದೆ.
ನಾಣ್ಯ - ನಾಣ್ಯ ಇದ್ದ ದಿನ ಧನ ಲಾಭ ಆಗುವ ಸಂಭವನೀಯತೆ ಇರುತ್ತದೆ.

ಪ್ರತಿದಿನ ಬಿಡುವು ಸಿಕ್ಕಾಗಲೆಲ್ಲ ಈ ಕ್ಯಾಲೆಂಡರನ್ನು ನೋಡಬೇಕೆಂದಿದ್ದರೆ ಈ ಪುಟವನ್ನು ಬುಕ್‌ಮಾರ್ಕ್ ಮಾಡಿಟ್ಟುಕೊಳ್ಳಿ.

ಮೇಷ : ದುರಂಕಾರವೆಂಬ ಗುಣವನ್ನು ತಿಪ್ಪೆಗೆಸೆಯಿರಿ

ಮೇಷ : ದುರಂಕಾರವೆಂಬ ಗುಣವನ್ನು ತಿಪ್ಪೆಗೆಸೆಯಿರಿ

ನಿಲುವುಗನ್ನಡಿಯ ಮುಂದೆ ಗಂಟೆಗಟ್ಟಲೆ ನಿಲ್ಲುವ ನಾವು ಮನಸಿನೊಳಗಿನ ಕನ್ನಡಿಯ ಮುಂದೆ ನಿಂತು ನಮ್ಮ ವ್ಯಕ್ತಿತ್ವವನ್ನು ಮರುಪರಿಶೀಲಿಸಿಕೊಂಡಿದ್ದೇವಾ? ಇಲ್ಲವಾದರೆ, ಒಮ್ಮೆ ಆಂತರ್ಯದೊಳಗೆ ಇಣುಕಿ, ವ್ಯಕ್ತಿತ್ವವನ್ನು ಬಗೆದು, ಚೆಲ್ಲಾಪಿಲ್ಲಿ ಮಾಡಿ ಮತ್ತು ಶಿಸ್ತುಬದ್ಧವಾಗಿ ಜೋಡಿಸಲು ಪ್ರಯತ್ನಿಸಿ. ಸಾಧ್ಯವಾದರೆ ಓರೆಕೋರೆಗಳು, ಅಡೆತಡೆಗಳನ್ನು ನಿವಾರಿಸಿಕೊಂಡು ಶಿಲ್ಪಿಯಿಂದ ಉಳಿಪೆಟ್ಟು ತಿಂದು ನಿಂತ ಸುಂದರ ಶಿಲ್ಪದಂತೆ ಕೆತ್ತಲು ಯತ್ನಿಸಿ. ಸಣ್ಣಸಣ್ಣ ಪ್ರಯತ್ನಗಳು, ಬದಲಾವಣೆಗಳು ಬೃಹತ್ತಾದ ಪರಿಣಾಮವನ್ನು ನೀಡಬಲ್ಲವು, ಫಲಿತಾಂಶವನ್ನು ದೊರಕಿಸಿಕೊಡಬಲ್ಲವು. ಅದಕ್ಕೆ ಮೊದಲಿಗೆ ಮಾಡಬೇಕಾಗಿರುವುದು ಅಹಂಕಾರ ಅಂಥವಾ ದುರಂಕಾರವೆಂಬ ಗುಣವನ್ನು ತಿಪ್ಪೆಗೆಸೆಯಬೇಕಾಗಿರುವುದು. ಇದು ನಿಮ್ಮಿಂದ ಸಾಧ್ಯವೆ?

ವೃಷಭ : ಒಂದೊಂದು ಹೆಜ್ಜೆಯನ್ನೂ ಲಕ್ಷ್ಯದಿಂದಿಡಿ

ವೃಷಭ : ಒಂದೊಂದು ಹೆಜ್ಜೆಯನ್ನೂ ಲಕ್ಷ್ಯದಿಂದಿಡಿ

ಯಾವ ಸಮಯದಲ್ಲಿ ಏನು ಮಾತಾಡಬೇಕು, ಹೇಗೆ ನಡೆದುಕೊಳ್ಳಬೇಕು, ವರ್ತನೆ ಯಾವ ರೀತಿ ಇರಬೇಕು ಎಂಬ ಪ್ರಜ್ಞೆ ಇದ್ದವನಿಗೆ ಯಾವ ಸಂಕಷ್ಟಗಳೂ ಬರಲಾರವು. ಬಂದರೂ ಅವುಗಳಿಂದ ಜಾಣ್ಮೆಯಿಂದ ಹೇಗೆ ತಪ್ಪಿಸಿಕೊಳ್ಳಬೇಕು ಎಂಬ ಪ್ರಜ್ಞೆಯೂ ಜಾಗೃತವಾಗಿರಬೇಕು. ಇದು ಆಯಾ ವ್ಯಕ್ತಿಯ ಮೇಲೆ ನಿರ್ಭರವಾಗಿರುತ್ತದೆ. ತಿರುಗೇಟು ನೀಡಲು ನಿಂತವನಿಗೆ ಕಪಾಳಕ್ಕೆ ಬಿಗಿಯುವುದು ಅಷ್ಟು ಶ್ರೇಯಸ್ಕರವಲ್ಲ, ಆತ ಖದೀಮನಾಗಿದ್ದರೂ ಸರಿ. ಹಾಗೆಯೆ, ಜಾರಿ ಬೀಳಲು ನೆಲವು ಜಾರುವಂತಿರಬೇಕಂತೇನೂ ಇಲ್ಲ. ನಮ್ಮ ಹೆಜ್ಜೆ ಯಾವ ರೀತಿ ಇರುತ್ತದೆ ಎಂಬುದರ ಮೇಲೆ ನಾವು ಜಾರುತ್ತೇವೆಯೋ ಇಲ್ಲವೋ ಎಂಬುದು ನಿರ್ಣಯವಾಗಿರುತ್ತದೆ. ಒಂದೊಂದು ಹೆಜ್ಜೆಯೂ ಲಕ್ಷ್ಯದಿಂದಿಡಿ, ಅಜಾಗರೂಕತೆ ಬೇಡವೇಬೇಡ.

ಮಿಥುನ : ಪ್ರತಿದಿನವೂ ಸಿಹಿಯನ್ನು ಸವಿಯುತ್ತಿರುವಂತಿದ್ದರೆ...

ಮಿಥುನ : ಪ್ರತಿದಿನವೂ ಸಿಹಿಯನ್ನು ಸವಿಯುತ್ತಿರುವಂತಿದ್ದರೆ...

ದಿನವೂ ಬಗೆಬಗೆಯ ಸಿಹಿ ತಿನಿಸುಗಳನ್ನು ಸವಿಯುತ್ತಿದ್ದರೆ ಎಷ್ಟು ಚೆನ್ನಾಗಿರುತ್ತದಲ್ಲಾ ಎಂದು ಮನಸು ಚಿಂತಿಸುತ್ತಿರುತ್ತದೆ. ಆದರೆ, ಅದರಿಂದ ಮುಂದಾಗುವ ಆರೋಗ್ಯದ ಮೇಲಿನ ದುಷ್ಪರಿಣಾಮದ ಬಗ್ಗೆ ಚಿಂತಿಸುವುದೇ ಇಲ್ಲ. ಆದರೆ, ಗಲಿಬಿಲಿಗೊಳ್ಳುವ ಅವಶ್ಯಕತೆಯಿಲ್ಲ. ಬದುಕು ಎಂದಿಗೂ ಹಂಸತೂಲಿಕಾ ತಲ್ಪದ ಮೇಲಿನ ಪಯಣವಾಗಿರುವುದಿಲ್ಲ ಎಂಬ ಪ್ರಜ್ಞೆ ಮನದಲ್ಲಿದ್ದರೆ ಅಷ್ಟೇ ಸಾಕು. ಯಾವುದೇ ಸಂಕಷ್ಟಗಳನ್ನು ನಗುನಗುತ್ತಲೇ ಎದುರಿಸುತ್ತೇವೆ, ಸುಸಂದರ್ಭದಲ್ಲಿ ಪರಿಹಾರವನ್ನೂ ಕಂಡುಕೊಳ್ಳುತ್ತೇವೆ. ನೋವನ್ನು ಕೂಡ ನಗುನಗುತ್ತಲೇ ಸ್ವೀಕರಿಸುವ ಮನಃಸ್ಥಿತಿಯನ್ನೂ ತಲುಪುವುದು ಸಾಧ್ಯ. ಊಟ ತಿಂಡಿಗೆ ಸಮಯ ಮೀಸಲಿಟ್ಟಂತೆ ಧ್ಯಾನಕ್ಕೂ ಕೊಂಚ ಸಮಯವನ್ನು ಪ್ರತಿದಿನವೂ ಮೀಸಲಿಡಿ.

ಕರ್ಕಾಟಕ : ಬಂದಿದ್ದೆಲ್ಲವನ್ನೂ ಸವಾಲಿನಂತೆ ಸ್ವೀಕರಿಸಬೇಕು

ಕರ್ಕಾಟಕ : ಬಂದಿದ್ದೆಲ್ಲವನ್ನೂ ಸವಾಲಿನಂತೆ ಸ್ವೀಕರಿಸಬೇಕು

ಎಲ್ಲವೂ ಸುಸೂತ್ರವಾಗಿ ನಡೆಯುತ್ತಿದೆ ಎಂದು ಅಂದುಕೊಳ್ಳುವಷ್ಟರಲ್ಲಿಯೇ ಊಹಿಸಲಸಾಧ್ಯವಾದ ಸುದ್ದಿಯೊಂದು ಬಂದು ಅಪ್ಪಳಿಸಿಬಿಡುತ್ತದೆ. ಆದರೆ, ಅಂಥ ಸಂದರ್ಭವನ್ನು ಎದುರಿಸಲು ನಾವು ಎಷ್ಟು ಸಿದ್ದರಿದ್ದೇವೆ? ಎಷ್ಟರ ಮಟ್ಟಿಗೆ ಮಾನಸಿಕ ಸಿದ್ಧತೆ ಮಾಡಿಕೊಂಡಿದ್ದೇವೆ? ಬದುಕೆಂದರೆ, ಬರೀ ದುಡಿದು ತಿನ್ನುವುದಷ್ಟೇ ಅಲ್ಲ, ಅನ್ನ ಮಾಡಿ ಬಡಿಸುವುದೂ ಅಲ್ಲ. ಇವೆಲ್ಲವನ್ನೂ ಮೀರಿದಂಥ ಸಂಘರ್ಷಗಳಿಗೆ ನಮ್ಮನ್ನು ನಾವು ಆಗಾಗ ಒಡ್ಡಿಕೊಳ್ಳುತ್ತಿರಬೇಕು, ಬದುಕಿನ ಬವಣೆಗಳಿಗೆ ಮೈಯೊಡ್ಡುತ್ತಿರಬೇಕು. ಬಂದಿದ್ದೆಲ್ಲವನ್ನೂ ಸವಾಲಿನಂತೆ ಸ್ವೀಕರಿಸಬೇಕು.

ಸಿಂಹ : ದೇವರು ಅಲ್ಪಸ್ವಲ್ಪ ಬುದ್ಧಿ ಕೊಟ್ಟಿದ್ದಾನೆಂದರೆ

ಸಿಂಹ : ದೇವರು ಅಲ್ಪಸ್ವಲ್ಪ ಬುದ್ಧಿ ಕೊಟ್ಟಿದ್ದಾನೆಂದರೆ

ನಮಗೆ ದೇವರು ಅಲ್ಪಸ್ವಲ್ಪ ಬುದ್ಧಿ ಕೊಟ್ಟಿದ್ದಾನೆಂದರೆ, ಅಷ್ಟಿಷ್ಟು ಓದಿ ಒಂದು ಹಂತದ ಮಟ್ಟಿಗೆ ಜ್ಞಾನ ಸಂಪಾದಿಸಿದ್ದೇವೆಂದರೆ, ತಲೆಯ ಮೇಲೆ ಕೋಡು ಬಂದಂತೆ ಆಡಬೇಕೆಂದೇನೂ ಅಲ್ಲ. ತಮಗಿಂತ ಕಡಿಮೆ ಜ್ಞಾನ ಅಥವಾ ಸಂಪಾದನೆ ಹೊಂದಿರುವವರನ್ನು ಕೀಳಾಗಿ ಕಾಣುವ ಅವಶ್ಯಕತೆ ಇರುವುದಿಲ್ಲ. ಏಕೆಂದರೆ, ಹಾಗೆ ತಿಳಿದುಕೊಂಡವನು ಎಂದಿಗೂ ಜ್ಞಾನ ದಾರಿದ್ರ್ಯವನ್ನೇ ಹೊಂದಿರುತ್ತಾನೆ. ಕಾರನ್ನಾದರೂ ಕೊಳ್ಳಿ, ಮನೆಯನ್ನಾದರೂ ಬುಕ್ ಮಾಡಿ, ನಾಲ್ಕಾರು ಜನರೊಂದಿಗೆ ಸಿಹಿಯೊಂದಿಗೆ ಸುದ್ದಿಯನ್ನು ಹಂಚಿಕೊಳ್ಳಿ. ಒಂದಂತೂ ಸತ್ಯ ಜಗತ್ತು ನೀವಂದುಕೊಂಡಿದ್ದಕ್ಕಿಂತ ವಿಸ್ತಾರವಾಗಿದೆ, ಆಳವಾಗಿಯೂ ಇದೆ. ಗಳಿಸಿದ್ದೆಲ್ಲವನ್ನೂ ಕಳೆದುಕೊಳ್ಳುವ ಮೊದಲು ಎಚ್ಚೆತ್ತುಕೊಳ್ಳಿ.

ಕನ್ಯಾ : ದಿನಚರಿಯನ್ನು ಒಂದು ದಿನ ವಿಮರ್ಶೆಗೆ ಒಡ್ಡಿ

ಕನ್ಯಾ : ದಿನಚರಿಯನ್ನು ಒಂದು ದಿನ ವಿಮರ್ಶೆಗೆ ಒಡ್ಡಿ

ನಿಮ್ಮ ದಿನಚರಿಯನ್ನು ಒಂದು ದಿನ ವಿಮರ್ಶೆಗೆ ಒಡ್ಡಿ. ಬೆಳಿಗ್ಗೆದ್ದು ಕರಾಗ್ರೆ ವಸತೆ ಲಕ್ಷ್ಮೀ ಎಂದು ಹೇಳುವುದರೊಂದ ಹಿಡಿದು ದೇವರಿಗೆ ಕೈಮುಗಿದೋ, ಧ್ಯಾನವನ್ನು ಮಾಡಿಯೋ ಮುಸುಕೆಳೆಯುವವರೆಗೆ ಏನೇನು ಮಾಡುತ್ತೀರಿ ಎಂಬುದರ ಪಟ್ಟಿ ಮಾಡಿ. ದಿನನಿತ್ಯ ಮಾಡುವ ಕೈಂಕರ್ಯಗಳನ್ನು ಹೊರತುಪಡಿಸಿ ಬದುಕಿಗೆ ಪ್ರೇರೇಪಣೆ ನೀಡುವಂಥ, ಚೈತನ್ಯ ತುಂಬುವಂಥ ಕೆಲಸಗಳನ್ನು ಏನೇನು ಮಾಡಿದ್ದೀರಿ ಎಂಬುದನ್ನು ಹೆಕ್ಕಿಕೊಳ್ಳಿ. ಅಂತಹ ಯಾವುದೇ ಸಂಗತಿಗಳು ಇಲ್ಲದಿದ್ದರೆ ಕೂಡಲೆ ಕಾರ್ಯತತ್ಪರರಾಗಿರಿ, ಕಾಲ ಇನ್ನೂ ಮಿಂಚಿಲ್ಲ. ಏಕತಾನತೆಯಿಂದ ಹೊರಬರದಿದ್ದರೆ ಗೂಡಿನ ಗುಬ್ಬಚ್ಚಿಗಳಾಗುವುದರಲ್ಲಿ ಸಂದೇಹವೇ ಇಲ್ಲ. ಬದುಕಿನ ರೆಕ್ಕೆಗಳನ್ನು ಮೂಡಿಸಿ, ಫಟಫಟಿಸುವವರು ನಾವೇ ಹೊರತು ಮತ್ತಾರೂ ಅಲ್ಲ.

ತುಲಾ : ಕಷ್ಟಗಳು ಇಲ್ಲದಿದ್ದರೆ ಸುಖಕ್ಕೆಲ್ಲಿ ಬೆಲೆ?

ತುಲಾ : ಕಷ್ಟಗಳು ಇಲ್ಲದಿದ್ದರೆ ಸುಖಕ್ಕೆಲ್ಲಿ ಬೆಲೆ?

ದೈವದ ದಯೆಯಿಂದಲೋ, ಕಾಕತಾಳೀಯವೋ ನಮಗೆ ಕಂಟಕವಾಗಿದ್ದ ಕೆಲ ಅಡೆತಡೆಗಳು ತಾವಾಗಿಯೇ ನಿವಾರಣೆಯಾಗುತ್ತವೆ. ಅವನ್ನು ಅಡೆತಡೆ ಎಂದು ಅಂದುಕೊಳ್ಳಬೇಕಿಲ್ಲ, ಅವು ತಮ್ಮ ದಾರಿಯನ್ನು ಹುಡುಕಿಕೊಂಡು ಹೊರಟಿರುತ್ತವೆ. ಆದರೆ, ಇಷ್ಟಕ್ಕೆ ನಮ್ಮ ಜವಾಬ್ದಾರಿ ಕಡಿಮೆಯಾಗುವುದಿಲ್ಲ. ಮಳೆ ಬಂದಾಗ, ತಗ್ಗುಬಿದ್ದ ಗುಣಿ ಮತ್ತೆ ನೀರಿನಿಂದ ತುಂಬಿಕೊಳ್ಳಲೇಬೇಕು. ಒಂದು ಕೊನೆಯಾದರೂ ಮತ್ತೊಂದು ಹೆಗಲೇರಿರುತ್ತದೆ. ಎಲ್ಲಕ್ಕಿಂತ ಹೆಚ್ಚಾಗಿ ನಮ್ಮನ್ನು ನಂಬಿದವರ, ಹಿರಿಯರ ಆರೋಗ್ಯದ, ಯೋಗಕ್ಷೇಮದ ಜವಾಬ್ದಾರಿ ನಮ್ಮ ಮೇಲಿರುತ್ತದೆ. ಇದು ಇನ್ನೊಂದು ಸವಾಲು ಒಡ್ಡುತ್ತದೆ, ಎದುರಿಸಲು ಸಿದ್ಧರಾಗಿರಿ. ತೊಂದರೆಗಳು, ಕಷ್ಟಗಳು ಇಲ್ಲದಿದ್ದರೆ ಸುಖಕ್ಕೆಲ್ಲಿ ಬೆಲೆ. ಎಲ್ಲವನ್ನೂ ಅನುಭವಿಸಿ.

ವೃಶ್ಚಿಕ : ಬದಲಾವಣೆ ತರುವ ಅವ್ಯಕ್ತ ಅನುಭವ

ವೃಶ್ಚಿಕ : ಬದಲಾವಣೆ ತರುವ ಅವ್ಯಕ್ತ ಅನುಭವ

ಯಾವುದೋ ಒಂದು ಅವ್ಯಕ್ತ ಅನುಭವ, ಅರಿವಿಗೆ ಬಾರದ ಘಟನೆ, ಬದುಕಿಗೆ ಅನಿರೀಕ್ಷಿತ ತಿರುವನ್ನು ನೀಡುತ್ತದೆ, ನಮ್ಮ ವ್ಯಕ್ತಿತ್ವವನ್ನು ಸಂಪೂರ್ಣ ಬದಲಾಯಿಸುತ್ತದೆ. ಈ ಬದಲಾವಣೆಗಳು ಕ್ರಮೇಣ ನಮ್ಮ ಅರಿವಿಗೆ ಬಂದೇಬರುತ್ತವೆ. ಮಳೆ, ಗಾಳಿ, ಬಿಸಿಲಿನ ಹೊಡೆತಕ್ಕೆ ಸಿಕ್ಕೂ ಅಚ್ಚಳಿಯದೆ ನಿಂತಿರುವ ಶಿಲಾಮೂರ್ತಿಯಂತೆ ಈ ಬದಲಾವಣೆಯ ಹೊಡೆತವನ್ನು ಸಹಿಸಿಕೊಂಡು ನಾವು ಕೆತ್ತಿದ ಶಿಲ್ಪದಂತಾಗಬೇಕು. ಆಗುವುದೆಲ್ಲ ಒಳ್ಳೆಯದಕ್ಕೇ ಎಂದು ಮುನ್ನಡೆಯಬೇಕು. ವಿದ್ಯಾರ್ಥಿಗಳಿಗೆ ಓದಿನ ಮೇಲೆ ಹೆಚ್ಚಿನ ಗಮನವಿರಲಿ, ಇಲ್ಲಸಲ್ಲದ ಆಕರ್ಷಣೆಗಳಿಗೆ ಮನಸ್ಸು ಒಗ್ಗದಿರಲಿ. ವಯಸ್ಸು ಮಾಗುತ್ತ ಪ್ರಬುದ್ಧತೆಯ ಬುದ್ಧನಂತೆ ವರ್ತಿಸಲು ಆರಂಭಿಸಿ. ಇಡೀ ಭೂಮಿ ನಿಮ್ಮ ಅಂಗೈಯಲ್ಲಿ ಇರುತ್ತದೆ.

ಧನುಸ್ಸು : ಸಂದಿಗ್ಧತೆ ನಿವಾರಣೆಗೆ ಸಿದ್ಧತೆ

ಧನುಸ್ಸು : ಸಂದಿಗ್ಧತೆ ನಿವಾರಣೆಗೆ ಸಿದ್ಧತೆ

ಕುತ್ತಿಗೆಯವರೆಗೆ ನೀರು ಬಂದ ನಂತರ ಏನು ಮಾಡಲಿ ಎಂದು ಚಿಂತಿಸುವುದಕ್ಕಿಂತ, ಮುನ್ನೆಚ್ಚರಿಕೆಯಿಂದ ವರ್ತಿಸುವುದೇ ಜಾಣತನ. ಆದರೆ, ಸಂಕಷ್ಟಗಳ ಬರುತ್ತವೆಂದು ತಿಳಿದ ಮೇಲೂ ಏನೂ ಮಾಡದೆ ಸುಮ್ಮನಿರುವುದು ಮೂರ್ಖತನ. ಈ ದ್ವಂದ್ವದಿಂದ ನಾವು ಹೊರಬರಬೇಕಾದರೆ, ಕೆಲವೊಂದು ರಿಸ್ಕ್ ಗಳನ್ನು ತೆಗೆದುಕೊಳ್ಳಲೇಬೇಕು, ಬರಬಹುದಾದ ಸಂದಿಗ್ಧತೆ ನಿವಾರಣೆಗೆ ಕ್ರಮಗಳನ್ನು ತೆಗೆದುಕೊಳ್ಳಲೇಬೇಕು. ನಿಮ್ಮ ನಿರ್ಧಾರಗಳಿಗೆ ನೀವೇ ಹಕ್ಕುದಾರರಾಗಬೇಕು, ಕ್ರಮಗಳಿಗೆ ನೀವೇ ಜವಾಬ್ದಾರರಾಗಬೇಕು. ಇಷ್ಟೆಲ್ಲದರ ನಡುವೆ ಇಡಬೇಕಾದ ಹೆಜ್ಜೆಯನ್ನು ತಪ್ಪಿಸುವ, ಹಿತಶತ್ರುಗಳು ಕೂಡ ಜೊತೆಗಿದ್ದೇ ಇರುತ್ತಾರೆ. ಯಾರನ್ನು ನಂಬುವುದು ಯಾರನ್ನು ಬಿಡುವುದು? ನಿಮಗೆ ಬಿಟ್ಟಿದ್ದು.

ಮಕರ : ಆಲಸ್ಯವೆಂಬ ಆಂತರಿಕ ಶತ್ರು

ಮಕರ : ಆಲಸ್ಯವೆಂಬ ಆಂತರಿಕ ಶತ್ರು

ನಮ್ಮ ಹಲವಾರು ನಡೆನುಡಿಗಳು ಸುತ್ತಲಿನವರಿಗೆ ತೋರಿಕೆಯಂತೆ ಕಂಡುಬರುತ್ತಿರುತ್ತವೆ. ಆದರೆ, ನಮ್ಮ ಆಂತರ್ಯದಲ್ಲಿ ಸತ್ಯದ ಸೆಲೆ ಬತ್ತದಂತಿದ್ದರೆ, ಇತರ ನುಡಿಗಳಿಗೆ, ಹಂಗಿನ ಮಾತುಗಳಿಗೆ ಏಕೆ ತಲೆ ಕೆಡಿಸಿಕೊಳ್ಳಬೇಕು? ಗೊತ್ತಿದ್ದೂ ಗೊತ್ತಿದ್ದೂ ಬೇರೆಯವರ ಮಾತುಗಳಿಗೆ ಮರುಳಾಗಿ ಮೋಸ ಹೋಗುವಂಥ ಯಾವುದೇ ಕೆಲಸಕ್ಕೆ ಹೋಗಬೇಡಿ. ಏಕೆಂದರೆ, ಇದರಿಂದ ನಿಮಗೆ ಮಾತ್ರವಲ್ಲ ನಿಮ್ಮನ್ನು ನಂಬಿದವರಿಗೂ ಪೆಟ್ಟಾಗುತ್ತದೆ, ಮನಸ್ಸಿಗೆ ಘಾಸಿಯಾಗುತ್ತದೆ. ಏಕಾಂಗಿಯಾಗಿ ಕುಳಿತುಕೊಂಡು ಒಳಿತುಕೆಡಕುಗಳ ಪರಾಮರ್ಶೆ ಮಾಡಿ. ಯೋಜನೆಯೊಂದು ಮನದಲ್ಲಿ ಹೊಳಹು ಹಾಕಿದ್ದರೆ ಪಟ್ಟಾಗಿ ಕುಳಿತು ಕಾರ್ಯತಂತ್ರ ರೂಪಿಸಿ, ಅದು ಯಶಸ್ವಿಯಾಗುವವರೆಗೂ ಬಿಡಬೇಡಿ. ನಿಮ್ಮಲ್ಲಿ ಬಡಿದಾಡುವ ಅಸಾಧ್ಯ ಛಲವಿದೆ. ಅದರಿಂದ ಆಲಸ್ಯವೆಂಬ ಆಂತರಿಕ ಶತ್ರುವನ್ನು ಒದ್ದು ಓಡಿಸಿ.

ಕುಂಭ : ಮುನಿಸು, ದ್ವೇಷವನ್ನು ಬಂಡಲ್ ಕಟ್ಟಿ

ಕುಂಭ : ಮುನಿಸು, ದ್ವೇಷವನ್ನು ಬಂಡಲ್ ಕಟ್ಟಿ

ಕಾರಣಾಂತರಗಳಿಂದ ಯಾರ ಮೇಲಾದರೂ ಮುನಿಸಿಕೊಂಡಿದ್ದರೆ, ದ್ವೇಷ ಕಟ್ಟಿಕೊಂಡಿದ್ದರೆ, ಅದನ್ನು ಬಂಡಲ್ ಕಟ್ಟಿ ಕೆಂಗೇರಿ ಕಾಲುವೆಯಲ್ಲಿ ಬಿಸಾಕಿಬನ್ನಿ. ಏಕೆಂದರೆ, ಅಂಥವರಿಂದಲೇ ಸಹಾಯ ಯಾಚಿಸುವ ಸಮಯ ಬಂದರೂ ಬರಬಹುದು. ದ್ವೇಷ ನಮ್ಮನ್ನೇ ಸುಟ್ಟುಹಾಕುತ್ತದೆ ಮತ್ತು ಸಂಕಷ್ಟದ ಸಮಯದಲ್ಲಿ ಹಿಂಡಿ ಹಿಪ್ಪೆ ಮಾಡಿಬಿಡುತ್ತದೆ. ಇಲ್ಲಿ ಯಾವುದೇ ಅಹಂಕಾರಕ್ಕೆ ಅವಕಾಶವೇ ಇರಬಾರದು. ಎರಡು ಹೆಜ್ಜೆ ಹಿಂದಿಟ್ಟರೆ ಸೋಲಿಗೆ ಸೆರಗೊಡ್ಡಿದಂತೇನೂ ಆಗುವುದಿಲ್ಲ.

ಮೀನ : ನಿಮ್ಮ ಬಳಿ ಉಜ್ವಲವಾದ ಭವಿಷ್ಯವಿದೆ

ಮೀನ : ನಿಮ್ಮ ಬಳಿ ಉಜ್ವಲವಾದ ಭವಿಷ್ಯವಿದೆ

ನಾವೆಷ್ಟೇ ಒಳ್ಳೆಯವರೆಂದು ಎಲ್ಲರೆದಿರುವ ಬಿಂಬಿಸಿಕೊಳ್ಳಲು ಹೋದರೂ, ನಮ್ಮೊಳಗೆಯೇ ಕೆಟ್ಟ ಗುಣ ಮನೆ ಮಾಡಿದ್ದರೆ ಪ್ರಯೋಜನವೇನು? ನಿಮ್ಮಿಡೀ ವ್ಯಕ್ತಿತ್ವವನ್ನು ಹೊಳೆಯಲ್ಲಿ ಹುಣಸೆಹಣ್ಣು ತೊಳೆದಂತಾಗಲು ಒಂದು ಕೆಟ್ಟ ನಡೆ ಸಾಕು. ಕೋಪವನ್ನು ನಿಗ್ರಹಿಸಿದಷ್ಟೂ ಜನರು ನಿಮ್ಮ ಬಳಿ ಬರುತ್ತಾರೆ. ಇಲ್ಲದಿದ್ದರೆ ಸಂಬಂಧಗಳನ್ನು ಒಂದೊಂದಾಗಿ ಕಳೆದುಕೊಳ್ಳಲು ಆರಂಭಿಸುತ್ತೀರಿ. ಬೇಕೆಂದಾಗ ಕೂಡ ಒಬ್ಬರೂ ಬರುವುದಿಲ್ಲ. ನಿಮ್ಮ ಬಳಿ ಉಜ್ವಲವಾದ ಭವಿಷ್ಯವಿದೆ. ಅದನ್ನು ಯಾವುದೇ ಕಾರಣಕ್ಕೂ ಹಾಳು ಮಾಡಿಕೊಳ್ಳಲು ಹೋಗಬೇಡಿ. ಮನೆ ಖರೀದಿಗೆ ಸಂಬಂಧಿಸಿದಂತೆ ಉತ್ತಮ ಅವಕಾಶವೊಂದು ನಿಮ್ಮನ್ನು ಹುಡುಕಿ ಬರಲಿದೆ.

lok-sabha-home

ಕನ್ನಡ ಮ್ಯಾಟ್ರಿಮೋನಿಯಲ್ಲಿ - ಉಚಿತ ನೋಂದಣಿ !

English summary
The calendars specially designed by astrologer Pandit Anuj K. Shukla shows days when the Moon, Sun, and planets favour particular zodiac sign. Astro Calendar for Aries, Taurus, Gemini, Cancer, Leo, Virgo, Libra, Scorpio, Sagittarius, Capricorn, Aquarius and Pisces.

Oneindia ಬ್ರೇಕಿಂಗ್ ನ್ಯೂಸ್,
ತಾಜಾ ಸುದ್ದಿ ತಕ್ಷಣವೇ ಪಡೆಯಿರಿ

Notification Settings X
Time Settings
Done
Clear Notification X
Do you want to clear all the notifications from your inbox?
Settings X
We use cookies to ensure that we give you the best experience on our website. This includes cookies from third party social media websites and ad networks. Such third party cookies may track your use on Oneindia sites for better rendering. Our partners use cookies to ensure we show you advertising that is relevant to you. If you continue without changing your settings, we'll assume that you are happy to receive all cookies on Oneindia website. However, you can change your cookie settings at any time. Learn more