ಆತ್ಮನಿರ್ಭರ್ ಭಾರತದಲ್ಲಿ ಆಹಾರೋತ್ಪನ್ನ ರಫ್ತು ಸದ್ದು

ಆತ್ಮನಿರ್ಭರ್ ಭಾರತದ ಮಾರುಕಟ್ಟೆಯಲ್ಲಿ ಈಗ 'ಆಮದು'ಗಿಂತ ಹೆಚ್ಚು 'ರಫ್ತು' ಸದ್ದು ಮಾಡುತ್ತಿದೆ. ಕೃಷಿ ಪ್ರಧಾನ ದೇಶದಲ್ಲಿ ಆಹಾರೋತ್ಪನ್ನಗಳ ರಫ್ತು ಪ್ರಮಾಣ $ 17.8 ಬಿಲಿಯನ್ ಮೀರಿದೆ. ಅಕ್ಕಿ ಜತೆಗೆ ಈಗ ಭಾರತೀಯ ನೆಲದ ಬಾಳೆಹಣ್ಣು ಕೂಡ ವಿದೇಶಿಗರನ್ನು ಸೆಳೆದಿದೆ.

2025ನೇ ಹಣಕಾಸು ವರ್ಷದ ಮೊದಲ 9 ತಿಂಗಳಲ್ಲಿ ತಾಜಾ ಹಣ್ಣುಗಳು ಮತ್ತು ತರಕಾರಿಗಳ ಸಾಗಣೆ ಶೇ.5ಕ್ಕಿಂತ ಹೆಚ್ಚು ಅಂದರೆ $2.65 ಬಿಲಿಯನ್‌ಗೆ ತಲುಪಲಿದೆ. ಉತ್ಪಾದಿತ ಆಹಾರ ಧಾನ್ಯಗಳ ಸಾಗಣೆ ಶೇ.10ಕ್ಕಿಂತ ಹೆಚ್ಚಾಗಿ $2.03 ಬಿಲಿಯನ್‌ಗೆ ತಲುಪಿದೆ.

ಭಾರತದ ಬಾಳೆಹಣ್ಣಿಗೆ ಬಹು ಬೇಡಿಕೆ: ವಿದೇಶಿಗರು ಭಾರತೀಯ ನೆಲದ ಬಾಳೆ ಹಣ್ಣಿಗೆ ಮನಸೋತು ಬಹು ಬೇಡಿಕೆಯಿಡುತ್ತಿದ್ದಾರೆ. ಪರಿಣಾಮ ಕಳೆದ ದಶಕದಲ್ಲಿ ಭಾರತದ ಬಾಳೆಹಣ್ಣಿನ ರಫ್ತು ಹತ್ತು ಪಟ್ಟು ಹೆಚ್ಚಳ ಕಂಡಿದೆ.

ಭಾರತ ಸಮುದ್ರ ಮಾರ್ಗದ ಮೂಲಕ ನೆದರ್‌ಲ್ಯಾಂಡ್ಸ್‌ಗೆ ಯಶಸ್ವಿ ಪ್ರಾಯೋಗಿಕ ಸಾಗಣೆಯ ನಂತರ ಮುಂದಿನ ಐದು ವರ್ಷಗಳಲ್ಲಿ $1 ಬಿಲಿಯನ್ ಬಾಳೆಹಣ್ಣು ರಫ್ಟು ಮಾಡುವ ಗುರಿ ಹೊಂದಿದೆ. ಕೇಂದ್ರದ ಕೃಷಿ ಮತ್ತು ಸಂಸ್ಕರಿಸಿದ ಆಹಾರ ಉತ್ಪನ್ನಗಳ ರಫ್ತು ಅಭಿವೃದ್ಧಿ ಪ್ರಾಧಿಕಾರ (APEDA) ಇದನ್ನು ದೃಢಪಡಿಸಿದೆ.

ಬಾಳೆಹಣ್ಣಿಗೆ ರಷ್ಯಾ ಪ್ರಮುಖ ಮಾರುಕಟ್ಟೆ

ಸಮುದ್ರ ಮಾರ್ಗ ಮುಕ್ತವಾಗಿದ್ದರಿಂದ ಭಾರತೀಯ ಬಾಳೆಹಣ್ಣಿಗೆ ರಷ್ಯಾ ಪ್ರಮುಖ ಮಾರುಕಟ್ಟೆಯಾಗಿ ಹೊರ ಹೊಮ್ಮುವ ನಿರೀಕ್ಷೆಯಿದೆ.

2023-24ರ ಆರ್ಥಿಕ ವರ್ಷದಲ್ಲಿ ಭಾರತವು US $300 ಮಿಲಿಯನ್ ಮೌಲ್ಯದ ಬಾಳೆಹಣ್ಣನ್ನು ರಫ್ತು ಮಾಡಿದೆ. ಇದು 2022-23ರಲ್ಲಿನ US $176 ಮಿಲಿಯನ್‌ನಿಂದ ಗಮನಾರ್ಹ ಹೆಚ್ಚಳವಾಗಿದೆ.

ಜಾಗತಿಕವಾಗಿ ಬಾಳೆಹಣ್ಣು ರಫ್ತಿನಲ್ಲಿ ದೇಶದ ಪಾಲು 2013ರಲ್ಲಿ ಕೇವಲ 0.21 ಪ್ರತಿಶತದಷ್ಟಿತ್ತು. ಅದೀಗ 2023ರ ದಶಕದಲ್ಲಿ 1.74 ಪ್ರತಿಶತಕ್ಕೆ ಏರಿದೆ. ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವಾಲಯ ಸಂಗ್ರಹಿಸಿದ ಅಂಕಿ-ಅಂಶಗಳ ಪ್ರಕಾರ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಭಾರತೀಯ ಬಾಳೆಹಣ್ಣಿನ ಅಗತ್ಯತೆ ತೀವ್ರವಾಗಿದೆ ಎಂಬುದನ್ನು ಪ್ರತಿಪಾದಿಸಿದೆ.

ಜಾಗತಿಕವಾಗಿ ಬಾಳೆಹಣ್ಣು ವರ್ಷಕ್ಕೆ ಸುಮಾರು 10 ಬಿಲಿಯನ್ ಯುಎಸ್ ಡಾಲರ್ ಉತ್ಪಾದನೆ ಕಾಣುತ್ತಿದೆ. ಆದಾಗ್ಯೂ, ಬಾಳೆಹಣ್ಣು ಉತ್ಪಾದನೆಯ 15ರಿಂದ 20ರಷ್ಟು ಪ್ರತಿಶತದಷ್ಟು ಮಾತ್ರ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ವಹಿವಾಟು ಆಗುತ್ತಿದ್ದು, ಇದೀಗ ಮಾರುಕಟ್ಟೆ ವಿಸ್ತರಿಸಿಕೊಳ್ಳುತ್ತಿದೆ.

ಮುಖ್ಯವಾಗಿ ಭಾರತ, ಚೀನಾ ಮತ್ತು ಬ್ರೆಜಿಲ್‌ನಂತಹ ದೊಡ್ಡ ಉತ್ಪಾದಕ ದೇಶಗಳಲ್ಲಿ ಬಾಳೆ ಹಣ್ಣು ಹೆಚ್ಚಾಗಿ ಜನರ ಆಹಾರಕ್ರಮಕ್ಕೆ ಕೊಡುಗೆ ನೀಡುತ್ತಿದೆ. ಬಾಳೆಹಣ್ಣಿನಲ್ಲಿ ಭಾರತ ಅತಿದೊಡ್ಡ ಉತ್ಪಾದಕ ರಾಷ್ಟ್ರವಾಗಿದ್ದು, ಈಗ ರಫ್ತು ಮಾಡುವಲ್ಲಿಯೂ ಮುಂಚೂಣಿಯಲ್ಲಿದೆ.

$26.56 ಬಿಲಿಯನ್ ರಫ್ತು ಗುರಿ: ಕೃಷಿ ಮತ್ತು ಸಂಸ್ಕರಿಸಿದ ಆಹಾರ ಉತ್ಪನ್ನಗಳ ರಫ್ತು ಅಭಿವೃದ್ಧಿ ಪ್ರಾಧಿಕಾರ (APEDA) 2025ನೇ ಹಣಕಾಸು ವರ್ಷಕ್ಕೆ $26.56 ಬಿಲಿಯನ್ ರಫ್ತು ಗುರಿಯನ್ನು ಹೊಂದಿದೆ.

$ 8.72 ಬಿಲಿಯನ್ ಗೂ ಅಧಿಕ ಅಕ್ಕಿ ರಫ್ತು ಗುರಿ: 2025ನೇ ಆರ್ಥಿಕ ವರ್ಷದಲ್ಲಿ ಪ್ರಮುಖವಾಗಿ ಅಕ್ಕಿಯೇ $ 8.72 ಬಿಲಿಯನ್ ಗೂ ಅಧಿಕ (ಹಿಂದಿಗಿಂತ ಶೇ.19ಕ್ಕಿಂತ ಹೆಚ್ಚು) ರಫ್ತು ಸಾಧನೆಯ ಗುರಿ ಹೊಂದಿದೆ.

ವಾಣಿಜ್ಯ ಗುಪ್ತಚರ ಅಂಕಿ ಅಂಶಗಳ ಮಹಾ ನಿರ್ದೇಶನಾಲಯ(DGCIS) ಸಂಗ್ರಹಿಸಿದ ದತ್ತಾಂಶದ ಪ್ರಕಾರ ಪ್ರಸಕ್ತ ವರ್ಷದ ಮೊದಲ 9 ತಿಂಗಳಲ್ಲಿ ಅಕ್ಕಿ ರಫ್ತು ಪ್ರಮಾಣ $ 8.72 ಬಿಲಿಯನ್ ಗೆ ಏರಿಕೆ ಕಾಣಲಿದೆ. ಕಳೆದ ವರ್ಷ ಈ ಅವಧಿಗೆ $ 6.44 ಬಿಲಿಯನ್ ರಫ್ತು ಹಂತ ತಲುಪಿತ್ತು. ಅದೀಗ ಗಣನೀಯ ಪ್ರಮಾಣದಲ್ಲಿ ಏರಿಕೆ ದಾಖಲಿಸುವ ನಿರೀಕ್ಷೆ ಮೂಡಿಸಿದೆ.

ಅಧಿಕೃತ ಅಂಕಿ ಅಂಶಗಳ ಪ್ರಕಾರ ಕಳೆದ ವರ್ಷದ ಇದೇ ಅವಧಿಗೆ ಹೋಲಿಸಿದರೆ ಭಾರತದ ಕೃಷಿ ಮತ್ತು ಸಂಸ್ಕರಿಸಿದ ಆಹಾರ ಉತ್ಪನ್ನಗಳ ರಫ್ತು ಶೇ.11ರಷ್ಟು ದೃಢವಾದ ಬೆಳವಣಿಗೆ ದಾಖಲಿಸಿತ್ತು. ಪ್ರಸ್ತುತ ಹಣಕಾಸು ವರ್ಷದ ಏಪ್ರಿಲ್-ಡಿಸೆಂಬರ್ ಅವಧಿಯಲ್ಲಿ ಅದು $17.8 ಬಿಲಿಯನ್‌ಗೆ ತಲುಪಲಿದೆ.

ಡಿಸೆಂಬರ್ 2023ರಲ್ಲಿ $0.87 ಬಿಲಿಯನ್ ನಿಂದ ಡಿಸೆಂಬರ್ 2024ಕ್ಕೆ $1.43 ಬಿಲಿಯನ್ ಅಕ್ಕಿ ರಫ್ತು ಶೇ.64.03ರಷ್ಟು ಏರಿಕೆಯಾಗಿತ್ತು. ಬಲವಾದ ಜಾಗತಿಕ ಬೇಡಿಕೆ ಹಿನ್ನೆಲೆಯಲ್ಲಿ ಈ ವರ್ಷ ಅಕ್ಕಿ ರಫ್ತು ಪ್ರಮಾಣ ತೀವ್ರವಾಗಲಿದೆ ಎಂಬ ಆಶಾವಾದ ರಫ್ತುದಾರರದ್ದು.

24ನೇ ಹಣಕಾಸು ವರ್ಷದಲ್ಲಿ, ಭಾರತ $10.41 ಬಿಲಿಯನ್ ಮೌಲ್ಯದ ಅಕ್ಕಿಯನ್ನು ಸಾಗಿಸಿತ್ತು. ಇದು ಹಿಂದಿನ ವರ್ಷಕ್ಕಿಂತ ಶೇ.6.5ರಷ್ಟು ಇಳಿಕೆ ಪ್ರಮಾಣದಲ್ಲಿತ್ತು. ಕಾರಣ ದೇಶೀಯ ಮಾರುಕಟ್ಟೆಯಲ್ಲಿ ಧಾನ್ಯಗಳ ಲಭ್ಯತೆಯನ್ನು ಹೆಚ್ಚಿಸುವ ತಂತ್ರವಾಗಿತ್ತು. 2025ರಲ್ಲಿ ಧಾನ್ಯೋತ್ಪಾದನೆ ಶೇ.10ಕ್ಕಿಂತ ಹೆಚ್ಚಾಗಿ $2.03 ಬಿಲಿಯನ್‌ ತಲುಪಿದೆ.

ಡೈರಿ ಉತ್ಪನ್ನ ರಫ್ತು ಶೇ.10ಕ್ಕಿಂತ ಹೆಚ್ಚು ಏರಿಕೆ: ಏಪ್ರಿಲ್-ಡಿಸೆಂಬರ್ ಅವಧಿಯಲ್ಲಿ ಎಮ್ಮೆ ಮಾಂಸ, ಡೈರಿ ಮತ್ತು ಕೋಳಿ ಉತ್ಪನ್ನಗಳ ರಫ್ತು ವಾರ್ಷಿಕವಾಗಿ ಶೇ.10ಕ್ಕಿಂತ ಹೆಚ್ಚು ಏರಿಕೆಯಾಗಿ $3.64 ಬಿಲಿಯನ್‌ಗೆ ತಲುಪಿದೆ. 2024ರ ಇದೇ ಅವಧಿಯಲ್ಲಿ $3.3 ಬಿಲಿಯನ್ ಆಗಿತ್ತು. ಇತರ ಕೃಷಿ ಉತ್ಪನ್ನಗಳ ರಫ್ತಿನಲ್ಲಿ ತಂಬಾಕು, ಕಾಫಿ ಮತ್ತು ಚಹಾ ಸೇರಿವೆ.

English summary

Explore the significant increase in food exports from India, highlighting self-reliance and economic growth.