ಅಕ್ಕ ಸ್ಮರಣ ಸಂಚಿಕೆಗೆ ಬರಹ ಆಹ್ವಾನ

ಆತ್ಮೀಯ ಕನ್ನಡಿಗರೇ,

ನಿಮಗೆ ತಿಳಿದಿರುವಂತೆ 2010ನೇ ಇಸವಿಯ 6ನೇ ಅಕ್ಕ ವಿಶ್ವ ಕನ್ನಡ ಸಮ್ಮೇಳನದ ನಿರ್ವಹಣೆಗೆ ಅಮೆರಿಕ ಕನ್ನಡ ಕೂಟಗಳ ಆಗರ (ಅಕ್ಕ) ಸಂಸ್ಥೆಯು ನ್ಯೂ ಜೆರ್ಸಿಯಲ್ಲಿರುವ ಬೃಂದಾವನ ಕನ್ನಡ ಕೂಟವನ್ನು ಆಯ್ಕೆಮಾಡಿದೆ. ಈ ಸಮ್ಮೇಳನವನ್ನು ಎಡಿಸನ್, ನ್ಯೂ ಜೆರ್ಸಿಯಲ್ಲಿರುವ ರಾರಿಟನ್ ಸೆಂಟರರ್ನಲ್ಲಿ ಸೆಪ್ಟೆಂಬರ್ 3ರಿಂದ 5ರವರೆಗೆ ಆಚರಿಸಲು ಏರ್ಪಾಡುಮಾಡಿದೆ.

ಈ ಸಮ್ಮೇಳನದ ಸವಿನೆನಪಿಗೋಸ್ಕರ ಒಂದು ಸ್ಮರಣ ಸಂಚಿಕೆಯನ್ನು ಪ್ರಕಟಿಸಿ ಅದನ್ನು ಸಮ್ಮೇಳನಕ್ಕೆ ಬಂದವರಿಗೆಲ್ಲಾ ವಿತರಿಸಲಾಗುವುದು. ಗಣ್ಯ ಮಹನೀಯರ ಸಂದೇಶಗಳು, ಹೆಸರಾಂತ ಕವಿಗಳ ಮತ್ತು ಲೇಖಕರ ಕವನಗಳು, ಲೇಖನಗಳು, ಸಣ್ಣಕಥೆಗಳು, ಮತ್ತು ಮಕ್ಕಳ ಬರವಣಿಗೆಗಳನ್ನು ಈ ಸ್ಮರಣ ಸಂಚಿಕೆಯಲ್ಲಿ ಪ್ರಕಟಿಸಲಾಗುವುದು. ಅದಕ್ಕೋಸ್ಕರ ಅಕ್ಕ 2010 ವಿಶ್ವ ಕನ್ನಡ ಸಮ್ಮೇಳನ ಸ್ಮರಣ ಸಂಚಿಕೆ ಸಮಿತಿ ಈ ಮೂಲಕ ನಿಮ್ಮ ಬರವಣಿಗೆಗಳಿಗೆ ಆಹ್ವಾನ ನೀಡುತ್ತಿದೆ.

ಅಕ್ಕ 2010 ವಿಶ್ವ ಕನ್ನಡ ಸಮ್ಮೇಳನ ಸ್ಮರಣ ಸಂಚಿಕೆಯಲ್ಲಿ ಪ್ರಕಟಿಸುವ ಲೇಖನ, ಕವನ, ಕಥೆ, ಇತ್ಯಾದಿ ಬರಹಗಳನ್ನು ಆಯ್ಕೆ ಮಾಡುವಾಗ ಈ ಕೆಳಗಿನ ನಿಯಮಗಳು ಅನ್ವಯವಾಗುತ್ತವೆ:

* ವಿಶ್ವ ಕನ್ನಡ ಸಮ್ಮೇಳನ ಸ್ಮರಣ ಸಂಚಿಕೆಯಲ್ಲಿ ಪ್ರಕಟಿಸಲು ಕಳುಹಿಸಿದ ಬರಹಗಳು ಬೇರೆಲ್ಲೂ ಪ್ರಕಟವಾಗಿರಬಾರದು.

* ಬರಹಗಳು 8ಪುಟಗಳಿಗಿಂತ ಹೆಚ್ಚಾಗಿರಬಾರದು (ಫಾಂಟ್ ಸೈಜ್: 12 (ಕನ್ನಡ), 11 (ಆಂಗ್ಲ), single line spaced) ಬರಹಗಳ ಗುಣಮಟ್ಟ ಹಾಗೂ ವಿಶಿಷ್ಟತೆಗಳಿಗೆ ಅನುಗುಣವಾಗಿ ಕೆಲವು ರಿಯಾಯಿತಿಗಳು ಅನ್ವಯವಾಗುತ್ತವೆ.

* ಕನ್ನಡ ಬರಹಗಳು “ಬರಹ“ದಲ್ಲಿರಬೇಕು, ಮತ್ತು ಆಂಗ್ಲ ಬರಹಗಳು “ಮೈಕ್ರೋಸಾಫ್ಟ್ ವರ್ಡ್“ನಲ್ಲಿರಬೇಕು.

* ಬರಹಗಳನ್ನು ಅಕ್ಕ 2010 ವಿಶ್ವ ಕನ್ನಡ ಸಮ್ಮೇಳನ ಸ್ಮರಣ ಸಂಚಿಕೆಯಲ್ಲಿ ಪ್ರಕಟಣೆಗೆಂದು ಆಯ್ಕೆಮಾಡುವಾಗ ಸ್ಮರಣ ಸಂಚಿಕೆ ಸಮಿತಿಯ ತೀರ್ಮಾನವೇ ಅಂತಿಮ.

* ನಿಮ್ಮ ಬರಹಗಳ ಜೊತೆಗೆ ನಿಮ್ಮ ಹೆಸರು, ವಿಳಾಸ, ದೂರವಾಣಿ ಸಂಖ್ಯೆ, ನಿಮ್ಮ ಬಗ್ಗೆ ಸಂಕ್ಷಿಪ್ತ ವಿವರಣೆ (ಮಕ್ಕಳ ಲೇಖನಗಳಾದರೆ ಅವರ ವಯಸ್ಸು) ಮತ್ತು ನಿಮ್ಮ ಛಾಯಾಚಿತ್ರವನ್ನು ಸೇರಿಸಿ ದಯವಿಟ್ಟು ಮಾರ್ಚ್ 31,2010 ರೊಳಗೆ [email protected] ಗೆ ಈ-ಮೈಲ್ ಮಾಡಿ.

ದಯವಿಟ್ಟು ಈ ಕೆಳಗಿನ ವಿವರಗಳನ್ನು ಗಮನಿಸಿ:

1) ಮಕ್ಕಳ ಲೇಖನಗಳು : ಸ್ಮರಣ ಸಂಚಿಕೆಗೆ ಕಳುಹಿಸಿಕೊಟ್ಟ ಮಕ್ಕಳ ಕೃತಿಗಳನ್ನು ಅವರ ವಯಸ್ಸಿನ ಪ್ರಕಾರ ಎರಡು ವಿಭಾಗ ಮಾಡಲಾಗುವುದು. ಅ) 12 ವರ್ಷ ಮತ್ತು ಅದಕ್ಕಿಂತ ಕಡಿಮೆ, ಆ) 13ರಿಂದ 18 ವರ್ಷದವರೆಗೆ. ಎರಡು ವಿಭಾಗದಿಂದಲೂ ತಲಾ 5 ಕೃತಿಗಳನ್ನು ಆಯ್ಕೆ ಮಾಡಿ ನಗದು ಬಹುಮಾನಗಳನ್ನು ಕೊಡಲಾಗುವುದು.

2) ಮಕ್ಕಳ ಪೇಂಟಿಂಗ್ ಗಳು : ಈ ಬಾರಿ ಮಕ್ಕಳ ಪೇಂಟಿಂಗ್ ಗಳನ್ನು ಸ್ಮರಣ ಸಂಚಿಕೆಯಲ್ಲಿ ಪ್ರಕಟಿಸಲಾಗುವುದು. ಇದಕ್ಕೆ ವಯಸ್ಸಿನ ವಿಭಾಗ ಮೇಲಿನಂತೆಯೇ ಇರುತ್ತದೆ. ಎರಡು ವಿಭಾಗದಿಂದಲೂ ತಲಾ 5 ಕೃತಿಗಳನ್ನು ಆಯ್ಕೆ ಮಾಡಿ ನಗದು ಬಹುಮಾನಗಳನ್ನು ಕೊಡಲಾಗುವುದು

ಸ್ಮರಣ ಸಂಚಿಕೆಯ ಸಂಪಾದಕ ಮಂಡಳಿ ನಿಮ್ಮ ಬರಹಗಳನ್ನು ಆದಷ್ಟು ಬೇಗ ಸ್ವೀಕರಿಸುವ ನಿರೀಕ್ಷೆಯಲ್ಲಿದೆ ಹಾಗೂ ತಾವೆಲ್ಲರೂ ಈ ಸಮ್ಮೇಳನಕ್ಕೆ ಆಗಮಿಸಿ ಈ ಸಮ್ಮೇಳನದ ಯಶಸ್ಸಿನಲ್ಲಿ ಪಾಲ್ಗೊಳ್ಳಬೇಕೆಂದು ಈ ಮೂಲಕ ನಿಮ್ಮಲ್ಲಿ ಕಳಕಳಿಯಿಂದ ಮನವಿ ಮಾಡಿಕೊಳ್ಳುತ್ತಿದ್ದೇವೆ. ಸಮ್ಮೇಳನಕ್ಕೆ ಸಂಬಂಧಪಟ್ಟಂತಹ ಎಲ್ಲಾ ಮಾಹಿತಿಗಳಿಗೆ ಅಕ್ಕ ಅಂತರ್ಜಾಲ ತಾಣಕ್ಕೆ (www.akkaonline.org) ಭೇಟಿಕೊಡಿ. ವಂದನೆಗಳು.

ಅಕ್ಕ ವಿಶ್ವ ಕನ್ನಡ ಸಮ್ಮೇಳನ 2010 ಸ್ಮರಣ ಸಂಚಿಕೆ ಸಮಿತಿ : ಸತೀಶ್ ಹೊಸನಗರ, ಮೀರಾ ಪಿ. ಆರ್, ಲಕ್ಷ್ಮೀಶ್ ಸೀಗೇಹಳ್ಳಿ, ಅಶೋಕ್ ಕಟ್ಟೀಮನಿ, ದಾಶರಥಿ ಗಟ್ಟು, ಶೈಲಾ ಪಾಟಂಕರ್, ರುದ್ರ ಕುಮಾರ್.