Diwali 2024: ದೀಪಾವಳಿ ವಿಜೃಂಭಣೆಯಿಂದ ಆಚರಿಸಬೇಕಾ? ದೇಶದ ಈ ಸ್ಥಳಗಳಿಗೆ ಭೇಟಿ ನೀಡಿ
ದೀಪಗಳ ಹಬ್ಬ ದೀಪಾವಳಿಯನ್ನು ಇದೇ ಅಕ್ಟೋಬರ್ 31 ಮತ್ತು ನವೆಂಬರ್ 1ರಂದು ಆಚರಿಸಲಾಗುತ್ತದೆ. ಭಾರತದ ಪ್ರತಿಯೊಂದು ರಾಜ್ಯದಲ್ಲೂ ದೀಪಾವಳಿಯನ್ನು ಆಚರಿಸುವ ರೀತಿ ತುಂಬಾ ವಿಶಿಷ್ಟವಾಗಿದೆ. ನೀವು ಈ ಬಾರಿಯ ದೀಪಾವಳಿ ಹಬ್ಬವನ್ನು ವಿಶಿಷ್ಟವಾಗಿ ಆಚರಿಸಬೇಕು ಅಂದುಕೊಂಡಿದ್ದರೆ ದೇಶದ ಕೆಲ ಸ್ಥಳಗಳಿಗೆ ಭೇಟಿ ನೀಡಬಹುದು.
ಈ ಹಬ್ಬವನ್ನು ಕೆಡುಕಿನ ಮೇಲೆ ಒಳಿತಿನ ವಿಜಯದ ಸಂಕೇತವೆಂದು ಆಚರಿಸಲಾಗುತ್ತದೆ. ರಾವಣನ ವಿರುದ್ಧ ಜಯ ಗಳಿಸಿ 14 ವರ್ಷಗಳ ವನವಾಸದ ನಂತರ ರಾಮನು ತನ್ನ ಮನೆಗೆ ಅಂದರೆ ಅಯೋಧ್ಯೆಗೆ ಹಿಂದಿರುಗಿದುದನ್ನು ಸಂಭ್ರಮಿಸಲು ಹಿಂದೂಗಳು ಈ ಹಬ್ಬವನ್ನು ಆಚರಿಸುತ್ತಾರೆ. ಈ ಹಬ್ಬವನ್ನು ಆಚರಿಸಲು ಜನರು ಎಲ್ಲೇ ಇದ್ದರೂ ತಮ್ಮ ಮನೆಗಳಿಗೆ ಹೋಗುತ್ತಾರೆ.
ಕೆಲವರು ಕಾರಣಾಂತರಗಳಿಂದ ತಮ್ಮ ಕುಟುಂಬದೊಂದಿಗೆ ದೀಪಾವಳಿಯನ್ನು ಆಚರಿಸಲು ಸಾಧ್ಯವಾಗುವುದಿಲ್ಲ. ಅಂತಹ ಪರಿಸ್ಥಿತಿಯಲ್ಲಿ ನೀವು ದೆಹಲಿಯಲ್ಲಿ ಅಥವಾ ದೆಹಲಿಯ ಸುತ್ತಮುತ್ತ ವಾಸಿಸುತ್ತಿದ್ದರೆ, ದೀಪಾವಳಿಯನ್ನು ಆಚರಿಸಲು ಕೆಲ ಸ್ಥಳಗಳಿಗೆ ಭೇಟಿ ನೀಡಬಹುದು. ಇಲ್ಲಿನ ದೀಪಾವಳಿ ಆಚರಣೆಗಳು ವಿಶ್ವಾದ್ಯಂತ ಪ್ರಸಿದ್ಧವಾಗಿವೆ. ಹಾಗಾದರೆ ದೀಪಾವಳಿಯನ್ನು ವಿಜೃಂಭಣೆಯಿಂದ ಆಚರಿಸುವ ದೇಶದ 5 ಸ್ಥಳಗಳ ಬಗ್ಗೆ ಈಗ ತಿಳಿಯೋಣ.
1. ಅಯೋಧ್ಯೆ
ಶ್ರೀರಾಮನ ಜನ್ಮಸ್ಥಳವಾದ ಅಯೋಧ್ಯೆಯಲ್ಲಿ ದೀಪಾವಳಿ ಆಚರಣೆ ದೇಶದ ಎಲ್ಲಾ ಸ್ಥಳಗಳಿಗಿಂತ ವಿಜೃಂಭಣೆಯಿಂದ ಆಚರಿಸಲಾಗುತ್ತದೆ. ಈ ಹಬ್ಬ 14 ವರ್ಷಗಳ ವನವಾಸದ ನಂತರ ರಾಮ, ಅವನ ಹೆಂಡತಿ ಸೀತೆ ಮತ್ತು ಸಹೋದರ ಲಕ್ಷ್ಮಣನ ಹಿಂದಿರುಗುವಿಕೆಯನ್ನು ಪ್ರತಿನಿಧಿಸುತ್ತದೆ. ಇಲ್ಲಿ ಪ್ರತಿ ವರ್ಷ ನೂರಾರು ದೀಪಗಳನ್ನು ಸರಯೂ ನದಿಯ ದಡದಲ್ಲಿ ಬೆಳಗಿಸಲಾಗುತ್ತದೆ. ಇದರೊಂದಿಗೆ ರಾಮಾಯಣದ ವಿಷಯಗಳನ್ನು ಚಿತ್ರಿಸುವ ಕೋಷ್ಟಕಗಳನ್ನು ಸಹ ಪ್ರದರ್ಶಿಸಲಾಗುತ್ತದೆ. ಈ ವರ್ಷ ಇಲ್ಲಿ ದೀಪಾವಳಿ ಇನ್ನಷ್ಟು ವಿಶೇಷವಾಗಲಿದೆ. ಏಕೆಂದರೆ ಅಯೋಧ್ಯೆಯಲ್ಲಿ ಶ್ರೀರಾಮನ ಸಿಂಹಾಸನಾರೋಹಣದ ನಂತರ ಇದು ಅಯೋಧ್ಯೆಯ ಮೊದಲ ದೀಪಾವಳಿಯಾಗಿದೆ.
2. ವಾರಣಾಸಿ
ವಾರಣಾಸಿಯಲ್ಲೂ ದೀಪಾವಳಿಯನ್ನು ಸಂಭ್ರಮದಿಂದ ಆಚರಿಸಲಾಗುತ್ತದೆ. ಇಲ್ಲಿ ದೀಪಾವಳಿಯನ್ನು ವಾರವಿಡೀ ಆಚರಿಸಿ ಸಂಭ್ರಮಿಸಲಾಗುತ್ತದೆ. ಈ ನಗರ ಪ್ರಪಂಚದಾದ್ಯಂತ ಪ್ರಸಿದ್ಧವಾದ ದಶಾಶ್ವಮೇಧ ಘಾಟ್ಗೆ ಹೆಸರುವಾಸಿಯಾಗಿದೆ. ಇಲ್ಲಿಗೆ ಬರುವ ಪ್ರವಾಸಿಗರು ಗಂಗಾ ಆರತಿಯನ್ನು ನೋಡುವುದನ್ನು ಮರೆಯುವುದಿಲ್ಲ. ಇಲ್ಲಿ ದೀಪಾವಳಿಯಂದು ರಾತ್ರಿಯಿಡೀ ಅಲಂಕಾರಗೊಂಡ ಮಾರುಕಟ್ಟೆಗಳು ತೆರೆದಿರುತ್ತವೆ. ಸಂಜೆ ಪಟಾಕಿಗಳನ್ನು ಸಿಡಿಸಲಾಗುತ್ತದೆ. ವಾರಣಾಸಿಯಲ್ಲಿ ದೀಪಾವಳಿಯಂದು ನೀವು ರುಚಿಕರವಾದ ಬೀದಿ ಆಹಾರವನ್ನು ಸಹ ಆನಂದಿಸಬಹುದು.
3. ಉದಯಪುರ
ಸರೋವರಗಳ ನಗರ ಎಂದು ಕರೆಯಲ್ಪಡುವ ಉದಯಪುರ ದೇಶಾದ್ಯಂತ ಪ್ರಸಿದ್ಧವಾಗಿದೆ. ಈ ಸ್ಥಳವನ್ನು ದೀಪಾವಳಿಯನ್ನು ಆಚರಿಸಲು ಅತ್ಯುತ್ತಮ ಸ್ಥಳವೆಂದು ನೀವು ಆಯ್ಕೆ ಮಾಡಿಕೊಳ್ಳಬಹುದು. ಈ ನಗರದ ಜನರು ಆಕಾಶದಲ್ಲಿ ದೀಪಗಳು ಮತ್ತು ಪಟಾಕಿಗಳನ್ನು ಹಾರಿಸುತ್ತಾರೆ. ದೀಪಾವಳಿಯ ಅನೇಕ ವರ್ಣರಂಜಿತ ಮತ್ತು ಭವ್ಯವಾದ ಆಚರಣೆಗಳನ್ನು ಇಲ್ಲಿನ ವಿವಿಧ ಅರಮನೆಗಳಲ್ಲಿ ಆಯೋಜಿಸಲಾಗುತ್ತದೆ. ಹೀಗಾಗಿ ದೀಪಾವಳಿಯನ್ನು ಆಚರಿಸಲು ನೀವು ನಿಮ್ಮ ಕುಟುಂಬದೊಂದಿಗೆ ಉದಯಪುರಕ್ಕೆ ಹೋಗಬಹುದು.
4. ರಿಷಿಕೇಶ
ದೆಹಲಿ ಮತ್ತು ಸುತ್ತಮುತ್ತಲಿನ ಜನರು ವರ್ಷಕ್ಕೆ 2-3 ಬಾರಿ ರಿಷಿಕೇಶಕ್ಕೆ ಭೇಟಿ ನೀಡುತ್ತಾರೆ. ಅಲ್ಲದೆ ವಿಶೇಷವಾಗಿ ಪ್ರತಿ ವರ್ಷವೂ ಹೆಚ್ಚಿನ ಸಂಖ್ಯೆಯಲ್ಲಿ ಜನರು ದೀಪಾವಳಿಯನ್ನು ಆಚರಿಸಲು ರಿಷಿಕೇಶಕ್ಕೆ ಆಗಮಿಸುತ್ತಾರೆ. ಋಷಿಕೇಶದ ಜೊತೆಗೆ ಜನರು ದೀಪಾವಳಿಯ ಸಂದರ್ಭದಲ್ಲಿ ಹರಿದ್ವಾರಕ್ಕೆ ಹೋಗಿ ಗಂಗಾ ಸ್ನಾನ ಮಾಡುತ್ತಾರೆ. ರಿಷಿಕೇಶದಲ್ಲಿರುವ ಹೋಟೆಲ್ಗಳು, ರೆಸಾರ್ಟ್ಗಳು ಮತ್ತು ಕ್ಲಬ್ಗಳು ದೀಪಾವಳಿಗಾಗಿ ವಿವಿಧ ಕಾರ್ಯಕ್ರಮಗಳನ್ನು ಆಯೋಜಿಸುತ್ತವೆ.
5. ಜೈಪುರ
ಪಿಂಕ್ ಸಿಟಿ ಎಂದು ಕರೆಯಲ್ಪಡುವ ಜೈಪುರದಲ್ಲಿ ದೀಪಾವಳಿಯು ವಿಭಿನ್ನ ಆಕರ್ಷಣೆಯನ್ನು ಹೊಂದಿದೆ. ಹಬ್ಬಕ್ಕಾಗಿ ಇಡೀ ನಗರಕ್ಕೆ ಗುಲಾಬಿ ಬಣ್ಣ ಬಳಿಯಲಾಗಿದೆ. ಕೆಲವರು ವಿಶೇಷವಾಗಿ ದೀಪಾವಳಿಗೂ ಮುನ್ನ ಇಲ್ಲಿಗೆ ಹೋಗಿ ದೀಪಾವಳಿಗೆ ಶಾಪಿಂಗ್ ಮಾಡುತ್ತಾರೆ. ಇಲ್ಲಿನ ರಾಜ ಮನೆತನಗಳು ದೀಪಾವಳಿ, ಗೋವರ್ಧನ, ಅನ್ನಕುಟ್ ಮತ್ತು ಭೈದೂಜ್ ಹಬ್ಬಗಳನ್ನು ವಿಜೃಂಭಣೆಯಿಂದ ಆಚರಿಸುತ್ತಾರೆ. ಜೈಪುರದಲ್ಲಿ ಪಟಾಕಿ ಸಿಡಿಸುವ ವಿಶೇಷ ಕಾರ್ಯಕ್ರಮವನ್ನೂ ಆಯೋಜಿಸಲಾಗುತ್ತದೆ. ಹೀಗಾಗಿ ನೀವು ಈ ಎಲ್ಲಾ ಸ್ಥಳಗಳಿಗೆ ದೀಪಾವಳಿಯಂದು ಭೇಟಿ ನೀಡಿ ನಿಮ್ಮವರೊಂದಿಗೆ ಹಬ್ಬವನ್ನು ವಿಶೇಷವಾಗಿ ಹಾಗೂ ವಿಶಿಷ್ಟವಾಗಿ ಆಚರಿಸಬಹುದು.
Click it and Unblock the Notifications
Sign in with Google